އިއްޔެއިން ފެށިގެން ރާއްޖޭގެ ހުރިހާ ދިމާއަކަށް މިހާރު ކުރަމުންދާ ވިއްސާރާގައި މިއަދު ހަވީރު ހައެއް ޖަހަން ދެން ފެންބޮޑުވެގެން ރިޕޯޓުކޮށްފައި ވަނީ ނުވަ ރަށަކުން ކަމަށް ނެޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން މިއަދު ބުނެފި އެވެ.
އެންޑީއެމްއޭގެ ރަސްމީ އެކްސް އެކައުންޓުން ކުރި ޕޯސްޓުގައި ބުނީ ވައި ގަދަ ވެގެންނާއި ފެން ބޮޑުވެގެން ނުވަ ރަށަކުން ރިޕޯޓްކޮށްފައިވާއިރު އެއިން އެއްވެސް ރަށަކުން އެއްވެސް އާއިލާއެއް ބަދަލު ކުރަން ޖެހޭ ފަދަ ހާލަތެއް އަދި ނެތް ކަމަށެވެ.
ފެން ބޮޑުވި ކަމަށް ރިޕޯޓްކުރި ރަށްރަށަކީ އައްޑޫ ސިޓީގެ މަރަދޫއާއި ފޭދޫއާއި ހިތަދޫ، ގއ. އަތޮޅު ދެއްވަދޫ، ޅ. އަތޮޅު ނައިފަރާއި ޅ.ކުރެންދޫ، ހދ. އަތޮޅު ކުޅުދުއްފުށި ސިޓީއާއި، ހއ. އަތޮޅު ބާރަށާއި އެ އަތޮޅު ދިއްދޫ އެވެ.
އިއްޔެއިން ފެށިގެން ކުރަމުންދާ ހުޅަނގު މޫސުމުގެ ވިއްސާރާގައި މިއަދު އެއްކޮށްހެން މުޅި ރާއްޖެއަށް އޮތީ ހުދު ސަމާލު ނެރެފަ އެވެ. އަދި މިއަދު ފަތިހު ވަނީ ހއ. އިން ފެށިގެން ގދ. އަތޮޅަށް ރީނދޫ އެލާޓު ނެރެފަ އެވެ. ރީނދޫ އެލާޓު ނެރެފައި ވަނީ ހެނދުނު 9:00 އާ ހަމައަށެވެ.
އޯގަސްޓު 9 ވަނަ ދުވަހު މޫސުމާ ބެހޭ ގައުމީ އިދާރާއިންނާއި ނޭޝަނަލް ޑިޒާސްޓާ މެނޭޖުމެންޓު އޮތޯރިޓީން ވަނީ ހުޅަނގު މޫސުމުގެ ބާރު ގަދަވެ، ވަޔާއި ކަނޑުތައް ގަދަވުމާއެކު ބޯކޮށް ވާރޭ ވެހޭނެ ކަމަށް ލަފާކޮށް ދުރާލައި ސަލާމަތީ ފިޔަވަޅުތައް ވަރުގަދަކޮށް އިލްތިމާސްކޮށްފަ އެވެ.
މެޓް އޮފީހުގެ އިލްތިމާސްއާ ގުޅިގެން އެންޑީއެމްއޭއިން ވަނީ ރައްކާތެރިކަމުގެ އިރުޝާދު ކަރުދާހެއް އާންމު ކޮށްފަ އެވެ. އެ ކަރުދާހުގައި ރައްކާތެރިވުމުގެ ގޮތުން އެޅިދާނެ ބައެއް ފިޔަވަޅުތައް ވެސް ހިމަނައިފައިވެ އެވެ.
