އިންޑިއާގެ ބޮޑުވަޒީރު، ނަރެންދުރަ މޯދީއަށް ފުރައްސާރަ ކުރި މައްސަލައިގައި ސަސްޕެންޑު ކޮށްފައި ހުރި ޔޫތު މިނިސްޓަރީގެ ނައިބު ވަޒީރު، މަރިޔަމް ޝިއުނާ ހާރިޖީ ސިޔާސަތު އޮންނަންޖެހޭ ގޮތުގެ "ފިލާވަޅެއް" ސޯޝަލް މީޑިއާގައި ނަގައިދީފި އެވެ.
އެކްސްގައި ޝިއުނާ ކުރި ޕޯސްޓެއްގައި ބުނީ ފެންނަނީ "އެމްޑީޕީ އައި އިދިކޮޅު ފަރާތްތަކުން މިއަދު ނުކުމެ އަވައްޓެރި ގައުމަކާ މި ގައުމު ޖައްސަން އުޅޭ މަންޒަރު" ކަމަށާއި ރާއްޖޭގެ "ހާރިޖީ ސިޔާސަތު އޮންނަންޖެހޭ ގޮތަކީ" އެއީ ނޫން ކަމަށެވެ.
ޝިއުނާ އެހެން ވިދާޅުވިއިރު، ރާއްޖެއާ އިންޑިއާ އާ ދެމެދު އޮތް ޒަމާންވީ ގުޅުން ގޯސްވެ ހީނަރުވެގެންދިޔައީ މިއަހަރު ކުރީކޮޅު ޝިއުނާގެ އިތުރުން ޔޫތު މިނިސްޓަރީގެ ނައިބު ވަޒީރުންގެ ގޮތުގައި ތިބި މަލްޝާ ޝަރީފާއި މަހުޒޫމް މާޖިދު މޯދީއަށް ފުރައްސާރަކޮށް މަލާމާތް ކުރި ފަހުންނެވެ.
އެ މައްސަލަ ހޫނުވެ އިންޑިއާގެ މަޝްހޫރު ފިލްމީތަރިންނާއި އިންޑިއާގެ ސޯޝަލްމީޑިއާ އެކްޓިވިސްޓުން ރާއްޖެއާ ދެކޮޅަށް ވަރުގަދަ ކެމްޕޭނެއް ވެސް ކުރިއަށް ގެންދިޔަ އެވެ. ނަތީޖާއެއްގެ ގޮތުން މުއްދަތެއް ނެތް ގޮތަށް ޝިއުނާ އާއި މަލްޝާ އަދި މަހުޒޫމް ސަސްޕެންޑު ކުރި އެވެ.
އިންޑިއާ އާއި ރާއްޖެއާ ދެމެދު އޮތް ގުޅުން އިންތިހާއަށް ގޯސްވެ ރާއްޖެއަށް އެގައުމުން އަންނަ ފަތުރުވެރިންގެ އަދަދު ބޮޑު ތަނުން މިހާރު ވަނީ ދަށްވެފަ އެވެ. އިންޑިއައާ ގުޅުން ބަދަހި ކުރުމުގެ މަސައްކަތް ސަރުކާރުން ކުރަން ފެށީ ރާއްޖޭގެ އިގުތިސާދު ދަށަށް ގޮސް ރާއްޖެއަށް އަންނަ ފަތުރުވެރިންގެ އަދަދު އިތުރު ކުރަން މަސައްކަތް ކުރަމުންދާ ދަނޑިވަޅެއްގަ އެވެ.
ހާރިޖީ ސިޔާސަތު ބައްޓަން ކުރަންޖެހޭ ގޮތުގެ ފިލާވަޅު ނަގައިދެމުން ޝިއުނާ އިތުރަށް ބުނީ "މިގައުމުގެ މިނިވަންކަމާ ސިޔާދަތީ ރަތް ރޮނގު ހުރަސްކުރުމުގެ ޖާގަ ނުދީ ހުރިހާ ގައުމަކާ ވެސް ގުޅުން ބަދަހި ވާންޖެހޭ" ކަމަށާއި "މިއީ މި ސަރުކާރާއި ކުރީ ސަރުކާރުތަކާ ހުރި ތަފާތު" ކަމަށެވެ.
ޝިއުނާގެ އެ ވާހަކަތަކަށް ގިނަ ބައެއްގެ ފާޑުކިޔުން އަމާޒުވެފައިވެ އެވެ. ފާޑުކީ ގިނަ މީހުން ބުނެފައި ވަނީ ވަކި ގައުމަކާ ޖެހިގަނެގެން އުޅުނީ ޝިއުނާމެން ކަމަށާއި މިއަދު ރާގު ބަދަލު ކުރަން ލަދުވެސް ގަންނަންޖެހޭ ކަމަށެވެ.
"މި މަންޖެ މިއުޅެނީ އަހަރުމެން އަނގައިން ނުބައި އެއްޗެހި ކިޔުއްވަންތަ؟ ކަމަނާ ސަސްޕެންޝަނުގައި ތިހުރީ ކީއްވެތޯ ހަނދާން ކޮށްލަބަލަ؟" ޝިއުނާގެ ޕޯސްޓު ރިޕޯޓުކޮށް މީހަކު ލިޔެފައިވެ އެވެ.
އޭގެ އިތުރުން ވެސް ޝިއުނާ ގޮވަނީ "ގުދޯ ގުދޯ" ކަމަށް ބުނެ ބައެއް މީހުން ފާޑު ކިޔާފައިވެ އެވެ.
މިއަދާ ހަމައަށް ވެސް އެ ތިން ނައިބުން ސަސްޕެންޝަނުގައި ތިބިއިރު، މުސާރަ އާއި އިނާޔަތުގެ ގޮތުގައި އެއިން ކޮންމެ ނައިބު ވަޒީރަކަށް 220،500ރ. ދީފައިވެ އެވެ. އެއީ ތިން ނައިބު މިނިސްޓަރުންނަށް އެކު ޖުމުލަ 661،500ރ. އެވެ.
