މާލެ ސިޓީ ކައުންސިލުން 2015 ގައި ގެނައި ކޮޅުވެއްޓި "އުފުލި 5" ގެ ޑިއުޓީ ނުދައްކައިގެން ކަސްޓަމްސް އިން އާދޭސް ކުރާތާ ނުވަ އަހަރަށްވުރެ ގިނަ ދުވަސްވީ ފަހުން، އެ ފައިސާ ދައްކަން ސިވިލް ކޯޓުން ހުކުމްކޮށްފި އެވެ.
ޖެނުއަރީ 20، 2021ގައި ސިވިލް ކޯޓަށް ކަސްޓަމްސް އިން މި މައްސަލަ ހުށައެޅީ ޑިއުޓީ ދެއްކުމަށްޓަކައި އެތައްފަހަރަކު ސިޓީގެ ޒަރިއްޔާއިން ސިޓީ ކައުންސިލަަށް އެންގުމަށްފަހު ވެސް އެ ފައިސާ ނުދެއްކުމުންނެވެ.
ކަސްޓަމްސްގެ ދައުވާތަކަށް ސިޓީ ކައުންސިލުން ވަނީ އިންކާރުކޮށްފަ އެވެ. އަދި ބުނެފައިވަނީ "އުފުލި 5" އެ ފަރާތަށް ވިއްކީ އޮޅުވާލައިގެން ކަމަށާއި، މި މުއާމަލާތު ތެރޭގައި ކޮރަޕްޝަނުގެ ބޮޑެތި މައްސަލަތަކެއް ހިމެނޭތީ، އެ އުޅަނދާއި ހަވާލުނުވުމަށް އޭސީސީ އިން އަންގާފައިވާތީ ހަވާލުވެފައި ނުވާނެކަމަށެވެ. އަދި މި ޑިއުޓީ ދެއްކުމަކީ މައުސޫމު ފަރާތްތަކަށް ނުހައްގުން ކުށެއްގެ އަދަަބު ދިނުން ކަމަށް ވެސް ކައުންސިލުން ބުންޏެވެ.
"އުފުލި 5" ކިޔާ އުޅަނދަށް ސިޓީ ކައުންސިލްގެ ނަމުގައި ގުޑްސް ޑިކްލެރޭޝަން ފޯމެއް ތައްޔާރުކޮށްފައިވާކަން ޝަރީއަތަށް ސާބިތުވެ އެވެ. މި އުޅަނދު ރާއްޖެއަށް އެތެރެކޮށްފައިވަނީ ސިޓީ ކައުންސިލުގެ ނަމުގަ އެވެ. އަދި މިކަމަކަށް އެ އެ ފަރާތަކުން އިންކާރެއް ނުކުރެ އެވެ. އެހެންކަމުން ޑިއުޓީ ނުދެއްކުމަށް ސިޓީ ކައުންސިލުން ދީފައިވާ ޖަވާބުން ބަރީއަވެވޭނެ ސަބަބެއް ނޫންކަމަށް ސިވިލް ކޯޓުގެ ހުކުމުގައި ވެ އެވެ.
ސިވިލްކޯޓުން ހުކުމްކުރީ އިމްޕޯޓް ޑިއުޓީގެ ގޮތުގައި ސިޓީ ކައުންސިލުން ކަސްޓަމްސް އަށް ދައްކަންޖެހި ނުދައްކާ އޮންނަކަން ހުށައަޅައިފައިވާ ލިޔުންތަކުން ޝަރީއަތަށް ސާބިތުވާކަމަށެވެ. އެހެންކަމުން ދިވެހި ދައުލަތަށް 1،121،941.50 (އެއްމިލިއަން އެއްލައްކަ އެކާވީސްހާސް ނުވަސަތޭކަ ސާޅީސްއެއް ރުފިޔާ، ފަންސާސް ލާރި) އޮގަސްޓް 8، 2024 އިން ފެށިގެން އެއް މަސްދުވަހު ތެރޭގައި ސިވިލް ކޯޓަށް ދައްކާ ހަލާސްކުރަން އެހުކުމުގައި މާލެ ސިޓީ ކައުންސިލަށް އެންގި އެވެ.
