ސިޔާސީ ނޫން ވަޒީފާތަކުން މީހުން ވަކިނުކުރާނެ ކަމަށް ވިދާޅުވެ ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދާ ހިލާފަށް ސަރުކާރު ހިއްސާވާ ކުންފުނިތަކުން ގިނަ އަދަދެއްގެ މުވައްޒަފުން ވަކިކުރަމުންދާތީ އިދިކޮޅު އެމްޑީޕީން ކަންބޮޑުވުން ފާޅުކޮށްފި އެވެ.
އިދިކޮޅު މައި ޕާޓީން މިރޭ ނެރުނު ބަޔާނެއްގައި ބުނީ ގައުމުގެ މާލީ ހާލަތު ގޯސްވެފައިވާ މި ވަގުތު އެތަކެއް އާއިލާތަކެއްގެ އާމްދަނީ ހުއްޓުވާލައި އެ އާއިލާތައް ހާލުގައި ޖެއްސުމަކީ ބަލައިގަނެވޭނެ ކަމެއް ނޫން ކަމަށެވެ. އާދައިގެ މުވައްޒަފުން ކަނޑާލާއިރު މަތީ ފަންތީގެ މުވައްޒަފުންގެ އަދަދު އިތުރުވަމުންދާކަމަށްވެސް ބަޔާނުގައި އެޕާޓީން ބުންޏެވެ.
"މީގެ އިތުރުން ސަރުކާރުގެ ސިޔާސީ މަގާމުތަކަށްވެސް އެތައް ބަޔަކު ދަނީ އަދިވެސް އައްޔަނުކުރަމުން. އަދި ސިޔާސީ މަގާމުތަކުގެ އަދަދު ރައްޔިތުންނަށް ސިއްރުކޮށްފައިވީ ނަމަވެސް އެ އަދަދު މިހާރު 2،000 އާ ގާތްކުރާނެ ކަމަށް ބެލެވޭ،" އެމްޑީޕީގެ ބަޔާނުގައި ބުންޏެވެ.
އިދިކޮޅުން މިފަދަ ބަޔާނެއް ނެރެފައި މިވަނީ ރައީސްގެ ވައުދުތަކާ ހިލާފަށް ފެނަކަ ކޯޕަރޭޝަން ލިމިޓެޑުން އެކަނި ވެސް 700 އަށް ވުރެ ގިނަ މުވައްޒަފުން ވަކި ކުރަން ނިންމާފައި ވަނިކޮށެވެ. ސަރުކާރުގެ މަގުހަދާ ކުންފުނި އާރުޑީސީންވެސް މި ވެރިކަމުގައި، ޖުލައި 1، ގެ ކުރިން 232 މުވައްޒަފަކު މަގާމުން ވަކިކުރި އެވެ.
މަޖިލިސް ކެމްޕޭނާ ދިމާކޮށް އާރުޑީސީން މުޅިން އަލަށް 291 މުވައްޒަފުން ނެގިކަމަށްވެސް އެ ކުންފުނިން ބުނެފައިވެ އެވެ. މަޖިލިސް އިންތިހާބުގައި ވޯޓުލީ ދުވަހުވެސް ހަ މުވައްޒަފުން ނެގި އެވެ.
ކުންފުނިތަކުގެ މުވައްޒަފުންގެ މައްސަލާގެ އިތުރުން އެމްޑީޕީން ވަނީ "މަހުގެ އަގު 20 ރުފިޔާގައި ހިފެހެއްޓުމާއި، އަށް މަހުން ފުށިދިއްގަރުފަޅު ހިއްކުމާއި، އެކަނިވެރި މައިންނަށް ދޭ އެލަވަންސް 12،000 ރުފިޔާއަށް ބޮޑުކުރުމާއި، ސިޔާސީ މަގާމުތަކުގެ އަދަދު 700 އަށްވުރެ ގިނަނުކުރުމުގެ ވައުދާ، ރައީސް ސޯލިހުގެ ސަރުކާރުން ފްލެޓް ދިން ފަރާތްތަކަށް ފްލެޓް ހަވާލުކުރާނެ ކަމަށްވި ވައުދު" ފަދަ ރައީސް މުއިއްޒުގެ ގިނަ ރިޔާސީ ވައުދުތަކެއް ހަނދާން އާކޮށްދީފަ އެވެ.
