ސަރުކާރަށް ނިސްބަތްވާ ރައްޔިތުންގެ މަޖިލީހުގެ މެންބަރުން ހައްލައިލަފާނެތީ ސަމާލުވާންޖެހޭ ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ ޕާޓީގެ އެތެރޭގައި އޮތް ނުތަނަވަސްކަމުގެ ސަބަބުން ކަމަށް، ބައެއް މެންބަރުން ވިދާޅުވެއްޖެ އެވެ.
ޕީއެންސީގެ ޖަގަހައިގައި އަންގާރަ ދުވަހުގެ ބޭއްވި ޖަލްސާގައި އަބްދުއްރަހީމް ވިދާޅުވީ މަޖިލީހުގައި ތިބި ޕީއެންސީގެ 75 މެންބަރުން މަސައްކަތް ކުރައްވަން ވާނީ ރައީސް ޑރ. މުހައްމަދު މުއިއްޒަށް އެހީތެރިވެދީ ރައްޔިތުންނަށް ތަރައްގީއާ ކުރިއެރުން ހޯދުމަށް ކުރެވޭ މަސައްކަތްތަކަށް މަގުފަހި ކުރައްވަން ކަމަށެވެ.
"ތިބޭފުޅުންގެ ޒިންމާއަކަށް ވާންވާނީ ގައުމާއި ރައްޔިތުންނަށް ލާބަޔާއި މަންފާ ހުރި މަގުން ކުރިއަށް ދިޔުން، އެމަގުން ކުރިއަށް ދެވޭނީ ރައީސް ޑރ. މުހައްމަދު މުއިއްޒު އާ އެކީގައި ސާބިތުވެ ތިބެގެން،" އެމަނިކުފާނު ވިދާޅުވި އެވެ.
މިމޭރުމުން އަބްދުއްރަހީމް ވާހަކަ ދެއްކެވީ ޕީއެންސީގެ ބިޔަ ޕީޖީ ގްރޫޕުގެ ތެރޭގައި ހިޔާލު ތަފާތުވުން ބޮޑުވަމުންދާ ދަނޑިވަޅެއްގަ އެވެ. ދާދި ފަހުން، އެ ޕާޓީގެ ޕާލިމެންޓަރީ ގްރޫޕުގެ ޑެޕިއުޓީ ލީޑަރު، މަހިބަދޫ ދާއިރާގެ މެންބަރު އަހުމަދު ތޯރިގު ވަނީ އިސްތިއުފާ ދެއްވައިފަ އެވެ.
"މިހާރު ވެސް އެންޓި ޑިފެކްޝަން ގާނޫނު އުވާލައިފި ނަމަ އެކަން [ބައިބައިވުން އޮތް ވަރު] ފެނިގެން ދާނެ. ލީޑަޝިޕާމެދު ހިތްހަމަ ނުޖެހޭ ތިރީހަކަށް މެންބަރުން މިހާރު ވެސް ތިބޭނެ. އެ ބޭފުޅުންގެ ވާހަކައިން އެކަން އެބަ އެނގޭ،" ޕީއެންސީގެ މެންބަރަކު ވިދާޅުވި އެވެ.
އަދަދު ނޫހާ ވާހަކަ ދެއްކެވި ޕީއެންސީގެ ބައެއް މެންބަރުން ވިދާޅުވީ މެންބަރުން ހިތްހަމަ ނުޖެހޭ ގިނަ މައްސަލަތަކެއް އެބަ ހުއްޓެވެ. އެކަންކަން ލީޑަޝިޕަށް ހިއްސާކޮށްފައިވާ ކަމަށް ވެސް އެ މެންބަރުން ވިދާޅުވި އެވެ.
އޭގެ ތެރޭގައި ޕީއެންސީ ވަރުގަދަ ކުރުމަށްޓަކައި ޕީޕީއެމް އުވާލުމަށް މަސައްކަތް ކުރުމާއި، ސަރުކާރާއި ކުންފުނިތަކުގެ ތެރޭގައި ހުރި ހިޔާނާތުގެ މައްސަލަތަކާއި މެންބަރުން އެދޭ ކަންކަން ފުރިހަމަވުން ލަސްވުމާއި، ސަރުކާރުގެ ހިންގުން ހުއްޓިފައި އޮތުމަކީ ހިމެނެ އެވެ.
