ރާއްޖެއަށް ބޭނުންވާ ޒަރޫރީ މުދަލުގެ ބާވަތްތައް އިންޑިއާއިން ރާއްޖެއަށް އެކްސްޕޯޓް ކުރުމަށް އިތުރު ދެ ބަނދަރެއް އެ ގައުމުން ހަމަޖައްސައިފި އެވެ.
ރާއްޖޭގައި ހުންނަ އިންޑިއާގެ ހައި ކޮމިޝަނުން ބުނި ގޮތުގައި އެ ބަނދަރަކީ ގުޖުރާތުގައި އޮންނަ ކަންޑްލާ ޕޯޓާއި އަންދްރާ ޕްރަދޭޝްގައި އޮންނަ ވިޝަޚަޕަތުނަމް ޕޯޓެވެ. މީގެ ކުރިން ރާއްޖެއަށް މި ބާވަތުގެ މުދާ އިންޑިއާއިން ބޭރުކުރެވެނީ ހަތަރު ޕޯޓަކުންނެވެ. އެއީ:
- މުންދްރާ ސީ ޕޯޓު (ގުޖުރާތު)
- ނާވާ ޝެވާ ސީ ޕޯޓު (މަހާރާޝްތުރާ/މުމްބާއީ)
- ޓޮޓިކޮރިން ސީ ޕޯޓު (ކެރެލާ)
- އައިސީޑީ ޓުގްލާލާކާބާދު (ނިއު ދިއްލީ)
އެ ކަން ހަމަޖައްސާފައި ރާއްޖެ އާއި އިންޑިއާއާ ދެމެދު އެ ގައުމުގެ ސަރުކާރުން ކަނޑައަޅާފައިވާ ފޮރިން ޓްރޭޑް ޕޮލިސީއަށް ބަދަލެއް ވެސް ގެނެސްފަ އެވެ.
އަވައްޓެރި އިންޑިއާއަކީ ރާއްޖެއަށް އެންމެ ގިނަ މުދާ އެތެރެކުރާ އެއް ގައުމެވެ. އެންމެ ފަހުގެ ތަފާސްހިސާބުތަކުން ވެސް ދައްކާ ގޮތުގައި ރާއްޖެއަށް އެންމެ ގިނައިން މުދާ އެތެރެކުރި ގައުމުތަކުގެ ތެރޭގައި އިންޑިއާ ހިމެނެ އެވެ.
އިންޑިއާއިން އެތެރެކުރާ މުދަލުގެ ބޮޑު އިންސައްތައަކީ ޒަރޫރީ މުދަލުގެ ބާވަތްތަކެވެ. މިއީ އިންޑިއާއިން ވެސް އެކްސްޕޯޓު ކޮންޓްރޯލް ކޮށްފައިވާ ބާވަތްތަކެވެ.
އޭގެ ތެރޭގައި ހިމެނެނީ ހަނޑޫ، ހަކުރު، ފުށް ފަދަ ކާޑުގެ ބާވަތްތަކާއި ފިޔާ، އަލުވި ފަދަ ތަކުރާރީގެ ބާވަތްތަކާއި ކުކުޅު ބިސް ހިމެނެ އެވެ. ދެން ހިމެނެނީ ކޮންސްޓްރަކްޝަނުގައި ބޭނުންކުރާ ހިލަ އާއި ހިލަވެއްޔެވެ. މި މުދާ އެންމެ ގިނައިން އެތެރެކުރަނީ އެސްޓީއޯއިންނެވެ.
ދިވެހި ސަރުކާރުން ވަނީ އިންޑިއާ ސަރުކާރުގައި މިނިވަން ވިޔަފާރީގެ އެއްބަސްވުމެއް ނުވަތަ ފްރީ ޓްރޭޑް އެގުރިމަންޓް (އެފްޓީއޭ) އެއް ގާއިމު ކުރުމުގެ ޝައުގުވެރިކަން ވެސް ފާޅުކޮށްފަ އެވެ.
