ރާއްޖޭގެ ދެވަނައަށް އެންމެ ބޮޑު ސިޔާސީ ޕާޓީ، ޕްރޮގްރެސިވް ޕާޓީ އޮފް ދަ މޯލްޑިވްސް (ޕީޕީއެމް) އުވައިލުމުގެ މަސައްކަތް ފަށައިގެން ކުރިއަށް ގެންދާ ކަމަށް އިއްޔެ ރިޕޯޓުކުރި އެވެ.
ޕީޕީއެމް އުވައިލުމުގެ މަސައްކަތް ފެށީ ރައީސް ޑރ. މުހައްމަދު މުއިއްޒު އާއި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ބޭނުންފުޅުވެގެން ކަމަށް، އެކަމާ ގުޅޭ ގޮތުން "އަދަދު" ނޫހާ ވާހަކަ ދެއްކި ޕީޕީއެމް/ޕީއެންސީގެ މެންބަރުން ވިދާޅުވި އެވެ.
"ރައީސް [މުއިއްޒު] މިކަން ކުރައްވަން ބޭނުންފުޅު ވާތީ، އަދި އެގޮތަށް އަޅުގަނޑުމެން ގާތު ވިދާޅުވެފައި ވާތީ، މިހާރު މި ދަނީ ޕީޕީއެމްގެ މެންބަރުން ޕީއެންސީއަށް ބަދަލުކުރުމުގެ މަސައްކަތް ކުރިއަށް ގެންދަމުން. އެއީ ފުރަތަމަ މަރުހަލާ އަކީ،" މެންބަރަކު ވިދާޅުވި އެވެ.
އޭނާ ވިދާޅުވީ ދާދި ފަހުން ޕީއެންސީގެ ޓީމުތައް ރަށްރަށް ކުރި ދަތުރުތަކުގައި، އެ ރަށްރަށުގައި ތިބި ޕީޕީއެމްގެ މެންބަރުން ޕީއެންސީ އަށް ބަދަލުކޮށްފައިވާ ކަމަށެވެ.
"މި މަރުހަލާ ނިމުމުން ރަސްމީކޮށް އުވައިލަން ހުށަހަޅާނީ."
އިލެކްޝަންސް ކޮމިޝަނުން އެންމެފަހުން އާންމު ކުރި މައުލޫމާތުގައި ވާގޮތުން މިއަހަރުގެ ޖުލައި 28، ގެ ނިޔަލަށް ޕީޕީއެމްގައި 34،827 މެންބަރުން އެބް ތިއްބެވެ. ވެރިކަން ކުރާ ޕީއެންސީގައި ތިބީ 28،704 މެންބަރުންނެވެ.
ޕީޕީއެމް އުވައިލުމަށް އެ ޕާޓީގެ ލީޑަޝިޕްގައި ތިއްބެވި ބައެއް ބޭފުޅުން ބޭނުންވާކަން އެތައް ފަހަރަކު ހާމަކޮށްފައިވާކަމަށް އަދަދު ނޫހާ ވާހަކަ ދެއްކެވި މެންބަރުން ވިދާޅުވި އެވެ. ޕީޕީއެމްގެ ލީޑަޝިޕުގެ ތެރެއިން އެކަމަށް އެންމެ ބޮޑަށް ތާއިދު ކުރައްވަނީ އެ ޕާޓީގެ ޑެޕިއުޓީ ލީޑަރުގެ މަގާމުގައި ހުންނެވި، ޑިފެންސް މިނިސްޓަރު ގައްސާން މައުމޫން ކަމަށްވެ އެވެ.
ޕީއެންސީއަކީ އެ ކޯލިޝަނުގެ ކުރީގެ ލީޑަރު، ރައީސް ޔާމީނަށް ޕީޕީއެމް ގެއްލިދާނެ ފަދަ ހާލަތެއް ކުރިމަތި ވެދާނެ ހާލަތެއްގައި ބެކަޕް ޕާޓީއެއްގެ ގޮތުގައި ބޭނުން ކުރުމަށް ޖެނުއަރީ 31، 2019 ގައި ރެޖިސްޓަރީ ކުރި ޕާޓީއެކެވެ.
މިދިޔަ އަހަރު އޮތް ރިޔާސީ އިންތިހާބުގައި ވާދަ ކުރުމަށް ޕީއެންސީގެ ޓިކެޓު ރައީސް މުއިއްޒުއަށް ދިނީ ވެސް ރައީސް ޔާމީނަށް އިންތިހާބުުގައި ވާދަނުކުރެވޭ ހާލަތުގައި ބެކަޕެއްގެ ގޮތުގަ އެވެ.
ވެރިކަމަށް ރައީސް މުއިއްޒު ވަޑައިގެންނެވިއިރު ވެސް އެ ކޯލިޝަނުގެ މައި ޕާޓީއަކީ ޕީޕީއެމް އެވެ. ރިޔާސީ ކެމްޕޭނުގައި ބޭނުންކުރީ އެ ޕާޓީގެ ކުލަ އެވެ. ކެމްޕޭނުގައި ބޮޑަށް ހަރަކާތްތެރިވީ ވެސް ޕީޕީއެމްގެ މެންބަރުންނެވެ.
ނަމަވެސް ރައީސް މުއިއްޒު ވެރިކަމުގެ ހުވާ ކުރެއްވިތާ ދުވަސްކޮޅެއް ވެސް ނުވަނީސް އުފެދުނު ހިޔާލުތަފާތުވުން ތަކުގައި ރައީސް ޔާމީން އެ ޕާޓީން ވަކިވަވަޑައިގެންނެވީ އެވެ. އެއާއެކު އެ ދެ ޕާޓީ ހިމެނޭ ކޯލިޝަންގެ ލީޑަރުކަން ރައީސް މުއިއްޒުއަށް ދިނެވެ.
ނިމިދިޔަ މަޖިލިސް އިންތިހާބުގައި ޕީއެންސީ/ޕީޕީއެމް ކޯލިޝަނުގެ ފަރާތުން ވާދަކުރި ހުރިހާ ކެންޑިޑޭޓުން ނުކުތީ ޕީއެންސީ ޓިކެޓުގަ އެވެ. ޕީޕީއެމްގެ ޓިކެޓުގައި މަޖިލީހަށް ވާދަކުރަން ބައެއް މެންބަރުން ބޭނުންވި ނަމަވެސް އެ ފުރުސަތެއް ނުދެއްވި އެވެ.
މިހާރު ހިނގަމުންދާ ރައްޔިތުންގެ މަޖިލީހުގައި ޕީއެންސީ ތަމްސީލުކުރާ 75 މެންބަރުން އެބަ ތިއްބެވެ
