ރައްޔިތުން ސިޔާސީ ނިޒާމާމެދު ފޫކޮށްލަން ރޭވުންތެރިކަމާއެކު މަސައްކަތް ކުރަމުންދާކަން ފާހަގަކުރެވިފައިވާ ކަމަށް ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވިދާޅުވެއްޖެ އެވެ.
އެމްޑީޕީން ބޭއްވި ހަރުގެ ޖަލްސާގައި މީކާއިލް ވިދާޅުވީ ސިޔާސީ މަސްރަހުގައި ފާޅުގައި ދޮގު ހަދައި އޮޅުވާލަމުންދަނީ އެކަންކަން ބަޔަކު އާންމު ކުރުމަށް ބޭނުންވާތީ ކަމަށެވެ. އެއާއެކު ސަރުކާރުން ވައްކަންކޮށް ނާޖާއިޒް ފައިދާ ނަގަން މަގު ފަހިވެގެންދާ ކަމަށް، ސަރުކާރަށް ހޫނު ބަހުގެ ހަމަލާތަކެއް އަމާޒުކުރައްވަމުން، އޭނާ ވިދާޅުވި އެވެ.
"މިހާ ލަދު ކުޑަ، މިހާ ހަޔާތް ކުޑަ ސަރުކާރެއް އަދި މިހާ ފާޅުގައި ދޮގު ހަދަމުން ދިވެހި ރައްޔިތުން މި ސިޔާސީ ނިޒާމާމެދު ފޫހިކުރަމުންދާ ސަރުކާރެއް އަޅުގަނޑުމެންނެއް އަދި މި ފެންވަރަކަށް ނުދެކެން،" މީކާއިލް ވިދާޅުވި އެވެ.
މީކާއިލް ވިދާޅުވީ އެންމެ ކަންބޮޑުވަނީ ރައީސް ޑރ. މުހައްމަދު މުއިއްޒުގެ ވެރިކަން ތާ އަބަދަށް ދެމި އޮންނަ ގޮތަށް މަސައްކަތް ކުރައްވާތީ ކަމަށާއި އެކަން ކުރަން މަސައްކަތް ކުރަނީ ސިޔާސީ ޕާޓީތައް އޮޕަރޭޓް ކުރާ ގޮތުގެ އިތުރުން ސިޔާސީ މަސްރަހާ މެދު އާންމުން ފޫހިކޮށްލައިގެން ކަމަށެވެ.
މީކައިލްގެ ވާހަކައިގައި އޭނާ ވަނީ ވާދަވެރި ދެ ޕާޓީ ކަމުގައިވާ ޕީއެންއެފް އާއި ޑިމޮކްރެޓްސް ނެތް ކަމަށް ފާހަގަކުރައްވާ، ސަލާމަތުގެ އައްސޭރިއަށް ގެންދެވޭނެ ހަމައެކަނި ޕާޓީއަކީ އެމްޑީޕީ ކަމަށް ވިދާޅުވެފަ އެވެ. އަދި ހަމައެކަނި އޮތް އިދިކޮޅު ޕާޓީއަކީ ވެސް އެމްޑީޕީ ކަމަށް އޭނާ ވިދާޅުވި އެވެ.
