މާލޭގައި ސައިކަލް ވިއްކާ ފިހާރައެއް ކަމުގައިވާ ކިންގްސްޓަން މޯލްޑިވްސްއަށް ފައިސާ ދެއްކި ގިނަ ބަޔަކަށް ސައިކަލް ނުލިބި އަށެއްކަ މަސް ވެއްޖެ ކަމަށާއި، ސައިކަލް ލިބޭނެ ދުވަހެއް ނޭނގޭ ކަމަށް، އެ މަޅީގައި ޖެހިފައިވާ ބައެއް މީހުން ބުނެފި އެވެ.
ސައިކަލް ގަންނަން ފައިސާ ދެއްކި ގިނަ ބަޔަކު މިއަދު މެންދުރު ފަހުން ފެށިގެން އިރު އޮއްސެންދެން ކިންގްސްޓަން ފިހާރަ ތެރޭގައި ތިބެ، ހިތްހަމަ ނުޖެހުން ފާޅުކުރި އެވެ. ކިންގްސްޓަން ފިހާރަ ހުންނަނީ ކެނެރީ ކޯޅީގަ އެވެ.
އެތަނުގައި ހުރި އަންހެނަކު ބުނީ އޭނާގެ ސައިކަލަކީ އުފަން ދުވަހުގެ ހަދިޔާއަކަށް ލިބުނު އެއްޗެއް ކަމަށެވެ.
"އެ ސައިކަލް ހޯދަން އުޅޭތާ އެތައް ދުވަހެއް. އެ ބާތުޑޭ ހަދިޔާ އަކަސް އަތުނުޖެހޭ، ޖެހޭނެ ދުވަހެއް ނޭނގޭ،" ފެންކަޅިވެފައި އިން އެ އަންހެން މީހާ ބުންޏެވެ.
އެހެން މީހަކު ބުނީ އޭނާ ސައިކަލަށް ފައިސާ ދެއްކީ ނަގުދު ފައިސާ ކަމަށާއި ނަމަވެސް އެ ލިބޭނެ ދުވަހެއް ނޭނގޭ ކަމަށެވެ.
"މިއޮތީ ސްލިޕް، ބުނި މިދިޔަ މާޗު މަހު ސައިކަލް ލިބޭނެ ކަމަށް ބުނީ. އެކަމަކު ވެސް ލިބުނު،" ނަސީދު ދައްކާލަމުން ބުންޏެވެ.
ކިންގްސްޓަންގެ އިސް އޮފިޝަލަކު ބުނީ ސައިކަލްތައް ހަވާލުނުކުރެވުނީ ޝިޕްމެންޓު ޑިލޭވެގެން ކަމަށާއި ނުދެވި ހުރި ސައިކަލްތަކުގެ އަދަދު 60 އަށް އަރާނެ ކަމަށެވެ. އެ ތަކެތީގެ ވެރިންނަށް ސައިކަލް ފޯރުކޮށް ދިނުމަށް ނޫނީ ފައިސާ ދޫކުރަން ވިސްނަމުންދާ ކަމަށް ވެސް އޭނާ ބުންޏެވެ.
