ސަރުކާރުގެ ހިއްސާވާ ގިނަ ކުންފުނިތަކުން މުވައްޒަފުންނަށް އަދިވެސް މުސާރަ ނުދޭކަން އެނގިއްޖެ އެވެ.
"އަދަދު" އަށް އެނގިފައިވާ ގޮތުގައި ފެނަކަ އާއި އެމްޓީސީސީގެ އިތުރުން ރޯޑް ޑިވެލޮޕްމެންޓު ކޯޕަރޭޝަނުގެ މުވައްޒަފުންނަށް ވެސް އަދި މުސާރަ ދީފައެއް ނުވެ އެވެ. އެ ކުންފުނިތަކުގައި ވަޒީފާ އަދާ ކުރާ ބައެއް މުވައްޒަފުން ވަނީ އެކަން ކަށަވަރު ކޮށްދީފަ އެވެ.
ސަރުކާރު ހިއްސާވާ ގިނަ ކުންފުނިތަކުގައި މުސާރަ ހަދަނީ މަހުގެ އެކަކުން އެކަކަށެވެ. އެލެވެންސްތައް ހަދަނީ 20 އިން 20 އަށެވެ.
ސަރުކާރު ހިއްސާވާ ކުންފުނިތަކުގެ މުވައްޒަފުންނަށް އާންމުކޮށް ކޮންމެ މަހެއްގެ މުސާރަ ވެސް މަަހުގެ 27 ނުވަތަ 28 ހިސާބުގައި ލިބޭ ކަމަށް މި ނޫހަށް މައުލޫމާތު ދިން މުވައްޒަފުން ބުންޏެވެ.
ސަރުކާރު ކުންފުނިތަކުގެ މުވައްޒަފުންނަށް އަދި މުސާރަ ދީފައި ނުވާއިރު، ގައުމުގެ މާލީ ހާލަތު ވަރަށް ގޯސްވެފައިވާ ކަމަށް ބުނެ ސަރުކާރުން ވަނީ ހަރަދު ކުޑަ ކުރަން މިނިސްޓަރީތަކާއި ކުންފުނިތަކަށް އަންގައިފަ އެވެ. ނަމަވެސް ހަރަދު ކުޑަ ކުރުމުގެ ގޮތުން އެއްވެސް ފިޔަވަޅެއް އެޅިކަން މިހައިތަނަށް އެނގިފައެއް ނުވެ އެވެ.
ދައުލަތުގެ މާލީ ހާލަތު ގޯސްވެފައިވާ ކަމަށް ސަރުކާރުން ބުނާއިރު ސަރުކާރުގެ ސިޔާސީ މަގާމުތަކަށް 2000 އަށްވުރެ ގިނަ މުވައްޒަފުން އައްޔަނު ކޮށްފައިވާކަން "އަދަދު" އަށް އެނގިފައިވެ އެވެ.
ނަމަވެސް ސިޔާސީ މުވައްޒަފުންގެ އަދަދު ސަރުކާރުން ރަސްމީކޮށް ހާމަ ނުކުރާތީ ސީދާ އަދަދު ކަށަވަރެއް ނުވެ އެވެ.
