އަންނަ ސެޕްޓެމްބަރުގައި ބާއްވާ ސްރީ ލަންކާގެ ރިޔާސީ އިންތިހާބުގައި އެ ގައުމުގެ މިހާރުގެ ރައީސް ރަނިލް ވިކްރަމްސިންހުއަށް ތާއީދު ނުކުރައްވައި، މަހިންދަ ރާޖަޕަކްސަގެ އެސްއެލްޕީޕީ ޕާޓީން ވަކިން ކެންޑިޑޭޓަކު ނެރުމަށް ނިންމައިފި އެވެ.
ލަންކާގެ އިންތިހާބުގައި ވާދަކުރުމަށް ދެ ދުވަސް ކުރިން އިއުލާން ކުރުމާއެކު އެންމެ ފުރަތަމަ އެކަމަށް ޝައުގުވެރިކަން ފާޅުކުރައވްައި ފޯމް ހުށަހެޅުއްވީ ރަނިލް އެވެ. އެއާއެކު އެ ދުވަހު އެމަނިކުފާނުގެ ކެންޑިޑޭންސީ ލަންކާގެ އިލެކްޝަން ކޮމިޝަނުން ވަނީ ބަލައިގެންފަ އެވެ.
ނޫސްވެރިންނާ ބައްދަލުކުރައްވައި އެސްއެލްޕީޕީގެ ޖެނެރަލް ސެކެޓްރީ ސަގަރަ ކަރިޔަވަސަމް ވިދާޅުވީ އިންތިހާބުގައި ރަނިލްއަށް ތާއީދުނުކޮށް ޕާޓީން ވަކިން ކެންޑިޑޭޓެއް ނެރުމަށް މެޖޯރިޓީ މެންބަރުން ނިންމާފައިވާ ކަމަށާއި ބައެއް މެންބަރުން ރަނިލްއަށް ތާއީދު ކުރުމަށް ވެސް ނިންމި ކަމަށެވެ.
"ޕާޓީގެ ނިންމުމާ ދެކޮޅު ހަދައި، އެ ނިންމުމާ ދެކޮޅަށް ޕާޓީގެ މެންބަރަކު މަސައްކަތް ކޮށްފިނަމަ އޮންނަ އުސޫލުގެ ތެރެއިން ފިޔަވަޅު އަޅާނެ،" ސަގަރަ ވިދާޅުވި އެވެ.
އިންތިހާބުގައި އެސްއެލްޕީޕީގެ ފަރާތުން ނެރޭނެ ކެންޑިޑޭޓެއް ނިންމާނީ ޕާޓީގައި އިތުރަށް މަޝްވަރާ ކުރުމަށްފަހު އެވެ. އެގޮތުން ކުރިމަތިލުމަށް ދީފައިވާ އޯގަސްޓް 15، ގެ މުއްދަތުގެ ކުރިން އެ ޕާޓީން ނެރޭނެ ކެންޑިޑޭޓެއްގެ ނަން އިލެކްޝަން ކޮމިޝަނަށް ހުށަހަޅަން ޖެހޭނެ އެވެ.
ލަންކާގެ ވެރިކަމާ 2022 ގައި ރަނިލް ހަވާލުވެވަޑައިގެންނެވީ އެ ގައުމުގެ ރައީސް ގޮޓަބަޔާ ރާޖަޕަކްސަ، ލަންކާއަށް ދިމާވެފައިވާ އިގްތިސާދީ ހާލަތާ ގުޅިގެން ގައުމު ދޫކޮށް ފިއްލަވައި މަގާމުން އިސްތިއުފާ ދެއްވުމާ ގުޅިގެންނެވެ.
ސެޕްޓެމްބަރު 21، ގައި އޮންނަ އިންތިހާބުގައި ލަންކާގެ އާބާދީގެ 22 މިލިއަން މީހުންގެ ތެރެއިން 17 މިލިއަނެއްހާ މީހުންނަށް ވޯޓުލުމުގެ ހައްގު ލިބޭނެ އެވެ.
