މަރުކަޒީ ބޭންކް, މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މައި ސަރުކާރު ބޭނުންވުމާއެކު ފައިސާ ޗާޕުކުރުމަކީ ގަބޫލުކުރާ އުސޫލެއް ނޫން ކަމަށާއި ރައްޔިތުންނާއި ގައުމަށް ގެއްލުންވާ ފަދަ ކަމެއް ސަރުކާރުން އެމްއެމްއޭ މެދުވެރިކޮށް ކުރާނަމަ އިސްތިއުފާ ވެސް ދިނުމުގެ ހިތްވަރު ހުންނާނެ ކަމަށް ގަވަރުނަރުގެ މަގާމަށް އައްޔަނުކުރާ ޑރ. އަހްމަދު މުނައްވަރު ވިދާޅުވެއްޖެ އެވެ.
ގަވަރުނަރުގެ މަގާމުން އަލީ ހާޝިމް ވަކިކުރުމަށް ވެސް އެ މަގާމަށް މުނައްވަރު އައްޔަނު ކުރުމަށް ލަފާ ހޯދުމަށް މަޖިލީހަށް ރައީސް ޑރ. މުހައްމަދު މުއިއްޒު ވަނީ ހުށަހަޅުއްވާފަ އެވެ. އެ މައްސަލަ މާލިއްޔަތު ކޮމިޓީން ދިރާސާކުރަމުންދާއިރު މިއަދު މުނައްވަރުއާ ވަނީ އިންޓަވިއުކޮށްފަ އެވެ.
"ސަރުކާރުން ދިވެހި ރައްޔިތުންނަށް ފައިދާ ހުރި ކަމެއް ކުރާނަމަ އެކަމަކަށް ހުރަހެއް ނާޅާނަން. އެކަމަކު ރައްޔިތުންނަށް އަދި ގައުމަށް ވެސް ގެއްލުން ވާކަމެއް ވިއްޔާ އެކަމުގެ މަޝްވަރާ ވެސް އަދި އެކަމުގައި ނުރުހުން ވެސް ފާޅުކުރާނަން, އަދި އިސްތިއުފާ ދޭން ޖެހިއްޖިއްޔާ އިސްތިއުފާ ދޭނަން," އެއީ މިނިވަން މުއައްސަސާގެ ގާނޫނީ ވާޖިބެއް ކަމަށް މުނައްވަރު ވިދާޅުވި އެވެ.
"އަޅުގަނޑު ގަބޫލުކުރާ އުސޫލުތަކެއް އެބަހުރި. އުސޫލުތަކުގައި ހިފަހައްޓާނަން. އަޅުގަނޑު ގަބޫލުނުކުރާ އެއް އުސޫލެއް އެއީ އެމްއެމްއޭއިން ކޮންމެ ހާލަތެއްގައި ސަރުކާރު ބުނާ އިރަކަށް ފައިސާ ޖަހަން ޖެހޭ ކަމަށް."
ގާނޫނީ ތަރަހައިގެ ތެރެއިން މެނުވީ ފައިސާ ނުޖެހޭނެ ކަމަށާއި އޭނާގެ ޓްރެކް ރެކޯޑަށް ބެލި ނަމަވެސް ހިތްވަރު ހުންނާނެކަން ފެންނާނެ ކަމަށް މުނައްވަރު ވިދާޅުވި އެވެ. އިސްތިއުފާ ދިނުމުގެ ހިތްވަރު ހުންނާނެ ކަމުގެ ޔަގީންކަން އޭނާ ކޮމިޓީއަށް ދެއްވި އެވެ.
މިއަދުގެ އިންޓަވިއުގައި މުނައްވަރު ވަނީ އޭނާ އެމްއެމްއޭގެ ގަވަރުނަރުކަމަށް އައްޔަނުކޮށްފި ނަމަ ނިޒާމަށް ގެންނަން ބޭނުންވާ ބައެއް އިސްލާހުތަކާ ގުޅޭގޮތުން ވެސް ވާހަކަ ދައްކަވާފަ އެވެ. މައިގަނޑު ގޮތެއްގައި އޭނާ ފާހަގަކުރެއްވީ ވިޔަފާރިއަށް ފަހިކޮށް ގާނޫނުތައް ބަދަލުކޮށް ރާއްޖޭގެ ބޭންކިން ނިޒާމުގައި ދައުރުވާ ފައިސާގެ އަދަދު އިތުރުކުރަން ޖެހޭ ކަމަށެވެ.
މުނައްވަރަކީ ކުރީގެ ރައީސް އަބްދުالله ޔާމީންގެ ވެރިކަމުގައި ފިނޭންސް މިނިސްޓަރުކަން ކުރެއްވި ބޭފުޅެކެވެ. އޭނާ އެ މަގާމަށް އައްޔަނުކުރީ ޖޫން 22, 2016 ގަ އެވެ. ޔާމީންގެ ވެރިކަން ނިމެންދެން އެ މަގާމު އޭނާ ފުރުއްވި އެވެ.
ފިނޭންސް މިނިސްޓަރުގެ އެޑްވައިޒަަރުގެ މަގާމަށް މިނިސްޓަރެއްގެ ފެންވަރުގައި އޭނާ އައްޔަނުކުރީ ޑިސެމްބަރު 12, 2023 ގަ އެވެ.
