މިދިޔަ އަހަރުގެ ފުރަތަމަ ހަ މަސްދުވަހާ އަޅައިބަލާއިރު މިއަހަރު ސިޓީ ކައުންސިލުގެ ހަރަދުން 20 މިލިއަން ރުފިޔާ ސަލާމަތް ކުރެވި ހިދުމަތްތައް ކުރިއަށްވުރެ ހަރުދަނާ ކުރެވިފައިވާ ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.
މާލެ ސިޓީގެ ރައްޔިތުންނާ ބައްދަލު ކުރުމަށް މިރޭ ލޮނުޒިޔާރަތް ޕާކުގައި ބޭއްވި ޖަލްސާގައި ވާހަކަ ދައްކަވަމުން އާޒިމް ވިދާޅުވީ މާލެ ސިޓީގެ މޭޔަރު ކަމުގެ ޒިންމާ އޭނާއަށް މަތި ކުރެވުނު ދުވަހުން ފެށިގެން ސިޓީ ކައުންސިލު ހިންގުން ހަރުދަނާ ކުރުމަށް ގިނަ މަސައްކަތްތައް ކޮށްފައި ވާނެ ކަމަށެވެ. އެގޮތުން ފައިސާ ބެލެހެއްޓުމުގެ މަސައްކަތް ކުރިއަށްވުރެ ހަރުދަނާ ކޮށްފައިވާ ކަމަށް އާޒިމް ވިދާޅުވި އެވެ.
"ވޭތުވެ ދިޔަ އަހަރުގެ ފުރަތަމަ ހަ މަސް ދުވަހާއި މި އަހަރު ގެ ފުރަތަމަ ހަ މަސް ދުވަހު ހަރަދުއަޅައި ބަލާއިރު، ސިޓީ ކައުންސިލު ގެ ހަރަދުން ވަނީ 20 މިލިއަން ރުފިޔާ ސަލާމަތް ކުރެވިފަ،" އާޒިމް ވިދާޅުވި އެވެ.
އެ އަދަދު ކުޑަކުރީ ސިޓީ ކައުންސިލު ހިންގުމަށް ކުރަމުން އައި ހަރަދުގެ ތެރެއިން 11 މިލިއަން ރުފިޔާ އާއި އެ ކައުންސިލުގެ ކެޕިޓަލް ހަރަދުން ނުވަ މިލިއަން ރުފިޔާ ކުޑަކޮށްގެން ކަމަށް އާޒިމް ވިދާޅުވި އެވެ.
އާޒިމް ވިދާޅުވީ ހަރަދު ކުޑަކުރެވުނީ ސިޓީ ކައުންސިލުގެ މެންބަރުންނާއި މުވައްޒަފުންގެ ހަރުދަނާ ކަމުގެ ސަބަބުން ކަމަށެވެ. އަދި އެކަމަށްޓަކައި ކައުންސިލަރުންނަށާއި ސިޓީ ކައުންސިލުގެ މުވައްޒަފުންނަށް އާޒިމް ޝުކުރު އަދާ ކުރެއްވި އެވެ.
މާލެ ސިޓީ ކައުންސިލުގެ ހަރަދުތައް ކުޑަވެގެންދިޔަ އިރު އެ ކައުންސިލުން ދެ ހިދުމަތުގެ ފެންވަރު ވެސް އިތުރަށް ހަރުދަނާ ވެގެންދިޔަ ކަމަށް އާޒިމް ވިދާޅުވި އެވެ.
"އަޅުގަނޑުގެ ކޯޕަރޭޓު އެކްސްޕީރިއެންސް ބޭނުން ކޮށްގެން މާލެ ސިޓީ ކައުންސިލަށް ހިދުމަތް ކޮށްދިނުން އެއީ އަޅުގަނޑުގެ ވައުދެއް، އެ ވައުދުގެ ތެރެއިން އަޅުގަނޑު މި މަސައްކަތްތައް ކުރަނީ، އިރާދަކުރެއްވިއްޔާ ހަމަ ކުރިއަށް އޮތް ތަނުގައި މީގެ އެތައް ކަމެއް ފެނިގެން ދާނެ ކަމުގެ ޔަގީންކަން ތިބޭފުޅުންނަށް އަރުވަން،" އާޒިމް ވިދާޅުވި އެވެ.
ސިޓީ ކައުންސިލުން ހިދުމަތް ހޯދުމުގައި މިހާރު ވަރަށް ބައިވަރު ދަތިތައް އެބަހުރިކަން ފާހަގަކުރައްވައި އާޒިމް ވިދާޅުވީ އެއީ ސިޓީ ކައުންސިލެއްގެ ހިދުމަތް ލިބެން ޖެހޭނެ ގޮތް ކަމަށް ގަބޫލު ނުކުރައްވާ ކަމަށެވެ.
މާލެ ސިޓީ ކައުންސިލުން ހިދުމަތް ހޯދުމުގައި މިހާރު ހުރި ލަސްކަމާއި ހިދުމަތް ހޯދުމުގައި އަރާ އޮޅުންތަކަށް ހައްލެއް ހޯދުމުގެ މަސައްކަތް ކުރައްވަމުން ގެންދަވާ ކަމަށް ވެސް އާޒިމް ވިދާޅުވި އެވެ.
"އަޅުގަނޑުމެންގެ އަމާޒަކީ ރައްޔިތަކު ހިދުމަތެއް ހޯދަން އައިސްގެން އެ ހިދުމަތް މީހަކާ ނުގުޅައި މީހަކު ނުފެނި ގާތްގަނޑަކަށް ލިބޭނެ ގޮތަށް ކަންތައްތައް ފަހިވެގެންދިޔުން، މިއީ ހިދުމަތެއް ދިނުމަކީ، މި އަމާޒަށް ވާސިލުވުމަށް އަޅުގަނޑުމެން ރެޔާއި ދުވާލު އެބަ މަަސައްކަތް ކުރަން،" އާޒިމް ވިދާޅުވި އެވެ.
އެގޮތުން މިއަހަރު ނިމުމުގެ ކުރިން ސިޓީ ކައުންސިލުގެ މަސައްކަތްތައް އޮޓޮމޭޓު ކުރުމުގެ މަސައްކަތް ކުރައްވަމުން ގެންދަވާ ކަމަށް އޭނާ ވިދާޅުވި އެވެ.
މިރޭގެ ޖަލްސާގައި އާޒިމް ވަނީ މާލޭގެ ބޯހިޔާވަހިކަމުގެ މައްސަލައަށް އަލިއަޅުއްވައިލައްވައި އެ މައްސަލަ ހައްލު ކުރުމަށް މިދިޔަ ސަރުކާރުން ކުރި މަސައްކަތަށް ޝުކުރު އަދާ ކުރައްވައިފަ އެވެ. އަދި މާލޭގެ ރައްޔިތުންނަށް ބޯހިޔާވަހިކަން ހޯދައިދިނުމަށް ކުރާ މަސައްކަތުގައި ސާބިތުވެ ހުންނަވާނެ ކަމުގެ ޔަގީންކަން ވެސް އާޒިމް ދެއްވި އެވެ.
އޭގެއިތުރުން މާލޭގައި ދިރިއުޅޭ ފަރާތްތަކަށް ބުޅަލުގެ ފަރާތުން ކުރިމަތިވާ އުނދަގޫތަކަށް ހައްލު ހޯދައިދިނުމަށް ހަދަން ފެށި ކެޓް ޝެލްޓާގެ މަސައްކަތް 70 އިންސައްތަ ނިމިފައިވާކަން އާޒިމް ފާހަގަކުރެއްވި އެވެ.
އަދި މާލޭގެ ޕާކިން މައްސަލައަށް ހައްލެއް ހޯދުމަށްޓަކައި ހުޅުމާލޭގެ ފުރަތަމަ، ދެވަނަ އަދި ތިންވަނަ ފިޔަވަހީގައި ޕާކިންއަށް ހާއްސަކޮށް ޖާގަތަކެއް ކަނޑައަޅައިދިނުމަށް ސަރުކާރަށް އާޒިމް ގޮވައިލެއްވި އެވެ. މިހާރު ހިއްކާ ނިމިފައިވާ ގިރާވަރާއި ގުޅީފަޅުގެ ޕްލޭންގައި ވެސް ޕާކިންއަށް ހާއްސަ ޖާގަ ކަނޑައެޅުމަށް އާޒިމް ސަރުކާރަށް ގޮވައިލެއްވި އެވެ.
މިރޭގެ ބައްދަލުވުމަކީ މާލެ ސިޓީ ކައުންސިލުން ރައްޔިތުންނާ އެކު ބޭއްވި ދެވަނަ ބައްދަލުވުމެވެ. ރައްޔިތުންގެ ބައްދަލުވުންތަކަކީ ލާމަރުކަޒީ ގާނޫނުން ކޮންމެ އަހަރު ވެސް ބޭއްވުން ލާޒިމު ކުރާ ބައްދަލުވުންތަކެކެވެ.
