މި ސަރުކާރުން ކުރި ކަންތައްތަކުގެ ސަބަބުން ގައުމުގެ އިގުތިސާދަށް ލިބުނު ހީނަރުކަމުން ރެކި ނުގަނެވޭނެ ކަމަށާއި އެކަމުގެ ފުރިހަމަ ޒިންމާ މި ސަރުކާރުން ނަގަން ޖެހޭނެ ކަމަށް ހަނިމާދޫ ދާއިރާގެ އެމްޑީޕީ މެންބަރު، އަބްދުލް ގަފޫރު މޫސާ ވިދާޅުވެއްޖެ އެވެ.
އެމްޑީޕީ ޕާލިމެންޓަރީ ގުރޫޕުން މިއަދު މަޖިލީހުގެ އިދާރާގައި ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން ގަފޫރު ވިދާޅުވީ މިދިޔަ އަހަރު ވެރިކަން ބަދަލުވިއިރު ގައުމުގެ އިގުތިސާދު އޮންނާނީ ވަރަށް ރަނގަޅު ހާލަތުގައި ކަމަށެވެ.
"ވެރިކަން ބަދަލުވެގެންދިޔައިރު ރާއްޖޭގެ އިގުތިސާދު ހަމަ ވަރަށް ރަނގަޅަށް އޮންނާނީ، ކުރެވޭ ކަންތައްތަކެއްގެ ސަބަބުން އިގުތިސާދަށް ލިބޭ ހީނަރުކަމަކީ އެކަމުގެ ޒިންމާ މި ސަރުކާރުން އުފުލަން ޖެހޭނެ ކަންތައްތައް، އެއީކީ އެކަމުން ބަރީއަވެވޭނެ ކަންތައްތަކެއް ނޫން،" ގަފޫރު ވިދާޅުވި އެވެ.
އަވަށްޓެރި އިންޑިއާއިން ފާއިތުވި މުއްދަތުގައި ރާއްޖެއަށް އައި ފަތުރުވެރިންގެ އަދަދު މިހާރު ބޮޑުތަނުން މަދުވެފައިވާކަމަށް ވެސް ގަފޫރު ވިދާޅުވި އެވެ. އެކަމުގެ ސަބަބުން އެކަނިވެސް ރާއްޖެގެ އިގުތިސާދަށް ބޮޑު ގެއްލުމެއް ލިބިފައިވާކަން އޭނާ ފާހަގަކުރެއްވި އެވެ.
"ހަމައެކަނި އިންޑިއާ މާކެޓުން ރާއްޖެއަށް އަންނަންޖެހޭ 48000 ޓުއަރިސްޓުން އައުން މަދުވެއްޖެ، ނާދެ އޭގެ މާނައަކީ ޓޫރިޒަމް އިންޑަސްޓަރީއަށް ވަންނަން އޮތް އެއް ބިލިއަން ޑޮލަރު އުނިވެގެން އެދަނީ، ދިޔައީމާ ދައުލަތަށް ޓެކްސްއާއި އަދި ރައްޔިތުންނަށް އެހެނިހެން ގޮތްގޮތުން ލިބެންޖެހޭ މަންފާ ލިބިގެނެއް ނުދާނެ،" ގަފޫރު ވިދާޅުވި އެވެ.
އެ ބައްދަލުވުމުގައި އެމްޑީޕީ ޕީޖީ ގުރޫޕުގެ ލީޑަރު، އަދި ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވީ ގައުމުގެ އިގުތިސާދަށް ފަތުރުވެރިކަމުން ލިބޭ އާމްދަނީ ދަށަށް ދާން ފެށީ އިންޑިއާގެ ބޮޑުވަޒީރު ނަރެންދުރަ މޯދީއަށް މި ސަރުކާރުގެ އިސް މަގާމުތަކުގައި ތިބި ބަޔަކު ފުރައްސާރަ ކުރަން ފެށުމުން ކަމަށެވެ.
"އަދިވެސް އަދިވެސް އެކަމަށް އެންމެ ރަނގަޅު ހައްލެއް ހޯދައިނުދެވޭކަން އަޅުގަނޑުމެންނަށް މި ފާހަގަވަނީ، މިއީ ހަމައެކަނި އަޅުގަނޑުމެން ދައްކާ ވާހަކައެއް ނޫން، މިއީ މުޅި ގައުމުގެ ހުރިހާ ރައްޔިތުން ދައްކާ ވާހަކަ، ވިޔަފާރިވެރިން ދައްކާ ވާހަކަ،މެދުފަންތީގެ އަދި ރިސޯޓު އޯނަރުންނަށް ވިޔަސް ބޮޑެތި ވިޔަފާރިވެރިންނަށް ވިޔަސް، އެ ބޭފުޅުން ވެސް ދައްކާ ވާހަކަ،" ނާޒިލް ވިދާޅުވި އެވެ.
ހަގީގަތަކީ ދައުލަތުގެ މާލިއްޔާ މެނޭޖުކުރަން މިހާރު ސަރުކާރަށް ނޭނގުން ކަމަށް ވެސް ނާޒިލް ވިދާޅުވި އެވެ.
ގަފޫރު ވިދާޅުވީ ދައުލަތުގައި ފައިސާ ނެތް ކަމަށް ބުނާއިރު، ސަރުކާރުގެ އަމަލުތަކުން އެކަން ނުފެންނަ ކަމަށެވެ.
އެގޮތުން މީގެ ދެ އަހަރުފަހުން އޮންނަ ކައުންސިލު އިންތިހާބަށް ގެންނަން ބޭނުންވާ ބަދަލެއްގެ މަޝްވަރާ ކުރުމަށް މިހާރު ވެސް ހުރިހާ ކައުންސިލުތަކެއްގެ ބޭފުޅުން މާލެއަށް ގެނެސްގެން މަޝްވަރާތަކެއް ކުރުމަކީ މިވަގުތަށް ކޮންމެހެން ކުރަން ނުޖެހޭ ކަމެއްކަން ގަފޫރު ފާހަގަކުރެއްވި އެވެ.
"އެއްގޮތަކަށް ވެސް އަޅުގަނޑުމެންނަކަށް ނުފެނޭ ދެކޮޅުޖެހޭ މަންޒަރެއް ކަންކަން ކުރާއިރަކު، އެއީ އެވަގުތަކަށް ބޭނުންވާ ކަމެއްތޯ އެ ކުރެވެނީކީއެއް ސާފުވެގެނެއް ނޫން ކަންކަން ހިނގަމުން އެދަނީކީއެއް، އެހެެންވީމާ ހަރަދު ކުޑަކުރާ ވާހަކަ ދައްކާއިރުގައި ހަރަދު ކުޑަކުރަން ރައްޔިތުންނަށް ކޮށްދޭ ކަންކަމުގައި އަތްލުމުގެ ކުރިން ސަރުކާރުން ހުރި ހަރަދުތައް ކުޑަކުރާނެ މެކޭނިޒަމްތަކެއް ގާއިމުކޮށް އެކަން ކޮށްގެން އަޅުގަނޑުމެން ޖެހޭނީ ރައްޔިތުންނަށް ދޭ ހިދުމަތްތަކުގައި އަތްލަން،" ގަފޫރު ވިދާޅުވި އެވެ.
ސަރުކާރުން އަމަލު ކުރަމުންދާ ގޮތަށް އެމްޑީޕީން ފާޑުކިޔާފައިވާއިރު، ސަރުކާރުގެ ސިޔާސީ މަގާމުތަކަށް އިންތިހާއަށް މީހުން އައްޔަނު ކުރަމުންދާ މައްސަލަ ވެސް ވަނީ ފެންމަތިވެ މީހުންގެ ފާޑުކިޔުން އަމާޒުވެފަ އެވެ.
ސަރުކާރުގެ ސިޔާސީ މުވައްޒަފުންގެ އަދަދު އަދި ހާމަ ނުކުރާތާ ސީދާ އަދަދެއް ނޭނގެ އެވެ. ނަމަވެސް އެކި މަސްދަރުތަކުން "އަދަދު" އަށް ލިބިފައިވާ މައުލޫމާތު އެނގޭ ގޮތުގައި ސަރުކާރުގެ ސިޔާސީ މަގާމުތަކުގައި 2000 އަށްވުރެ ގިނަ މީހުން މިހާރު ވެސް އެބަތިއްބެވެ.
