ސަރުކާރުގެ ސިޔާސަތު އެކުލަވާލުމަށް ހުރަސްއެޅޭ ކަމަށް ބުނެ އެޑިއުކޭޝަން މިނިސްޓްރީގައި ތިބި ސިޔާސީ މުވައްޒަފުންގެ އަދަދު ސިއްރުކުރަން އެ މިނިސްޓްރީން ނިންމައިފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" އިން ވާނީ، ނޮވެމްބަރު 17, 2023 އިން މެއި 1, 2024 އާ ހަމައަށް އެ މިނިސްޓްރީއަށް އައްޔަން ކުރި ސިޔާސީ މުވައްޒަފުންގެ އަދަދު ހޯދުމަށް އެދިފަ އެވެ.
އެ މިނިސްޓްރީން މި ރިކުއެސްޓަށް ފުރަތަމަ ޖަވާބެއް ދިނީ މެއި 9، ގަ އެވެ. އެފަހަރު އެޑިއުކޭޝަނުން ބުނީ އެ މައުލޫމާތު ރައީސް އޮފީހުގެ ވެބްސައިޓުން ލިބެން ހުންނާނެ ކަމަށެވެ.
ނަމަވެސް ރައީސް އޮފީހުގެ ވެބްސައިޓުގެ ސިޔާސީ މުވައްޒަފުންގެ މައުލޫމާތު އަދާހަމަ ނުވުމާއި، އެ ސައިޓުގައި އާންމުކުރަނީ ޑެޕިއުޓީ މިނިސްޓަރުން ފެށިގެން މަތީ މަގާމުތަކުގެ މައުލޫމާތު ކަމުން މި ނޫހުން ވާނީ އެ ޖަވާބު މުރާޖައާ ކުރުމަށް ފޮނުވާފަ އެވެ. އެ ހުށަހެޅުމަށް ޖަވާބެއް ނުލިބުމުން އިންފޮމޭޝަން ކޮމިޝަނަރު ގެ އޮފީސް (އައިކޮމް) އަށް މައްސަލަ ވާނީ ހުށަހަޅާފަ އެވެ.
އެ މައްސަލާގެ އަޑުއެހުމެއް ތާވަލުކުރުމާއެކު ޖުލައި 18، ގައި އެޑިއުކޭޝަން މިނިސްޓްރީން ވަނީ ދެވަނަ ޖަވާބެއް ދީފަ އެވެ.
އެ ޖަވާބުގައި ބުނެފައިވަނީ މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ "31 ވަނަ މާއްދާގެ (1) ވަނަ ނަންބަރަށް ރިއާޔަތްކޮށް އެދިލައްވާފައިވާ މައުލޫމާތު ދެވެން ނެތް," ކަމަށެވެ.
އެޑިއުކޭޝަން މިނިސްޓްރީން ސިޔާސީ މުވައްޒަފުންގެ އަދަދު ސިއްރުކޮށް ދީފައިވާ ޖަވާބު
މިނިސްޓްރީން ރިއާޔަތްކުރި މާއްދާގެ ނަންބަރަކީ ނަތީޖާ ހާސިލުކުރެވޭ ގޮތެއްގައި، ސަރުކާރުގެ ސިޔާސަތު އެކުލަވާލުމަށް ހުރަސްއެޅޭފަދަ މައުލޫމާތެއް ސިއްރުކުމުގެ ބާރު ލިބިދޭ ނަންބަރެވެ.
އެޑިއުކޭޝަނުން ސިޔާސީ މުވައްޒަފުންގެ އަދަދު ސިއްރުކޮށްފައިވާއިރު މި ސަރުކާރުގައި ހިމެނޭ 22 ވުޒާރާގެ ތެރެއިން 13 ވުޒާރާއަކުން ވަނީ އެ އަދަދުތައް މި ނޫހާ ހިއްސާކޮށްފަ އެވެ. އެޑިއުކޭޝަން ފިޔަވައި ބާކީ މިނިސްޓްރީތަކުން ހުށަހެޅުމަށް ޖަވާބުދީފައި ނުވެ އެވެ.
މި ސަރުކާރު ވެރިކަމަށް އައީ ސިޔާސި މުވައްޒަފުންގެ އަދަދު 700 އަށްވުރެ ގިނަ ނުކުރާނެ ކަމަށް ވައުދުވަމުންނެވެ. އެކި މަސްދަރުތަކުން ހޯދި މައުލޫމާތުތަކުން އެނގޭ ގޮތުގައި މި އަަދަދު މިހާރު 2,000 އާ ގާތްކުރާނެ އެވެ.
ނަމަވެސް ސަރުކާރުން ދަނީ ތަކުރާރުކޮށް ސިޔާސީ މުވައްޒަފުންގެ އަދަދު ހާމަކުރުން ފަސްކޮށް އެކަމާ ދެކޮޅު ހަދަމުންނެވެ. އެކަން ކުރުމަށް ގޮވާލާ މިދިޔަ ހަފުތާ އިދިކޮޅުން މަޖިލީހަށް ވެއްދި ކުއްލި މައްސަލަ ވެސް ޕީއެންސީގެ ސުޕަ މެޖޯރިޓީން ވަނީ ބޭރުކޮށްލާފަ އެވެ.
