ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ ޕްރޮކިއުމަންޓް އެންޑް ލޮޖިސްޓިކް ހެޑްގެ ގޮތުގައި ހުރެ ރިޝްވަތު ނެގި ކަމަށް އިއުތިރާފުވުމުން، ބޮޑު އަދަދަކުން ޖޫރިމަނާކޮށް ދައުލަތަށް ލިބުނު ގެއްލުމުގެ ބަދަލު ދިނުމަށް ކްރިމިނަލް ކޯޓުން ހުކުމްކޮށްފި އެވެ.
މި މައްސަލާގައި ހ. ސަމާހިލް، ހައިލަމް މުހައްމަދުގެ މައްޗަށް ދައުލަތުން އުފުލާފައިވަނީ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ތިން ދައުވާއަކާއި ރިޝްވަތު ހިފުމުގެ ދައުވާއެކެވެ.
ދައުވާތަކުގައި ބުނާ ގޮތުން އޭނާ ވަނީ ޑީޖޭއޭން ހިންގި ޕްރޮކިއުމަންޓްތަކަށް މީނާއާ ގުޅުން އޮތް ހަތަރު ކުންފުންޏަކަށް އެކަނި ކޯޓޭޝަން ހޯދައިފަ އެވެ. އެ ވިޔަފާރިތައް ހިންގަނީ އެއް ބަޔަކު ކަން އެނގި ހުރެ، ޑީޖޭއޭއަށް ބޭނުންވާ އޭސީއާއި، އޭސީ މަރާމާތުގެ ހުރިހާ މަސައްކަތެއް އެއިން އެއް ކުންފުންޏަށް ހަވާލުކޮށްފަ އެވެ.
އޭގެ ތެރޭގައި ހިމެނޭ އެހެން ކުންފުންޏެއްގެ ނަމުގައިވާ އެކައުންޓުން އޭނާގެ އެކައުންޓަށް 5،000 ރުފިޔާ ޖަމާކޮށްފައިވާ ކަމަށް ވެސް ދައުލަތުން އުފުލާފައިވާ ދައުވާގައި ބުނެ އެވެ.
ހައިލަމް ވަނީ ދައުލަތުން އުފުލާފައިވާ ހަތަރު ދައުވާއަށް ވެސް އިއުތިރާފުވެފަ އެވެ.
ކްރިމިނަލް ކޯޓުން މިދިޔަ ބުރާސްފަތި ދުވަހު ކުރި ހުކުމުގައި ރިޝްވަތުގެ ދައުވާއަށް ކަނޑައެޅި އަދަބަކީ 56،200 ރުފިޔާއިން ޖޫރިމަނާ ކުރުމަށާއި 40 ގަޑިއިރު މުޖުތަމައަށް ހިދުމަތް ކުރުމަށެވެ.
މަގާމުގެ ނަހަމަ ބޭނުން ކުރުމުގެ ތިން ދައުވާއަށް ޖުމުލަ 120 ގަޑިއިރު މުޖުތަމައަށް ހިދުމަތް ކުރުމަށް ހުކުމްކޮށްފައިވެ އެވެ. އަދި ޖޫރިމަނާގެ ގޮތުގައި 82،200 ރ. ދެއްކުމަށް ހުކުމްކޮށްފައިވެ އެވެ.
ދައުލަތަށް ލިބުނު ގެއްލުމުގެ ބަދަލުގެ ގޮތުގައި ޖުމުލަ 241،244 ރ. ދެއްކުމަށް ހުކުމްތަކުގައިވެ އެވެ.
އެހެންކަމުން ކުރިއަށް އޮތް ދޮޅު އަހަރު ދުވަހުގެ މުއްދަތުގެ ތެރޭގައި ޖުމުލަ 379،644 ރ. ދެއްކުމަށް ކްރިމިނަލް ކޯޓުން ނެރުނު ހުކުމުތަކުގައިވެ އެވެ.
