މ. މ.މުލީ ރޭ ވެސް ކަރަންޓު ނެތި ކަނު އަނދިރީގައި ރައްޔިތުން ހޭދަކުރިއިރު، ކަރަންޓު ފަދަ އަސާސީ ހައްގަކުން މަހުރޫމުވުމުން މި މައްސަލައިގައި އެޗްއާރުސީއެމްއިން ކަންބޮޑުވުން ފާޅުކުރި އެވެ.
މުލިން "އަދަދު"އާ ވާހަކަ ދެއްކި މީހުން ބުނި ގޮތުގައި އެއްގޮތަކަށް ވެސް ކަރަންޓް ނުލިބި އެރަށު ރައްޔިތުން މިރޭ ތިބީ ވަރަށް ބޮޑު ހާސްކަމެއްގަ އެވެ. ސައްވީސްގަޑިއިރު ކަރަންޓް ލިބެން ފެށި ފަހުން އެއްގޮތަކަށް ވެސް ކަރަންޓް ނުލިބި މިހާ ގިނަ ވަގުތު ހޭދަކުރާ މިއީ ފުރަތަމަ ފަހަރު ކަމަށް ވެސް އެމީހުން ބުންޏެވެ.
މުލީ ރައްޔިތުންނަށް ކަރަންޓްގެ ހިދުމަތް ލިބުން ލަސްވާތީ ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން މިއަދު ކަންބޮޑުވުން ފާޅުކުރި އެވެ.
ސޯޝަލް މީޑިއާ އެކްސްގައި އެ ކޮމިޝަނުން ކުރި ޕޯސްޓެއްގައި ބުނީ ކަރަންޓުގެ ހިދުމަތްފަދަ އަސާސީ ހައްގެއް ދިގު މުއްދަތަކަށް ރައްޔިތުންނަށް ނުލިބި މެދުކެނޑިފައިވުމަކީ އެކަމުގެ ސަބަބުން އެހެނިހެން އަސާސީ ހައްގުތަކަށްވެސް އެކަމުގެ އަސަރު ކުރާނެކަމެއްކަމުގައިވާތީ އެކަމާ ކަންބޮޑުވާ ކަމަށެވެ.
"މި މައްސަލައަށް އަވަސް ހައްލެއް ހޯއްދަވައިދެއްވުމަށް ކަމާގުޅުންހުރި އެންމެހާ އިދާރާތަކަށް ގޮވައިލަން. އަދި މި މައްސަލައަށް ހައްލެއް ލިބުމާއިހަމައަށް މިކަން ކޮމިޝަނުން ވަރަށް ގާތުން މޮނީޓަރ ކުރަމުންދާނެ ކަމުގައި ދަންނަވަން،" އެޗްއާރްސީއެމްގެ ޕޯސްޓްގައި ބުންޏެވެ.
މުލިން ކަރަންޓުގެ ހިދުމަތް މެދުކެނޑިފައިވާ މައްސަލަ ކޮމިޝަނުގެ ސަމާލުކަމަށް އައުމާއި ގުޅިގެން އެކަން މޮނީޓަރކުރަމުން އަންނަ ކަމަށާއި އިދާރާތަކާއިއެކު މަޝްވަރާކޮށް އަވަސްހައްލެއް ލިބޭތޯބަލަމުން އަންނަ ކަމަށް ވެސް އެކޮމިޝަނުން ބުންޏެވެ.
މ. އަތޮޅުގެ ވެރިރަށް، މުލީގައި ކަރަންޓު ކެނޑިފައި އޮތުމުގެ ސަބަބުން ރަށުގައި ހުރި ސަރުކާރު އޮފީސްތަކާއި ސްކޫލްގެ ކިޔެވުން އިއްޔެ ނެތެވެ.
"ކަރަންޓު ނެތި އޮފީސްތައް ނުހިންގޭނެ. ސްކޫލުގައި ކިޔެވުން ވެސް ބަންދުކުރީ އެހެންވެ. އަދި ކަރަންޓު ނެތުމުން އާންމު ވިޔަފާރިތަކަށް ވެސް ގެއްލުންތައް އެބަ ލިބޭ. އައިސްކޮށްފައި ބަހައްޓަންޖެހޭ ތަކެތި ހަލާކު ވަމުން އެބަދޭ،" ކައުންސިލްގެ ރައީސް ޝަމްއޫން ރަމީޒު ވިދާޅުވި އެވެ.
ޝަމްއޫން ވިދާޅުވި ގޮތުގައި ކަރަންޓު ދިޔައީ ލޯޑު ބޮޑުވުމުގެ ސަބަބުން، ޖަނަރޭޓަރު ސެޓެއް ހަލާކުވެގެންނެވެ.
އެ ރަށަށް ކަރަންޓުގެ ހިދުމަތް ދެނީ ފެނަކަ ކޯޕަރޭޝަނުންނެވެ.
އެ ކޯޕަރޭޝަންގެ މެނޭޖިން ޑިރެކްޓަރު މުއާޒު މުހައްމަދު ރަޝީދު "އަދަދު" އަށް ވިދާޅުވީ ކަރަންޓު ދިޔައީ ޖަނަރޭޓަރު ސެޓަކަށް ދިމާވި މައްސަލައެއްގެ ސަބަބުން ކަމަށެވެ. އެ ރަށަށް ގެންގޮސްފައި ހުރި އާ ޖެންސެޓު ގުޅުމުގެ މަސައްކަތްކޮށް، މިއަދު މުޅި ރަށަށް އަލުން ކަރަންޓު ދެވޭނެ އޭނާ ވިދާޅުވި އެވެ.
މުލީ އާބާދީއަކީ 1014 އެވެ. އެއީ 520 ފިރިހެނުންނާއި 492 އަންހެނުންނެވެ. އަތޮޅު ހޮސްޕިޓަލް އެ ރަށުގައި ހިންގަމުން އަންނައިރު، މިހާރު ވަނީ އެއާޕޯޓެއް ވެސް ތަރައްގީކޮށް، ރަށުގެ އިގުތިސޯދު ފުޅާކޮށްފަ އެވެ.
