ދައުލަތުގެ ހަރަދުތައް ކުޑަކުރުމުގެ ގޮތުން ހާއްސަ ފިޔަވަޅުތަކެއް އަޅަން ޖުޑީޝަލް ސާވިސް ކޮމިޝަން (ޖޭއެސްސީ) އިން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އަށް އަންގައިފި އެވެ.
"އަދަދު" އަށް މައުލޫމާތު ލިބިފައިވާ ގޮތުގައި ޖޭއެސްސީން މިފަދަ ފިޔަވަޅުތަކެއް އަޅަން އެންގީ ހަރަދު ކުޑަކުރަން އަންގައި ރައީސް އޮފީހުން ފޮނުވާފައިވާ ސިޓީއަކަށާއި މިއަހަރު ހިންގަން ރާވާފައިވާ ކަންކަމަށް ރިއާޔަތް ކުރުމަށް ފަހު އެވެ.
އެގޮތުން, ޓްރެއިނިން ޕްރޮގްރާމްތައް ހިންގުން މަޑުޖައްސައިލުމަށާއި އާ މުވައްޒަފުން ނެގުން މިވަގުތަށް ހުއްޓައިލަން ވެސް ވަނީ އަންގާފަ އެވެ. އިތުރު ގަޑީގައި ކޮންމެހެން ނުކުމެ ކުރަން ޖެހޭ މަސައްކަތްތައް, ސުޕަވައިޒަރެއްގެ ހާއްސަ ހުއްދައާއެކު ކުރުމަށް ވަނީ އަންގާފަ އެވެ.
އާ ފަނޑިޔާރުން ނެގުން ވެސް މަޑުޖައްސައިލަން ވެސް ޖޭއެސްސީން ޑީޖޭއޭއަށް އެންގި އެވެ. ހަމައެހެންމެ, އާ ކޯޓުތައް ހުޅުވުމަށް ބާއްވާ ރަސްމިއްޔާތުތައް ނުބޭއްވުމަށާއި މުސާރަ އާއި އިނާޔަތް ލިބޭ ގޮތަށް ފަނޑިޔާރުން ދިގު މުއްދަތުގެ ކޯސްތަކަށް ވީއްލުން މަޑުޖައްސާލަން ވެސް ވަނީ އަންގާފަ އެވެ.
ރާއްޖޭގެ އިގުތިސާދީ ހާލަތު ރަނގަޅު ނަމަވެސް ދައުލަތުގެ މާލީ ހާލަތު ގޯސްވުމާއި ގުޅިގެން ހަރަދު ކުޑަކުރަން ހާއްސަ ފިޔަވަޅުތަކެއް އަޅަން ވަނީ އަންގާފަ އެވެ. ނަމަވެސް, ދައުލަތުގެ ހަރަދުތައް ކުޑަވެފައި ވަނީ ޕީއެސްއައިޕީ މަޝްރޫއުތަކަށް ކުރާ ހޭދަ ދަށްވުމުންނެވެ. ރިކަރަންޓު ހަރަދު ދަށެއް ނުވެ އެވެ.
