އެމްއެމްއޭގެ ގަވަރުނަރު އަލީ ހާޝިމް ވަކިކުރަން މަޖިލީހުން ހިންގާ މައްސަލައިގައި ޖަވާބުދާރީވާން، މާލިއްޔަތު ކޮމިޓީއަށް މިދިޔަ ތިން ދުވަހު ވެސް އާލާސްކަންފުޅާ އުޅުއްވާތީ އޭނާ ހާޒިރުވެވަޑައިގެންފައި ނުވާތީ, އޭނާ ލިޔުމުން ފޮނުއްވި ޖަވާބަށް ބަލައި މަގާމުން ވަކިކުރުމަށް ރައީސަށް ލަފާާ ދޭން މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގައި ނިންމައިފި އެވެ.
އޭނާ މަގާމުން ވަކިކުރުމަށް ހުށަހެޅުއްވީ ވެސް ނާޒިމް އެވެ. އެ ހުށަހެޅުމަށް ތާއިދު ކުރެއްވީ ފުވައްމުލަކު އުތުރު ދާއިރާގެ މެންބަރު ހަމަދު އަބްދުالله އެވެ. އޭނާ ވަކިކުރަން ފާސްކުރީ މެންބަރުންގެ އިއްތިފާގުންނެވެ. ކޮމިޓީގައި މިއަދު ތިއްބެވީ އަށް މެންބަރުންނެވެ.
އެމްއެމްއޭ ގާނޫނުގެ ދަށުން، އެ އޮތޯރިޓީގެ ގަވަރުނަރު ވަކިކުރަން ރައީސްއަށް ލަފާދިނުމަކީ މަޖިލީހަށް ކުރެވޭނެ ކަމެކެވެ. މިކަމާ މެދު އެންމެ ފަހު ގޮތް ނިންމާނީ މަޖިލީހުގެ ތަޅުމަށް މި މައްސަލަ ހުށަހަޅައިގެން ނަގާ ވޯޓަކުންނެވެ.
މިދިޔަ ދެ ދުވަހެކޭ އެއްގޮތަށް މިއަދު ވެސް އާލާސްކަންފުޅާ އުޅުއްވާތީ ހާޝިމް ކޮމިޓީއަށް ހާޒިރުވެވަޑައިނުގަންނަވަ އެވެ. އެކަން ކޮމިޓީއަށް އޮތީ އަންގަވާފަ އެވެ. މި މައްސަލާގައި ހާޝިމް ޖަވާބު ހުށަހެޅުއްވީ ލިޔުމުންނެވެ. އިތުރު ސުވާލެއް އޮތް ނަމަވެސް ލިޔުމުން ފޮނުއްވުމަށް އޭނާ މިއަދު ފޮނުއްވި ސިޓީގައި އެދިވަޑައިގެންނެވި އެވެ.
އެހެން ނަމަވެސް, ކޮމިޓީގެ މެންބަރުން ވަނީ ގަވަރުނަރު ވަޑައިގެންނެވިނަމަ އިތުރު ސުވާލު ކުރުމަށް ބޭނުންވާކަން ހާމަކުރައްވާފަ އެވެ. އެއީ, މަޖިލީހުގެ ބައެއް ކޮމިޓީތަކުގައި ދައުލަތުގެ ބައެއް އިދާރާތަކުން ހިއްސާކުރި މައުލޫމާތުތަކާ ގުޅިގެން ގަވަރުނަރުގެ އަރިހުން ސާފުކުރަން ޖެހޭ އިތުރު ކަންކަން ހުރި ކަމަށް މެންބަރުން ވިދާޅުވި އެވެ.
"މިގޮތަށް ބަލަހައްޓައިގެން އެއްވެސް ކަމެއް ނުކޮށް ގަވަރުނަވު ދޭތެރޭ މިހެން ތިބުމަކީ ގައުމީ ނަޒަރަކުން ބަލާއިރު ވަރަށް ދެރަ ގޮތެއް ދިމާވެދާނެ ކަމެއް. އަޅުގަނޑަށް ފެންނަނީ ގަވަރުވަނު ވަކިކުރަން ރައީސަށް ލަފާ ދޭން މިއަދު ނިންމަން," ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް ވިދާޅުވި އެވެ.
އިތުރު ސުވާލުތަކެއް ލިޔުމުން ފޮނުވައިގެން އަނެއްކާ ވެސް ޖަވާބު ދިނުމަށް ގަވަރުނަރަށް ފުރުސަތު ދިނުމަށް މެންބަރުންގެ ހިޔާލު މުގައްރިރަކަށް އިންނެވި މާމިގިލީ ދާއިރާގެ މެންބަރު ގާސިމް އިބްރާހިމް ހޯއްދެވި އެވެ. މެންބަރުންގެ އިއްތިފާގުން ފާސްކުރީ އިތުރު ފުރުސަތެއް ނުދިނުމަށެވެ.
ފިނޭންސް މިނިސްޓްރީން މަޖިލީހަށް ފޮނުވި ސިޓީއެއްގައި ނޮވެމްބަރު 17, 2023 އިން ފެށިގެން އިސްވެ އެމްއެމްއޭއިން ލަފާ ދީފައި ނުވާކަން ބަޔާންކޮށްފައިވާ ކަމަށް ނާޒިމް ވިދާޅުވި އެވެ.
ވަކިކުރަން ހުށަހެޅި މައްސަލަ
މެމްބަރު ނާޒިމް އެ މައްސަލަ ހުށަހަޅުއްވަމުން ވިދާޅުވީ ގަވަރުނަރު ވަކިކުރަން ލަފާ ދެނީ ގައުމުގެ އިގުތިސޯދު ހީނަރުވެ، އަލުން އަނބުރާ އިޔާދަކުރަން އުނދަގޫ ހިސާބަކަށް ދިޔައިރު، އެމްއެމްއޭއަށް މަނިޓަރީ ޕޮލިސީ އޭގެ އެންމެ އެކަށޭނެ ގޮތުގައި ހިންގަމުންދާ ތަން ފެންނަމުން ނުދާ ކަމަށެވެ.
އެގޮތުން އޭނާ ތިން ކަމެއް ފާހަގަކުރި އެވެ. އެއީ:
- ރާއްޖޭގައި ހިންގާ ބޭންކުތަކާއި މާލީ އިދާރާތަކުން އާންމުންނަށް ލޯނު ދޫކުރާ މިންވަރު ނުސީދާކޮށް ހިފަހައްޓާ، ބޭންކުތަކުގެ ރިޒާާވް، އެމްއެމްއޭގައި ބަހައްޓަން ގަވަރުނަރު ބާރުއެޅުުއްވުން
- ސަރުކާރުން ވެސް މިހާރު ފައިސާ ހޯދަމުން ގެންދަނީ ޑޮމެސްޓިކް މާކެޓްއިން ކަމުން ޑޮމެސްޓިކް މާކެޓް ރެގިއުލޭޓުކުރުމުގެ މުހިންމުކަން ބޮޑުވެފައިވާ ވަގުތެއްގައި އެކަން ކުރަމުންދާތަން ނުފެނުން
- ކުށްކުރުން ހުއްޓުވަން ހުރި ގޮންޖެހުންތަކުގެ ތެރޭގައި އެމްއެމްއޭގެ ގަވާއިދުތައް އަދާ ހަމަ ނޫން މައްސަލަ ފާހަގަކުރެވޭތީ
ގަވަރުނަރުގެ ދިފާއު
އޭނާއަށް ގަވަރުނަރުގެ ޒިންމާ އަދާނުކުރެވޭ ކަމަށް ބުނާ މައްސަލާގައި ކޮމިޓީއަށް ފޮނުއްވި ލިއުމުގައި، މިކަމަށް އިންކާރުކުރައްވަމުން ހާޝިމް ވިދާޅުވީ، އިގުތިސޯދީ ކާރިސާއެއް އައުމުގެ ކުރިން އެ ފަދަ ހާލަތަކުން ގައުމު ސަލާމަތްކުރަން ބޭނުންވާ މައުލޫމާތާއި އިރުޝާދު ދީ، އަޅަން ޖެހޭ ފިޔަވަޅުތައް އެޅުމުގެ މުހިންމު ކަން އޭނާ އާއި އެމްއެމްއޭއިން ސަރުކާރާ ހިއްސާކޮށްފައިވާނެ ކަމަށެވެ.
މި މައުލޫމާތުތައް މާލިއްޔަތު ކޮމިޓީއާ ވެސް ހިއްސާކުރައްވާފައިވާނެ ކަން ފާހަގަކުރައްވަމުން، ހާޝިމް އިތުރަށް ވިދާޅުވީ މިއަދު ބޯމަތިވެފައިވާ އިގުތިސޯދީ މުސްތަގުބަލާ މެދު އޮތް ބިރުވެރިކަމުގެ އަސްލަކީ އެމްއެމްއޭ އާއި ބައިނަލްއަގުވާމީ މާލީ އިދާރާތަކުން އިރުޝާދާއި ލަފާ، ސަރުކާރުން އަޑުނޭހުން ކަމަށެވެ.
"ކާރިސާއެއް ކުރިމަތިވެދާނެ ކަމުގެ ބޮޑު ބިރެއް އޮތުމުގެ މައިގަނޑު ސަބަބަކީ މި އޮތޯރިޓީ އާއި މާލީ ކަންކަމާ ބެހޭ ބައިނަލްއަގުވާމީ މުއައްސަސާތަކުގެ އިރުޝާދާއި ލަފައަށް ކަމާބެހޭ ފަރާތްތަކުން އަހައްމިޔަތުކަން ނުދިނުމާއި އަޅުގަނޑުމެން ޒަމާނުއްސުރެ ވަކާލާތުކުރަމުން އައިސްފައިވާ ފިސްކަލް ޑިސިޕްލިން ގެންގުޅުއްވާފައި ނެއްކަމުން،" ހާޝިމް ވިދާޅުވި އެވެ.
ގަވަރުނަރު ހާޝިމް ވަކިކުރަން ހުށަހެޅި އެހެން ސަބަބުތަކަށް ވެސް އޭނާ ވަނީ މާލިއްޔަތު ކޮމިޓީއަށް ފޮނުއްވި ޖަވާބުގައި އިންކާރުކުރައްވާފަ އެވެ.
އެއީ ބޭންކުތަކުން ލޯނު ދޫކުރާ މިންވަރު ބަހައްޓަން އެމްއެމްއޭގައި ބެހެއްޓުމަށް ބާރު އެޅުމާއި ޑޮމެސްޓިކް މާކެޓު ރެގިއުލޭޓު ނުކުރުމާއި ފައިސާގެ ކުށްތައް ހުއްޓުވަން ގަވާއިދުތައް އަދާހަމަ ނުކުރުމުގެ އިތުރުން މި ސަރުކާރަށް ލަފާ ދިނުމާއި އެމްއެމްއޭގެ ގާބޫނުގެ މަގުސަދުތައް ހާސިލުކުރަން މަސައްކަތް ނުކުރުމެވެ.
މި ހުރިހާ ނުކުތާއެއްގެ ރައްދުގައި ތަފުސީލުކޮށް އޭނާ ދެކެވަޑައިގަންނަވާ ގޮތާއި އޭނާގެ ދިފާއު ބަޔާންކުރައްވަމުން ހާޝިމް ވިދާޅުވީ މިވީހާ ތަނުގައި މަސައްކަތްކުރީ ގާނޫނުގެ ތެރެއިން އޭނާއާ މަތިކުރެވިފައިވާ ޒިންމާތައް އަދާކުރަށް ކަމަށެވެ. އަދި މި ހާލަތުން އަރައިގަންނަން އެ އޮތޯރިޓީ އާއި އޭނާގެ ފުރިހަމަ އެއްބާރުލުން ލިބޭނެކަމުގެ ޔަގީންކަން އޭނާ ދެއްވި އެވެ.
