ސަރުކާރުގެ މަސް ކުންފުނި، މިފްކޯއަށް ބޭރުގެ ޗީފް އެގްޒެކެޓިވް އޮފިސަރެއް (ސީއީއޯ) ހޯދަން ޖޫން 26, ގައި ކުރި އިއުލާން ބާތިލުކޮށްފި އެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މިއަދު ގެޒެޓުކުރި އިއުލާނެއްގައި ބުނީ އެ އިއުލާނު ބާތިލުކުރަން ނިންމީ ޝަރުތު ހަމަވާ ކެންޑިޑޭޓަކު ކުރިމަތިލާފައި ނުވާތީ ކަމަށެވެ.
ސީއީއޯ ކަމަށް ޝައުގުވެރިވާ މީހުން ސީވީއާއި ސެޓިފިކެޓުތަކުގެ އިތުރުން ރިފަރެންސް ސިޓީތައް ފޮނުވުމުގެ ސުންގަޑިއަކަށް ބާތިލުކުރި އިއުލާނުގައި އޮތީ އިއްޔެ މެންދުރު 2:00 އެވެ.
އެ އިއުލާނު ބާތިލުކުރިއިރު، އެ މާގަމަށް ކުރިމަތިލެއްވިކަން އާންމުކޮށް އިއުލާނުކޮށްފައިވަނި އެ ކުންފުނީގެ ކުރީގެ މެނޭޖިން ޑިރެކްޓަރު އާތިފް ޝަކޫރެވެ. އާތިފް ވަނީ މިފްކޯގެ ޑެޕިއުޓީ ސީއީއޯ ކަމާއި އެމްއެމްއޭގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ) ގެ އިސްވެރިޔާގެ މަގާމުވެސް މީގެ ކުރިން އަދާކޮށްފަ އެވެ.
މިފްކޯއަށް އާ ސީއީއޯއެއް ހޯދަން އިއުލާން ކޮށްފައި ވަނީ އެ މަގާމުގައި ހުންނެވި އަހްމަދު ޝަމާހުގެ މައްޗަށް ކުރެވުނު ތުހުމަތުތަކާއެކު މެއި 21، ގައި އޭނާ ވަކި ކުރަން ޕީސީބީން ނިންމުމާ ގުޅިގެންނެވެ. އޭނާ ވަކިކުރީ ދެ ފަހަރެއްގެ މަތިން ސަސްޕެންޑު ކުރުމަށްފަހު އެވެ.
ޝަމާހުއަށް ތުހުމަތުކުރެވުނު މައްސަލަތަކުގެ ތެރޭގައި ކުންފުނީގެ ވަޒީފާތަކަށް ގާތް ތިމާގެ މީހުން ނެގުމާއި ކުންފުނީގެ ވަސީލަތްތައް ނަހަމަ ގޮތުގައި ބޭނުންކުރުން ހިމެނެ އެވެ. އެކަމަކު މި މައްސަލައިގައި އެސްއޯއީ ކޮމިޓީން ޕީސީބީ ހާޒިރުކޮށްގެން ބޭއްވި ކޮމިޓީ ބައްދަލުވުމެއްގައި ޝަމާހު މި ތުހުމަތުތައް ދޮގުކޮށްފައިވެ އެވެ.
މިފްކޯ ގެއްލުމުގައި ހިންގަމުން އަންނައިރު، އެ ކުންފުނިން މަސްވެރިން އަތުން ގަންނަ މަހަށް ފައިސާ ނުދޭ މައްސަލަ ބޮޑުވެ އެންމެފަހުން ސަރުކާރުން ވަނީ ރިޔާސީ ވައުދާ ހިލާފަށް މަސް ގަންނަ އަގު 16ރ. އަށް ދަށްކޮށްފަ އެވެ. ސަރުކާރު ވެރިކަމަށް އައީ 20ރ. އަށްވުރެ ރޭޓު ދަށްވިޔަ ނުދިނުމަށް ޕްލޭނެއް އޮތް ކަމަށް ބުނެ އެކަން އެގޮތަށް ކުރާނެ ކަމުގެ ޔަގީންކަމާ އެކު އެވެ.
