ގެދޮރުވެރިޔާ ސްކީމްގެ ދަށުން ފްލެޓު ދިނުން ލަސްވާތީ ޖަމިއްޔާތަކުން މާލެ ސިޓީގެ މޭޔާރު އާދަމް އާޒިމްއާ މިއަދު ކަންބޮޑުވުންތައް ހިއްސާކޮށްފި އެވެ.
ކުރީގެ ސަރުކާރުން ދޫކުރި 4000 ފްލެޓު އަދިވެސް ސަރުކާރުން ދޫނުކުރާތީ ކަންބޮޑުވުން ފާޅު ކުރީ މާލެ ރަށްވެހިންގެ ޖަމިއްޔާ، ގިރާވަރު މާލެ ސިޓިޒެންސް އެސޯސިއޭޝަން، ގުޅީފަޅު ރައްޔިތުންގެ އެސޯސިއޭޝަން، ހުޅުމާލެ ކޮމިއުނިޓީ އަދި ފަހި ޔޫނިއަން އެވެ.
ބައްދަލުވުމަށްފަހު ނޫސްވެރިންނަށް މައުލޫމާތު ދެއްވަމުން އާޒިމް ވިދާޅުވީ މޭޔަރުކަމާ އޭނާ ހަވާލުވިއިރު ރައްޔިތުންގެ އެންމެ ބޮޑު އެދުމަކަށްވީ ގެދޮރުވެރިކަމުގެ މައްސަލައަށް ހައްލު ހޯދައި ދިނުމަށް މަސައްކަތް ކޮށްދިނުމަށް ކަމަށާއި އެކަމަށް އަބަދުވެސް މަސައްކަތް ކުރާނެ ކަމަށެވެ.
"ކައުންސިލް މެންބަރުން ވަރަށް ބޮޑަށް މަސައްކަތް އެބަ ކުރައްވާ އަންނަ ބުދަ ދުވަހު އެއަށް ގޮތެއް ނިންމާ އަޅުގަނޑުމެންގެ ލަފާ ހައުސިން މިނިސްޓްރީއަށް ފޮނުވަން،" އޭނާ ވިދާޅުވި އެވެ.
ފްލެޓް ލިބޭ މީހުންގެ ލިސްޓު ރިވިއު ކުރުމަށްފަހު އާންމު ކުރުމަކީ މުހިންމު ކަމެއްކަން ފާހަގަކުރައްވާ އާޒިމް ވިދާޅުވީ ދީފައި އޮތް އެއްޗެއް އަތުލުމަކީ ގާނޫނީ ގޮތުން ވެސް ރަނގަޅު ކަމެއް ނޫން ކަމަށެވެ.
ފްލެޓް ލިބިފައި ތިބި މީހުންނަށް ލަސްނުކޮށް ފްލެޓްތައް ހަވާލު ކުރުމަށާއި ބިންތައް ހަވާލު ނުކުރެވި ތިބި މީހުންނަށް ވީހާވެސް އަވަހަށް ބިންތައް ހަވާލު ކުރުމަށް ވެސް އާޒިމް ވަނީ ގޮވާލާފަ އެވެ.
އޭގެއިތުރުން އާޒިމް ވިދާޅުވީ އެމްޑީޕީގެ ބޯހިޔާވެހިކަމުގެ ސިޔާސަތު ތަންފީޒުކޮށް، ހާލުގައި ދިރިއުޅެމުން އަންނަ މާލޭގެ ރައްޔިތުންނަށް ވީހާވެސް އަވަހަށް ބޯހިޔާވެހިކަމުގެ ހައްގު ކަށަވަރުކޮށްދިނުމަށް އެދޭ ކަމަށެވެ.
