ޓްރީޓޮޕް ހޮސްޕިޓަލުން ފޯރުކޮށްދޭ ހޯމްކެއާ ފިޒިއޮތެރަޕީ ހިދުމަތުން ބަލި މީހުންނަށް ހޮސްޕިޓަލަށް ނުގޮސް، ގެއިން ބޭނުންވާ ފަރުވާ ހޯދަން ފުރުސަތު ލިބެ އެވެ.
ހޯމްކެއާގެ ދަށުން ޓްރީޓޮޕުން އަންނަނީ ޕޯސްޓް ސާޖިކަލް ރިހެބިލިޓޭޝަން، ސްޓްރޯކް ރިހެބިލިޓޭޝަން އަދި ކްރޯނިކް ރިހެބިލިޓޭޝަންގެ ހިދުމަތް ދެމުންނެވެ.
މި ހިދުމަތް އަމާޒުކޮށްފައި ވަނީ އުމުރުން ދުވަސްވެފައިވާ ފަރާތްތަކާއި ތަދު ތަކަށް ދިގު މުއްދަތަށް ފަރުވާ ހޯދާ ފަރާތްތަކާއި، ސާޖަރީ އަށް ފަހު ފިޒިއޯ ބޭނުންވާ ފަރާތްކާއި އަދި އެހެނިހެން އަނިޔާތަކާހުރެ ހިނގާބިނގާވެ އުޅުމަށް ދަތިވާ ފަރާތްތަކަށެވެ.
ޓްރީޓޮޕްގެ ޗީފް ރިހިބިލިޓޭޓިވް ތެރަޕިސްޓް ޑރ. ރަމޭޝް ބާބޫ މަނިވައްނަން "އަދަދު" އަށް ވިދާޅުވީ އެ ހިދުމަތުގެ ސަބަބުން ފިޒިއޯތެރަޕީ ހެދުމަށް ހޮސްޕިޓަލަށް ދާން އުނދަގޫވާ ފަރާތްތަކަށް ލުޔެއް ލިބޭނެ ކަމަށެވެ.
"މި ހިދުމަތް މި ދެނީ ހުރިހާ އުމުރުފުރާތަކަށް އަދި ހުރިހާ ޖިންސަކަށް. ފުރަތަމަ މި ހިދުމަތް ދެނީ މާލެއަށް. ކުރިއަށް އޮތްތަނުގައި ހޯމްކެއާ ހިދުމަތް ފުޅާކޮށް އެހެން ތަންތަނަށް ވެސް ދޭނެ. އަދި އާ ހިދުމަތްތައް ވެސް ހޯމްކެއާގެ ދަށުން ތައާރަފްކުރާނެ،" ރަމޭޝް ވިދާޅުވި އެވެ.
ހިދުމަތް މިހާތަނަށް ގިނަ ބަޔަކު ހޯދާފައިވާކަން ފާހަގަކޮށް ރަމޭޝް ވިދާޅުވީ ހޮސްޕިޓަލަށް ނައިސް ވަކި ގަޑިއެއްގައި ގެއިން ހިދުމަތް ލިބޭތީ ގިނަ ބަޔަކަށް ހިތްހަމަޖެހުން ލިބިފައިވާ ކަމަށެވެ.
ހޯމްކެއާ ހިދުމަތް ފޯރުކޮށްދިނުމަށް ހަމަޖެހިފައިވާ ގަޑިތައް:
ހެނދުނު: 7:00 އިން 9:00 އަށް
ރޭގަނޑު: 8:00 އިން 10:00 އަށް
މި ހިދުމަތް ފުރަތަމަ މާލޭ ސަރަހައްދަށް ތައާރަފުކުރި ނަމަވެސް، ކުރިއަށް އޮތް ތަނުގައި އެހެން ސަރަހައްދުތަކަށް ވެސް ހިދުމަތް ފުޅާކުރާނެ ކަމަށް ޓްރީޓޮޕުން ބުނެ އެވެ.
މި ހިދުމަތާ ގުޅޭ އިތުރު މައުލޫމާތު ހޯދުމަށް 3351610 އަށް ގުޅުމަށް ޓްރީޓޮޕުން ވަނީ އެދިފަ އެވެ. އަދި ހިދުމަތަށް އެދުމުން، އެޕޮއިންޓްމަންޓް ހަމަޖެހޭނެ ކަމަށް އެ ހޮސްޕިޓަލުން ބުނެ އެވެ.
