ގައުމަށް ލިބުނު ތަރައްގީއެއް ލިބުނީ އިދިކޮޅު މޯލްޑިވިއަން ޑިމޮކްރެޓިކް ޕާޓީގެ މެންބަރުން ކުރި މަސައްކަތުން ކަމަށް މާލެ ސިޓީގެ މޭޔަރު އާދަމް އާޒިމް މިރޭ ވިދާޅުވެއްޖެ އެވެ.
އެމްޑީޕީން ކުރިއަށްގެންދާ ހަރުގެ ޖަލްސާއެއްގައި ވާހަކަ ދައްކަވަމުން އެމްޑީޕީގެ އެންމެ ފުރަތަމަ ސަރުކާރުން ތައާރަފު ކުރި ސޯޝަލް ސެކިއުރިޓީގެ ނިޒާމުތަކުގެ ވާހަކަ އާޒިމް ވަނީ ފާހަގަކޮށްފަ އެވެ. އޭގެ ތެރޭގައި ދުވަސްވީ މީހުންނަށް، ނުކުޅަދޭ މީހުންނަށް ފޯރުކޮށްދޭ އެލަވަންސް ހިމެނެ އެވެ.
"އެމްޑީޕީގެ މެންބަރުން ކުރި މަސައްކަތުން މި ގައުމަށް ލިބުނު ތަރައްގީއެއް ލިބުނީ، މި ގައުމުގެ ރައްޔިތުންނަށް ކޮޅަށް ތިބެވުނީ. [ތަރައްގީ ލިބުނީ] އެމްޑީޕީގެ މެންބަރުން ކުރި މަސައްކަތުން، އޮހޮރި ލެއިން، އޮހޮރި ދަލުން. އެ ނޫން އެއްވެސް ކަމެއް ވެގެނެއް ނޫން،" އާޒިމް ވިދާޅުވި އެވެ.
އޭގެ އިތުރުން، އެމްޑީޕީގެ ސަރުކާރުން މާލޭގެ ރައްޔިތުންނަށް ހިލޭ ގޯތި ދެ ފަހަރެއްގެ މަތިން ދިން ކަން ވެސް އާޒިމް ފާހަގަ ކުރި އެވެ. އެއީ ކުރީގެ ރައީސް މުހައްމަދު ނަޝީދުގެ ސަރުކާރުން މާލޭގެ ގޯއްޗާއި ބަދަލު ކުރާ ގޮތަށް ހުޅުމާލެއިން ދިން ގޯތިތަކާއި މިފަހުން ކުރީގެ ރައީސް އިބްރާހިމް މުހައްމަދު ސޯލިހު ގުޅީފަޅު، ގިރާވަރުފަޅު އަދި ހުޅުމާލެއިން ދިން ގޯތިތަކެވެ.
އޭގެ އިތުރުން، މާލެ ސިޓީގެ މޭޔަރުގެ މަގާމުގައި ރައީސް ޑރ. މުހައްމަދު މުއިއްޒު ހުންނެވިއިރު އެކަށީގެންވާ މަސައްކަތެއް ނުކުރެވުނު ކަމަށް ވެސް އާޒިމް ވިދާޅުވި އެވެ. އަދި އެއިރު ނުކުރެވުނު މަސައްކަތްތައް މިހާރު އޭނާ ކުރައްވަމުން އަންނަ ކަމަށް ވެސް އާޒިމްް ވިދާޅުވި އެވެ.
