ކަނޑުގެ ދިރާސާތައް ކުރުމުގައި އެކުގައި މަސައްކަތް ކުރުމަށް ދިވެހި ސަރުކާރުން ޗައިނާގެ ސައުތު ޗައިނާ ސީ އިންސްޓިޓިއުޓް އޮފް އޯޝަނަލޮޖީ (އެސްސީއެސްއައިއޯ) އާއެކު މަޝްވަރާކޮށްފި އެވެ.
ތިމާވެއްޓާ ބެހޭ މިނިސްޓްރީގެ ރަސްމީ އެކްސް އެކުންޓުން މިއަދު ކުރި ޕޯސްޓެއްގައި ބުނީ މި މަޝްވަރާތަކުގައި އެ މިނިސްޓްރީގެ ފަރާތުން ބައިވެރި އިސް އޮފިޝަލުންގެ ޓީމު ލީޑުކުރެއްވީ ސްޓޭޓް މިނިސްޓަރު އިބްރާހިމް ނާޒިމް ކަމަށެވެ.
އެ ބައްދަލުވުމުގައި މަޝްވަރާކުރި ކަންކަމުގެ ތެރޭގައި މިނިސްޓްރީން ފާހަގަކޮށްފައިވަނީ ތިމާވެށީގެ މަސައްކަތަކާއި ކަނޑުގެ ދިރާސާތަކުގައި ދިވެހި ސަރުކާރުން އެސްސީއެސްއައިއޯ އާއެކު މަސައްކަތް ކުރެވޭނެ ގޮތްތަކެވެ.
އެ އިންސްޓިޓިއުޓަކީ 1959 އިން ފެށިގެން ކަނޑުގެ ދިރާސާތައް ކުރުމަށް ޗައިނާގެ ސައިންސް އެކަޑަމީގެ ދަށުން ހިންގާ އިދާރާއެކެވެ. އެ އިދާރާގެ ވެބްސައިޓުގައި ބުނާގޮތުން އެސްސީއެސްއައިއޯ އިން ދިރާސާކުރާ ސަރަހައްދުތަކުގެ ތެރޭގައި ދެކުނު ޗައިނާ ކަނޑާއި ރާއްޖެ ހިމެނޭ އިންޑިއާ ކަނޑުގެ އިތުރުން ޕެސިފިކް ކަނޑުވެސް ހިމެނެ އެވެ.
އެ އިދާރާގެ ތިން މައި އުޅަނދު ބޭނުންކޮށްގެން 400 އަށްވުރެ ގިނަ ސައިންސުގެ ތަހުގީގުތައް ކޮށްފައިވާނެ ކަމަށައި ވޭތުވެދިޔަ އަހަރުތަކުގައި އިންޑިއާ ކަނޑުގެ އިރުމަތީ ސަރަހައްދުގައި އެ އިދާރާއިން އޮބްޒަވޭޝަނަލް ނެޓްވޯކެއް ގާއިމުކޮށްފައިވާ ކަމަށް ވެސް އެ ވެބްސައިޓުގައިވެ އެވެ.
މި ސަރުކާރުން މިފަދަ މަޝްވަރާތަކެއް ކޮށްފައި މިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ދިވެހި ކަނޑުގެ މުއްސަނދިކަން އެނގެން ޖެހޭނީ ހަމައެކަނި ދިވެހިންނަށް ކަމަށް ވިދާޅުވެފައި ވަނިކޮށެވެ. ޕީއެންސީ ކޯލިޝަނުން އިދިކޮޅުގައި އޮތްއިރު އެންމެ ބޮޑަށް ފާޑުކީ ކުރީ ސަރުކާރުން އިންޑިއާއާއެކު ކަނޑުގެ ދިރާސާ ކުރުމަށް ހެދި އެއްބަސްވުމުގެ ސަބަބުންނެވެ.
އެއީ ގައުމީ ސަލާމަތަށް އޮތް ނުރައްކަލެއް ކަމަށް ބުނެ މި ސަރުކާރުން ވަނީ އެ އެއްބަސްވުން އާ ނުކުރާން ނިންމާ މި ޖޫން މަހުގެ ފަހުން އެ އެއްބަސްވުމަށް އަމަލުކުރުން ހުއްޓާލަން ނިންމާފަ އެވެ. އަދި ކުރިއަށް އޮތް ތަނުގައި ކަނޑުގެ ދިރާސާތައް ކުރުމުގެ ގާބިލުކަން ދިވެހި ދައުލަތުގައި ގާއިމުކުރާނެ ކަމަށް ވެސް ސަރުކާރުން ބުނެފަ އެވެ.
"ހަމަ އެހެންމެ، ރާއްޖޭގެ ކަނޑުއަޑީގެ ބަތާނަ އެހެން ދައުލަތަކުން ހޯދައި ކުރެހުމަކީ ދިވެހީންނަށް މަސްލަހަތު ހުރި ކަމެއް ނޫން. ދިވެހި ކަނޑުތަކުގެ މުއްސަނދިކަން ދެނެގަތުމަކީ ދިވެހީންގެ ހައްގެއް. ދިވެހީންގެ ގައުމީ ވާޖިބެއް. އެ ސަބަބަށް ޓަކައި އިންޑިޔާއާ އެކު ވެފައިވާ ހައިޑްރޯގްރެފިކް އެއްބަސްވުމުގެ މުއްދަތު އިހަށް ދުވަހު ހަމަވުމުން، އެ އެއްބަސްވުން އަލުން ކުރިޔަށް ނުގެންދަން ނިންމައި އެ ކަން ވާނީ އިންޑިޔާ ސަރުކާރަށް އަންގައިފައި. ދިވެހި ކަނޑުތައް ކުރަހާނީ ދިވެހީން،" ޑިސެމްބަރު 16، 2023، ގައި ރައީސް ވިދާޅުވި އެވެ.
ނަމަވެސް މި ސަރުކާރަށް ގިނަ ދުވަސްތަކެއް ނުވެ ޗައިނާގެ ކަނޑުގެ ދިރާސާ ކުރާ އުޅަނދެއް ވަނީ ދެތިން މަސްވަންދެން ރާއްޖޭގެ އީއީޒެޑުގެ ބުޑުގައި އެނބުރިފަ އެވެ. އެ ދަތުރުގައި ސަރުކާރުގެ ހުއްދައާއެކު ދެ ފަހަރެއްގެ މަތިން އެ އުޅަނދު މާލޭގައި ބަނދަރުވެސް ކުރި އެވެ.
ސަރުކާރުން އޭރު ބުނީ އެ އުޅަނދުން ރާއްޖޭގެ ކަނޑުގެ ސަރަހައްދުގައި އެއްވެސް ދިރާސާއެއް ނުކުރާ ކަމަށެވެ. ނަމަވެސް އެ އުޅަނދުން ވަނީ އެތައް ފަހަރެއްގެ މަތިން ރާއްޖޭގެ އީއީޒެޑަށްވެސް ވަދެފަ އެވެ.
