ސައްހަ ލިޔެކިއުން ނެތި ރާއްޖޭގައި އުޅޭ ބިދޭސީންގެ މައްސަލަ ކުރިއަށް އޮތް ތިން އަހަރު ދުވަހުގެ ތެރޭގައި ހައްލުވާނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
"ނާރެސް ޕޯޓަލް" އާއި ކުރަނގި ފޭސް 2 އިފްތިތާހުކުރަން ދަރުބާރުގޭގައި ރޭ ބޭއްވި ރަސްމިއްޔާތުގައި މިނިސްޓަރު ވިދާޅުވީ ކުރަނގި އޮޕަރޭޝަނުގެ ދެވަނަ ފިޔަވަހި ނިމޭ އިރު، ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލުވާނެ ކަމަށެވެ. އެ މަސައްކަތް ކުރިއަށް ގެންދާނެ ގޮތުގެ ތަފްސީލު ވެސް ދެއްވި އެވެ.
"ރައީސްގެ އިންސްޓަރަކްޝަން އާއެކު އަޅުގަނޑުމެން މި މަސައްކަތް ކުރަނީ ގަވާއިދާ ހިލާފަށް އުޅޭ ބިދޭސީންގެ މައްސަލަ އެއްކޮށް ދާއިމީ ހައްލެއް ގެންނަން." އިހުސާން ވިދާޅުވި އެވެ.
އޭނާ ވިދާޅުވި ގޮތުގައި ކުރަނގި ފޭސް 1 ގައި ކުރި މަސައްކަތަކީ ސިޔާސަތުތައް އެކުލަވައިލުމާއި ބައެއް ރަށްރަށުގައި އެކަން އޮތް ގޮތް ދެނެގަނެ އެޕްލިކޭޝަން ޑިވެލޮޕްކުރުމެވެ. ފޭސް 2 ގައި ކުރާނެ ކަމަކީ އެޕްލިކޭޝަންތަކުގެ ބާރުވެރިކަން ކައުންސިލްތަކަށް ދިނުން ކަމަށް ވެސް އޭނާ ވިދާޅުވި އެވެ.
އެ އެޕްލިކޭޝަން މެދުވެރިކޮށް، ޝައްކުވާ ބިދޭސީއެއްގެ ފޮޓޯ ނެގުމުން އެ ބިދޭސީ މީހާގެ ހުރިހާ ވަނަވަރެއް ކައުންސިލްތަކަށް އިނގިގެންދާނެ އެވެ. އެއީ ކޮން ކުންފުންޏަކުން އެތެރެވެ އުޅޭ ބިދޭސީއެއްތޯ އާއި އެންމެ ފަހުން ވިސާ އާ ކުރީ ކޮން ތާރީހެއްގައި ކަން ފަދަ މުހިންމު މައުލޫމާތުތައް ވެސް އެ އެޕްލިކޭޝަން މެދުވެރިކޮށް ބެލޭނެ އެވެ.
ގަވައިދާ ހިލާފަށް އުޅޭ ބިދޭސީން ހުއްޓުވުމުގައި ކައުންސިލްތަކަށް ބާރުވެރިކަން ދިނުމުން އެ މައްސަލައަށް ދާއިމީ ހައްލެއް ހޯދުމުގެ ފުރަތަމަ ބައި އެ ނިމުނީ ކަމަށް ވެސް އޭނާ ވިދާޅުވި އެވެ. ބިދޭސީންގެ 100 ޕަސެންޓް އައިޑެންޓިފައި ކުރަން ކަނޑައަޅާފައި އޮތް ޓައިމްލައިންއަކީ އެއް އަހަރު ދުވަސް ކަމަށާއި ދެވަނަ އަހަރާއި ތިން ވަނަ އަހަރަކީ މިގޮތަށް އައިޑެންޓިފައި ކުރެވޭ މީހުން ގާނޫނީ އިމުގެ ތެރެއަށް ގެނައުމަށް މަސައްކަތް ކުރާނެ ދެ އަހަރުގެ ދުވަސްކަމަށް ވެސް ވިދާޅުވި އެވެ.
