އެމްޑީޕީގެ ދާއިރާތަކުގެ އިންތިހާބުގައި ދަނގެތި ދާއިރާއަށް ކުރިމަތިލި އެ ދާއިރާގެ މިހާރުގެ ރައީސް މުހައްމަދު އިބްރާހިމް (ސަންކޮ) ގެ ކެންޑިޑެންސީ އެ ޕާޓީން ބާތިލުކޮށްފި އެވެ.
އެމްޑީޕީން މުހައްމަދު އިބްރާހިމްގެ ކެންޑިޑެންސީ ބާތިލުކޮށްފައި ވަނީ މިދިޔަ އަހަރު ބޭއްވި ރިޔާސީ އިންތިހާބާއި މި އަހަރު ބޭއްވި މަޖިލިސް އިންތިހާބުގައި އެހެން ޕާޓީތަކުގެ ކެންޑިޑޭޓުންގެ ކެމްޕެއިންގައި ބައިވެރިވެފައިވާ ކަމަށް ބުނެ އެވެ.
އެކަމާ ގުޅޭ ގޮތުން މުހައްމަދު އިބްރާހިމް "އަދަދު" އާ ވާހަކަ ދައްކަމުން ބުނީ އޭނާގެ ކެންޑިޑެންސީ ބާތިލުކުރިކަން އެންގީ ކުރިމަތިލުމުގެ މުއްދަތު ހަމަވި ފަހުން ކަމަށާއި ނަމަވެސް މައްސަލަ އިތުރަށް ބޮޑުކުރަން ބޭނުން ނުވާ ކަމަށެވެ.
"ރިޔާސީ އިންތިހާބުގައި ތާއީދުކުރީ ރައީސް ސޯލިހުއަށް. ކެމްޕޭނުގައި އަމަލީ ގޮތުން ބައިވެރިވެސް ވިން. ސޯޝަލް މީޑިއާއިން އެކަމުގެ ހެކިވެސް ހުންނާނެ. މަޖިލިސް އިންތިހާބުގައި އެހެން ޕާޓީއަކުން ވާދަކުރި އާއިލާ މީހަކަށް ތާއީދުކޮށް ސޯޝަލް މީޑިއާގައި ޕޯސްޓު ޝެއާކުރިން. އެކަމަކު ކެމްޕޭނުގައި އަމަލީ ގޮތުން ބައިވެރި ނުވަން. ހުރީ ވެސް ގައުމުން ބޭރުގައި،" އޭނާ ބުންޏެވެ.
މުހައްމަދު އިބްރާހިމް ބުނީ ޕާޓީން މިގޮތަށް ނިންމި ނަމަވެސް، ޕާޓީ ދޫކޮށްލުމުގެ އެއްވެސް ވިސްނުމެއް ނެތް ކަމަށެވެ. އޭނާއަކީ އުމުރުން 18 އަހަރުން ފެށިގެން އެމްޑީޕީގައި ވަރަށް ލޯތްބާއެކު މަސައްކަތް ކުރަމުން އަންނަ މީހެއް ކަމަށް ވެސް އިބްރާހިމް ބުންޏެވެ.
ސޯޝަލް މީޑިއާގައި ފާޅުކުރި ޝުއޫރަކުން ޓިކެޓު އަތުލުމުން ހިތްހަމަ ނުޖެހޭ ކަމަށާއި ޕާޓީއަށްޓަކައި ވަރަށް ގުރުބާނީތަކެއް ވެފައި ހުންނާނެ ކަމަށް ވެސް އޭނާ ބުނި އެވެ.
މުހައްމަދު އިބްރާހިމް ވަނީ އެމްޑީޕީގެ ޓީކެޓުގައި ދަނގެތި ދާއިރާއަށް 19 ވަނަ މަޖިލީހުގައި ވާދަކޮށްފަ އެވެ. ނަމަވެސް އިންތިހާބު ކާމިޔާބުކުރެވިފައެއް ނުވެ އެވެ.
