ރައްޔިތުންގެ މަޖިލީހަށް އެމްޑީޕީން ހުށަހަޅާ ކުއްލި މައްސަލަތައް ޕީއެންސީ ސަރުކާރުގެ ސުޕަ މެޖޯރިޓީ އޮތް މަޖިލީހުން ބޭރުކުރަނީ މައިނޯރިޓީ ޕާޓީގެ އަޑު ކަނޑުވާލުމަށް ކަމަށް އެމްޑީޕީގެ ޕާލިމެންޓްރީ ގްރޫޕުން މިއަދު ބުނެފި އެވެ.
އެމްޑީޕީން މި ހަފުތާގައި ރައްޔިތުންގެ ކަންބޮޑުވުން ހުރި ދެ ކުއްލި މައްސަލަ މަޖިލީހަށް ހުށަހެޅި އެވެ. އެއީ ބޭރުގައި ތިބި ދިވެހި ކިޔަވާ ކުދިންނަށް ދޭ ފައިސާ ޖަމާނުކުރާ މައްސަލަ އާއި ދައުލަތުގެ ކުންފުނިތަކުގެ ކުދި ވަޒީފާތަކުން މީހުން ވަކިކޮށް، ބޮޑެތި މުސާރަ ލިބޭ މަގާމުތަކަށް މީހުން އިތުރުކުރާތީ ހުށަހެޅި މައްސަލަ އެވެ.
ޕީއެންސީގެ މެމްބަރުން ނިންމީ މި ދެ މައްސަލަ ވެސް ބަލައިނުގަތުމަށެވެ.
މިކަމާ ގުޅޭ ގޮތުން އެމްޑީޕީގެ ޕާލިމެންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި ކެންދޫ ދާއިރާގެ މެންބަރު މައުރޫފު ޒާކިރު ވިދާޅުވީ އެމްޑީޕީން މަޖިލީހަށް ހުށަހަޅާ ކުއްލި މައްސަލަ ވަގުތު ބޭކާރު ކުރާ ކަމަށް އުޒުރު ދައްކައި ސަރުކާރު ހިންގާ ޕާޓީން ބޭރުކޮށްލަނީ މަޖިލީހުގެ ސުޕަ މެޖޯރިޓީ ނަހަމަ ގޮތުގައި ބޭނުންކޮށްގެން ކަމަށެވެ.
"އިއްޔެ މަޖިލީހުގެ ބަހުސްގައި އަދި މިއަދު މަޖިލީހުގެ ބަހުސްގައި ވެސް މަޖިލީހުގެ ބައެއް މެންބަރު ހާއްސަކޮށް ޕީއެންސީއަށް ނިސްބަތްވާ މެންބަރުން ކުއްލި މައްސަލަ ގަރާރުފަދަ މައްސަލަތައް މަޖިލީހަށް ހުށަހެޅުން ހަނިކުރަން ނުވަތަ ލިމިޓްކުރުމަށް ނުވަތަ ހުށަނޭޅޭ ގޮތަށް ގަވައިދު އިސްލާހު ކުރުމަށް ބާރު ލިބޭ ގޮތަށް ވާހަކަ ދައްކަމުން ދިޔުމަކީ އަޅުގަނޑުމެން އެމްޑީޕީ ޕީޖީން އިންތިހާއަށް ކަންބޮޑުވާ ކަމެއް އަދި މައިނޯރިޓީގެ އަޑު ކަނޑުވާލާނެކަމުގެ އިޝާރާތެއް ގޮތުގައި ގަބޫލުކުރަން،" އޭނާ ވިދާޅުވި އެވެ.
މި ހިނގާ 20 ވަނަ މަޖިލީހަކީ ނަމޫނާ މަޖިލީހެއް ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެފައިވީ ނަމަވެސް، މައިނޯރިޓީއަށް ޖާގަ ނުދޭތީ އެކަމާ މެދު މިހާރު ސުވާލު އުފެދޭ ކަމަށް މައުރޫފް ވިދާޅުވި އެވެ.
އެމްޑީޕީ ޕީޖީ ގްރޫޕްގެ ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް މި މައްސަލައިގައި ވިދާޅުވީ ރައްޔިތުންގެ ފަރާތުން އަންނަ ކަންބޮޑުވުންތައް މަޖިލީހަށް ހުށަހަޅަން ހުރަސްއަޅަނީ މަޖިލީހުގެ މަސައްކަތަށް ހުރަސް އެޅޭތީ ކަމަށް ސަރުކާރުގެ މެންބަރުން ވިދާޅުވާ ކަމަށާއި ނަމަވެސް ސަރުކާރު މެންބަރުން މަޖިލީހުގައި ކުރާ ހަމައެކަނި ކަމަކީ ސަރުކާރަށް ސަނާ ކިޔުން ކަމަށެވެ.
"އެ ބޭފުޅުން ބޭނުންވާ ގޮތަކީ ފްލޯގައި ކުއްލި މައްސަލައެއް ވިޔަސް ގަރާރެއް ވިޔަސް އެހެން އެއްޗެއް ވިޔަސް އެބޭފުޅުންގެ މެންބަރުންނަށް ތެދުވެ ރައީސުލްޖުމްހޫރިއްޔާއަށް ސަނާ ކިޔާ. ސަރުކާރަށް ސަނާ ކިޔާ. އެގޮތަށް ސަނާ ނުކިޔޭ އެއްވެސް ކަމެއް މަޖިލީހުގެ ތެރެއިން ކުރާކަށް އެބޭފުޅުން ބޭނުންނުވާކަން އަޅުގަނޑުމެންނަށް ވަރަށް ބޮޑަށް ވެސް ފާހަގަވެގެންދިޔަ،" އޭނާ ވިދާޅުވި އެވެ.
ސަރުކާރުގެ މެންބަރުން މިފަދައިން އަމަލުކުރެއްވި ނަމަވެސް، އެމްޑީޕީން ކުރަމުންދާ މަސައްކަތަށް މަޑު ޖެހުމެއް ނާންނާނެކަން ފާހަގަކުރައްވާ ނާޒިލް ވިދާޅުވީ ރައްޔިތުންގެ ކަންބޮޑުވުންތައް މަޖިލިސް ތެރެއިން ގެނެސްދިނުމަށް ކުރެވެން އޮތް ހުރިހާ ކަމެއް ކުރާނެ ކަމަށެވެ.
