އިންޑިއާއިން ޕެރިޝަބަލް ކާގޯ ހިފައިގެންދާ ދާ ފުރަތަމަ ބޯޓު މާދަމާ އައްޑޫ ސިޓީގައި ބަނދަރުކުރާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ބުނެފި އެވެ.
އިންޑިއާގެ ޝިޕިން ކުންފުނިތަކާ ގުޅިގެން އައްޑޫ ސިޓީގެ ރައްޔިތުންނަށް ބޭނުންވާ އަވަހަށް ހަލާކުވާ ޒާތުގެ ކާގޯ ދާއިމީ ގޮތެއްގައި ގެންދެވޭނެ ގޮތް ހަމަ ޖެއްސީ އެމްޕީއެލްއާއި ހިތަދޫ ރީޖެނަލް ޕޯޓުން މަސައްކަތް ކޮށްގެންނެވެ.
އެމްޕީއެލްގެ ސީއީއޯ މުހައްމަދު ވަޖީހު އިބްރާހީމް "އަދަދު" އަށް ވިދާޅުވީ އައްޑޫއަށް ދާ ފުރަތަމަ ބޯޓުން ގެންނާނީ މޭވާ އާއި ތަރުކާރީގެ އިތުރުން ފިޔާ، އަލުވި ބިސް ކަމަށާއި އެ ބޯޓު މާދަމާ ރޭ 08:00 ޖަހާއިރަށް ސ. ހިތަދޫ ޕޯޓަށް ބަނދަރު ކުރާނެ ކަމަށެވެ.
މި ހިދުމަތް ދެމެހެއްޓިނިވި ގޮތެއްގައި އައްޑޫގެ ރައްޔިތުންނަށް ދިނުމަށް ކޮންމެ 15 ވަރަކަށް ދުވަހުން އައްޑޫއަށް ބޯޓެއް ފޮނުވައިދޭނެ ކަމުގެ ޔަގީންކަން އިންޑިއާގެ ޝިޕިން ކުންފުނިތަކުން ދީފައިވާ ކަމަށާއި ނަމަވެސް އެގޮތަށް ކުރެވޭނީ އައްޑޫގެ ވިޔަފާރިވެރިންގެ ޑިމާންޑާވެސް އެކުގައި ކަމަށް އޭނާ ވިދާޅުވި އެވެ.
"އައްޑޫއަށް ބޯޓެއް ދިޔުމަށް ވަކި އަދަދަކަށް ކާގޯ ބޯޓުގައި ހުންނަން ޖެހޭނެ. މިކަމުގެ ސަބަބުން ވަރަށް ބޮޑު ލުއިތަކެއް އައްޑޫގެ ރައްޔިތުންނަށް ލިބިގެންދާނެ. މާލެއަށް މުދާ ގެނައުމުގެ ބަދަލުގައި އިންޑިއާއިން ސީދާ އައްޑޫއަށް މުދާ ގެންދިޔުމުން ހިނގާ ހަރަދު ކުޑަވެގެންދާނެ. ތަރުކާރީ އަދި މޭވާފަދަ ތަކެތި އައްޑޫއަށް ދެން ލިބޭނީ ތާޒާކޮށް،" ވަޖީހު ވިދާޅުވި އެވެ.
މުދާތައް އައްޑޫއަށް ދާއިމީ ގޮތެއްގައި އިންޑިއާއިން ގެންދެވޭނެ މަގު ތަނަވަސް ކުރުމަށް އައްޑޫގެ ވިޔަފާރިވެރިންނާއެކު މަޝްވަރާތައް ކުރާނެ ކަމަށާއި މިކަން ފަހިވެގެންދިޔައީ އިންޑިއާގެ ޝިޕިން ކުންފުނިތަކުން އެދުނު ގޮތަށް ހިތަދޫ ޕޯޓުގެ ސެކިއުރިޓީ ކަންކަން ވަރުގަދަ ކޮށްގެން ކަމަށް އޭނާ ވިދާޅުވި އެވެ.
ވަޖީހު ވިދާޅުވީ އައްޑޫގެ ޕޯޓު ތަރައްގީ ކުރެވޭނީ އެތަނަށް ދާއިމީ ގޮތެއްގައި ބޭރުގެ ބޯޓު ފަހަރު ގޮސްގެން ކަމަށާއި އެގޮތުން އިކޮނޮމިކް އެކްޓިވިޓީސްތައް އެތަނުގައި އިތުރުކޮށް ކުރިއަށް އޮތްތަނުގައި އެހެން ތަންތަނުން ވެސް މުދާ ސީދާ އައްޑޫއަށް ގެންދިޔުމަކީ އަމާޒެއް ކަމަށެވެ.
ކާބޯތަކެތީގެ އިތުރުން ބޯޓުތަކުން އެހެނިހެން މުދާތައް އެތެރެ ކުރުމުގެ ފުރުސަތު ވެސް ވިޔަފާރިތަކަށް ފަހިކޮށްދީފައިވާނެ ކަމަށް އޭނާ ވިދާޅުވި އެވެ.
