ދައުލަތުގެ ކުންފުނިތަކުގެ ކުދި ވަޒީފާތަކުން މީހުން ވަކިކޮށް، ބޮޑެތި މުސާރަ ލިބޭ މަގާމުތަކަށް މީހުން އިތުރުކުރާތީ ކަންބޮޑުވުން ފާޅުކޮށް، އެކަން ހުއްޓައިލަން ސަރުކާރަށް ގޮވާލައި، ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ މަޖިލީހަށް ބަލައިނުގަނެ ބޭރުކޮށްލައިފި އެވެ.
ކެންދޫ ދާއިރާގެ އެމްޑީޕީ މެންބަރު މައުރޫފު ޒާކިރު ހުށަހެޅުއްވި އެ މައްސަލާގައި ވިދާޅުވީ އާދައިގެ ސިޔާސީ ގިނަ މަގާމުތަކަށާއި ސަރުކާރު ހިއްސާވާ ކުންފުނިތަކަށް، ބޮޑެތި މުސާރައިގައި މީހުން އިތުރުކުރަމުން ދަނީ ހައްދެއް ނެތި ކަމަށެވެ. ހަމަ އެއާ އެކު ސަރުކާރުގެ ކުންފުނިތަކުގެ އާދައިގެ މަގާމުތަކުން މީހުން ވަކިކުރަމުންދާ ކަމަށް ވެސް އޭނާ ތުހުމަތުކުރެއްވި އެވެ.
ދައުލަތުގެ މިއަހަރުގެ ބަޖެޓަށް ފައިސާ ހޯދުމުގައި ދަތިތަކެއް ކުރިމަތިވެފައިވާތީ ސަރުކާރުގެ ރިކަރެންޓް ހަރަދުކުރުމަށް ސިޔާސީ މަގާމުތައް މަދުކޮށް، ގިނަ ފިޔަވަޅުތަކެއް އަަޅަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާކަން، ކުއްލި މައްސަލާގައި މައުރޫފް ފާހަގަކުރެއްވި އެވެ. ސިޔާސީ މަގާމުތަކުގެ އަދަދު 700 އިން ދަށުގައި ހިފެހެއްޓުމަކީ ސަރުކާރުގެ ވައުދެއްކަން ވެސް އޭނާ ފާހަގަކުރެއްވި އެވެ.
"އެ އަދަދު [ސިޔާސީ މަގާމުތަކުގެ އަދަދު] ގާތްގަނޑަކަށް ދެހާހާ ގާތްކުރާކަމަށް ބައެއް ފަރާތްތަކުން ދަނީ ބުނަމުން. ރައީސުލް ޖުމްހޫރިއްޔާގެ ވާޖިބުތައް އަދާކުރުމަށް ޓަކައި ބޭނުންވާ މީހުން އައްޔަންކުރުމުގައި ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 115 ވަނަ މާއްދާގެ ޅ. އިން ރައީސުލްޖުމްހޫރިއްޔާއަށް ލިބިދީފައިވާ ބާރަކަށް ވީ ހިނދު، މިދަނޑިވަޅުގައި އެ ބާރުގެ ބޭނުން ނާޖާއިޒު ގޮތުގައި ހިފާ، އަދި އެމަނިކުފާނުގެ ވައުދުފުޅާ ހިލާފުވެ ސަރުކާރުން ދަނީ ސަރުކާރު ހިއްސާވާ ކުންފުނިތަކަށް މަސައްކަތާ އެކަށީގެންނުވާ ގިނަ އަދަދަކަށް ބޮޑެތި މުސާރަޔާ އެކު މީހުން އައްޔަންކޮށް، ސަރުކާރުގެ މަގާމުތަކަށް އެކަށީގެން ނުވާ އަދަދަކަށް މީހުން އައްޔަންކުރަމުން ކަމުގައި ދަންނަވަން،" ކުއްލި މައްސަލާގައި މައުރޫފު ވިދާޅުވި އެވެ.
އެގޮތަށް ކަންތަައް ކުރާ އިރު ސިޔާސީ މަގާމުތަކުުގެ އަދަދު ރައްޔިތުންގެ މަޖިލީހަށް ވެސް އެ މައުލޫމާތު ދީފައި ނުވާ ކަމަށް ވެސް އޭނާ ވިދާޅުވި އެވެ.
މައުރޫފު ހުށަހެޅުއްވި ކުއްލި މައްސަލަ މަޖިލީހަށް ބަލައިގަތުމާ މެދު މިއަދުގެ ޖަލްސާގައި ނެގި ވޯޓުގައި ބައިވެރިވެވަޑައިގެންނެވި 69 މެންބަރުންގެ ތެރެއިން 57 މެންބަރުން ވޯޓު ދެއްވީ އެ މައްސަލަ ބަލައިގަންނަން ނުފެންނަ ކަމަށެވެ. ބަލައިގަންނަން ފެންނަ ކަމަށް ވޯޓު ދެއްވީ 12 މެންބަރުންނެވެ.
