އެމްޑީޕީގެ ދާއިރާތަކުގެ ރައީސުން ހޮވަން ބާއްވާ އެތެރޭގެ އިންތިހާބުގައި ވާދަކުރުމުގެ ފުރުސަތު އެ ޕާޓީގެ ކުރީގެ ޗެއާޕާސަން ރީކޯ މޫސާމަނިކަށް ނުދިނުމުން އެ މައްސަލަ އިލެކްޝަންސް ކޮމިޝަން (އީސީ) އަށް ހުށަހަޅުއްވަން އޭނާ ނިންމަވައި އެވެ.
މޫސާ މަނިކު އެމްޑީޕީން ވަކިކުރުމަށް އެ ޕާޓީގެ ފިޔަވަޅު އަޅާ ކޮމިޓީން ނިންމީ ޑިސެމްބަރު 22، 2014 ގަ އެވެ. ސަބަބެއް ކަމުގައި އޭރު ޕާޓީއިން ބުނީ ޑިސެމްބަރު 14، 2014 ގައި އޮތް ރައްޔިތުން މަޖިލީހުގެ ޖަލްސާގައި ނެގި ވޯޓެއްގައި ޕާޓީގެ ވިޕްލައިނާ ހިލާފުވުމެވެ.
އޭރުގެ އުއްތަމަ ފަނޑިޔާރު އަހުމަދު ފާއިޒާއި ސުޕްރީމް ކޯޓުގެ އޭރުގެ ފަނޑިޔާރު (މިހާރު އުއްތަމަ ފަނޑިޔާރު) މުއުތަސިމް އަދުނާނު މަގާމުން ދުރުކުރަން ނެގި އެ ވޯޓުގައި އެމްޑީޕީގެ ވިޕްލައިނަކީ އެ ފަނޑިޔާރުން ދުރުކުރަން ނުފެންނަ ކަމަށް ވޯޓު ދިނުމަށެވެ. އެ ޖަލްސާގައި މޫސަ ހިމެނޭ ގޮތަށް ޖުމުލަ އެމްޑީޕީގެ ފަސް މެމްބަރުން ބައިވެރިވެވަޑައިނުގަންނަވަ އެވެ.
މޫސަ "އަދަދު" އަށް ވިދާޅުވި ގޮތުގައި ވާދަނުކުރެވޭ ގޮތަށް ނިންމި މައްސަލާގައި ކޯޓަށް ވަޑައިގެންނެވުމުގެ ބަދަލުގައި އެ މައްސަލަ އީސީއަށް ހުށަހަޅުއްވަނީ ސިޔާސީ ޕާޓީތަކުގެ ބެލެނިވެރި ފަރާތަކީ އެއީ ކަމަށް ވެފައި، އެމްޑީޕީ އިންތިހާބުގައި ވާދަކުރުމުގެ ފުރުސަތު އޭނާއަށް ނުދިނީ ކޯޓެއްގެ ނިންމުމަކާ ގުޅިގެން ކަމަށް ނުވާތީ އެވެ.
އިލެކްޝަންސް ކޮމިޝަނަށް މައްސަލަ ހުށަހަޅުއްވަނީ ގާނޫނުއަސާސީން ލިބިދޭ ހައްގަކަށް ހުރަސް އަޅާ ކަމަށް ގަބޫލުކުރެއްވޭތީ ކަމަށް ވެސް އޭނާ ވިދާޅުވި އެވެ.
އެމްޑީޕީގެ އެތެރޭގެ އިންތިހާބުގައި ވާދަނުކުރެވޭނެކަމަށް ބުނެ، އެޕާޓީން މޫސައަށް ފޮނުވި ސިޓީގައި ބުނެފައި އޮތީ އެ ޕާޓީން އޭނާ ވަކިކުރަން ނިންމާފައިވާ ނިންމުމުގައި ހަތަރު ފިޔަވަޅެއް އޮތެވެ.އޭގެ ތެރޭގައި, އޭނާ އަލުން އެ ޕާޓީއަށް ވަދެވަޑައިގެންފިނަމަ، އެ ދުވަހުން ފެށިގެން ފަސް އަހަރު ދުވަހަށް ޕާޓީގެ އެއްވެސް މަގާމެއް, އެއްވެސް ޕްރައިމަރީއެއްގައި ވާދަނުކުރެވޭނެކަން ބަޔާންކޮށްފައިވެ އެވެ.
"...މި ނިންމުމަށް ބަދަލެއްގެންނަން ނުފެންނަ ކަމަށް މިޕާޓީގެ އިސްތިއުނާފް ފަނޑިޔާރު މަޖިލިސް އިން ނިންމާފައިވާތީވެ މޫސާ މަނިކު މިޕާޓީއަށް ގުޅިވަޑައިގެންނެވި ދުވަސް ކަމަށްވާ 9 ނޮވެމްބަރ 2022 އިން ފެށިގެން 5 އަހަރުގެ މުއްދަތަށް މިޕާޓީގެ އެއްވެސް އިންތިހާބެއްގައި އަދި ޕްރައިމަރީއެއްގައި ބައިވެރިނުވެވޭނެތީވެ މާލޭ ސިޓީ ރައީސް ކަމަށް އެދި ހުށައެޅި ހުށައެޅުން ގަބޫކު ނުކުރާ ކަމުގައި ދެންނެވީމެވެ،" އެމްޑީޕީގެ އިންތިހާބު ކޮމިޓީން މޫސައަށް ފޮނުވި ސިޓީގައި ބުނެފައި އޮތެވެ.
އޭރު ވަކިކުރަން ނިންމި ނިންމުމަށް ބަލައި މޫސަ އަލުން އެމްޑީޕީއާ ގުޅިވަޑައިގަތް ތާރީހުން ފެށިގެން އޭނާއަށް އަލުން އަނބުރާ އެމްޑީޕީގެ ޕްރައިމަރީއެއްގައި ވާދަކުރެވޭނީ ނޮވެމްބަރު 9, 2027 ގެ ފަހުންނެވެ.
މޫސަ ވިދާޅުވި ގޮތުގައި އެމްޑީޕީން އޭރު ނިންމާފައި އޮތް ނިންމުން ގަބޫލުނުކުރައްވާ ސަބަބަކީ އެފަހަރުގެ ވިޕްލައިނާ ފަސް މެންބަރަކު ހިލާފުވި އިރު އޭނާއަށް އެކަނި އެގޮތަށް ފިޔަވަޅު އަޅާފައި ވާތީ އެވެ.
"މި މައްސަލާގައި އަޅުގަނޑު މިދަންނަވާ ވާހަކައަކީ އެއީ އަޅުގަނޑު އެކަނި ކުރިކަމެއް ނޫނޭ، ފަސްމީހުން ވޯޓަކާ [ވިޕަކާ] ހިލާފުވީ. އަޅުގަނޑު ޕާޓީއާ ދެކޮޅަކަށް ވޯޓެއް ނުދެން، ހަމަ އެކަނި ކުރި ކަމަކީ އެ ދުވަހު ވޯޓަށް ނުވަނީ،" މޫސަ ވިދާޅުވި އެވެ.
އޭނާ ގަބޫލުކުރައްވާ ގޮތުގައި އެމްޑީޕީގެ އެތެރޭގެ އިންތިހާބުގައި ވާދަކުރުމުގެ ފުރުސަތު އޭނާއަށް ނުދިނުމަކީ ގާނޫނު އަސާސީގެ 26 ވަނަ މާއްދާއާ ހިލާފަށް ކުރާ ކަމެކެވެ.
ގާނޫނުއަސާސީގެ އެ މާއްދާގައި އޮންނަނީ ގާނޫނުއަސާސީގައި އެހެން ގޮތަކަށް ބަޔާންނުކުރާހާ ހިނދަކު ކޮންމެ މީހަކަށް މެ ލިބޭނެ ހައްގުތަކެއްގެ ވާހަކަ އެވެ. އެމާއްދާގެ (ށ) ގައި އޮންނަނީ އިންތިހާބުތަކުގައި އެކި މަގާމުތަކަށް ކުރިމަތިލުމުގެ ހައްގެވެ.
