މޯލްޑިވްސް ލޯކަލް ކައުންސިލްސް އެސޯސިއޭޝަން (އެމްއެލްސީއޭ) ގެ ފުރަތަމަ ޖަލްސާ ބާއްވައި، ޗެއާޕާސަންއަކަށް ނ. އަތޮޅު ކައުންސިލްގެ ރައީސް މުހައްމަދު ބަޝީރު (ބައްޓޭ) އިންތިހާބުކޮށްފި އެވެ.
އެމްއެލްސީއޭއަކީ ދިވެހިރާއްޖޭގެ ސިޓީ، އަތޮޅު އަދި ރަށު ކައުންސިލްތަކުގެ ހިންގުން ހަރުދަނާކޮށް އެ މުއައްސަސާތަކުގެ މެދުގައި އެކި ކަންކަމުގައި ގުޅުން ބަދަހިކުރުމާއި، އެކުގައި ކަންކަން ހާސިލުކުރުމަށް މަޝްވަރާކުރުމުގެ މާހައުލެއް އުފެއްދުމުގެ މަގުސަދުގައި އުފެއްދި ޖަމިއްޔާއެކެވެ.
އެޕްރިލް 29، ގައި ރަޖިސްޓްރީކުރި މި ޖަމިއްޔާގެ މެންބަރަކަށް ވެވޭނީ ދިވެހިރާއްޖޭގެ ސިޓީ، އަތޮޅު، އަދި ރަށު ކައުންސިލްތަކަށެވެ.
ބ. ކަމަދޫގައި ބޭއްވި އެ ޖަމިއްޔާގެ ފުރަތަމަ އާންމު ޖަލްސާގައި ވަނީ، ޖަމިއްޔާގެ ހިންގާ ކޮމިޓީގެ މަގާމުތަކަށް މެންބަރުން އިންތިހާބުކޮށްފަ އެވެ.
އެމްއެލްސީއޭގެ ހިންގާ ކޮމިޓީގައި ހިމެނެނީ ޗެއާޕާސަން، ސިޓީ ކައުންސިލްތައް ތަމްސީލުކުރާ ދެ މެންބަރުން، އަދި އަތޮޅު ކައުންސިލްތައް ތަމްސީލުކުރާ ތިން މެންބަރުންނާއި ރަށު ކައުންސިލްތައް ތަމްސީލުކުރާ ތިން މެންބަރުންނެވެ.
ހިންގާ ކޮމިޓީގެ މަގާމުތަކަށް އިންތިހާބުކުރި ކައުންސިލް މެންބަރުން:
- ޗެއާޕާސަން: ނ. އަތޮޅު ކައުންސިލްގެ ރައީސް މުހައްމަދު ބަޝީރު
- ސިޓީ ކައުންސިލްތައް ތަމްސީލުކުރާ މެންބަރު: ކުޅުދުއްފުށި ސިޓީގެ މޭޔަރ މުހައްމަދު އާތިފު
- އަތޮޅު ކައުންސިލްތައް ތަމްސީލުކުރާ މެންބަރު: ބ. އަތޮޅު ކައުންސިލްގެ ރައީސް އަހުމަދު އަފްރާހު
- އަތޮޅު ކައުންސިލްތައް ތަމްސީލުކުރާ މެންބަރު: ލ. އަތޮޅު ކައުންސިލްގެ ރައީސް އިސްމާއިލް އަލީ
- އަތޮޅު ކައުންސިލްތައް ތަމްސީލުކުރާ މެންބަރު: ހއ. އަތޮޅު ކައުންސިލްގެ ރައީސް މޫސާ ޝަފީގު
- ރަށު ކައުންސިލްތައް ތަމްސީލުކުރާ މެންބަރު: ބ. ކިހާދޫ ކައުންސިލްގެ ރައީސް ހުސައިން ޝާފިއު
- ރަށު ކައުންސިލްތައް ތަމްސީލުކުރާ މެންބަރު: ނ. ކެނދިކުޅުދޫ ކައުންސިލްގެ ރައީސް މުޙައްމަދު ރައުފު
- ރަށު ކައުންސިލްތައް ތަމްސީލުކުރާ މެންބަރު: ހދ. ހަނިމާދޫ ކައުންސިލްގެ ރައީސް އަބްދުއްސައްތާރު ހަސަން
ޖަމިއްޔާގެ ޗެއާ ބަޝީރު ވިދާޅުވީ މިހަރަކާތް ގެތިގެން މިދަނީ މުސްތަގިއްލުކަމާއެކު ސީދާ މަހަލީ ކައުންސިލްތަކުން ހިންގެން އޮތް ހަރަކާތެއްގޮތުގައި ކަމަށާއި، އެހެންކަމުން ރާއްޖޭގެ ބަންޑާރަ ވަސީލަތްތައް ސިޔާސީ ގޮތުންނާ އަދި އިގްތިސާދީ ގޮތުން ވެސް ދިވެހިންނަށް އަނބުރާ ވާރުތަކޮށްދެވޭނެ ހިތްވަރު އަބަދުމެ ކައުންސިލްތަކަށް ލިބިދޭނެކަން ޔަގީންކުރާ ކަމަށެވެ.
މި ޖަލްސާގައި ބައިވެރިވެވަޑައިގެން މިނިސްޓާ އޮފް ސިޓީސް، ލޯކަލް ގަވަމަންޓް އާދަމް ޝަރީފު ވަނީ މި ފަދަ ޖަމިއްޔާއެއްގެ މުހިންމުކަން ފާހަގަކޮށް، ދިވެހިރާއްޖޭގެ ލާމަރުކަޒީ ނިޒާމު އިތުރަށް ހަރުދަނާކުރަން ކުރަން ހުރި މަސައްކަތްތަކަށް އިތުރު ކުރިއެރުންތަކެއް މި ޖަމިއްޔާގެ ފަރާތުން ލިބޭނެ ކަމަށް އުންމީދުކުރާ ކަމަށް ވިދާޅުވެފަ އެވެ.
ލޯކަލް ކައުންސިލްތަކަކީ ދެމެހެއްޓެނިވި ތަރައްގީއަށާއި ރައްޔިތުންގެ ބޭނުންތަކަށް އިސްކަންދީގެން ޕްލޭންތައް އެކަށައަޅާ މުއައްސަސާތަކަކަށް ހެދުމަށް ބާރުއެޅުމަށާއި، ލާމަރުކަޒީ އުސޫލުތަކާ އެއްގޮތަށް ކައުންސިލްތައް ހިންގައި، ހާމަކަންބޮޑު ގޮތެއްގައި ރައްޔިތުންގެ ކަންކަން ނިންމުމަށް ބާރުއެޅުމަށް މަސައްކަތްކުރުމަކީ ވެސް އެމްއެލްސީއޭގެ މަގުސަދުތަކުގެ ތެރޭގައި ހިމެނޭ ކަންކަމެވެ.
