މާލީ ގޮތުން ފައިދާވާ ކުންފުންޏަކަށް ހެދުމަށްޓަކައި ހަރަދު ކުޑަކުރުމަށް ފިޔަވަޅުތަކެއް އަޅަން ނިންމާފައިވާ ރޯޑު ޑިވެލޮޕްމެންޓު ކޯޕަރޭޝަނަށް ބޮޑު މުސާރާގައި ދެ ކޮންސަލްޓެންޓުން ނަގައިފި އެވެ.
ސަރުކާރުގެ ސައްތައިން ސައްތަ ހިއްސާ އޮންނަ އާރުޑީސީއިން ހަރަދުކުޑަކުރުމަށް ނިންމައި މުވައްޒަފުންނަށް ޖުލައި 4، ގައި މެމޯއެއް ފޮނުވި އެވެ. އެ ކުންފުނިން މިފަދަ ފިޔަވަޅުތަކެއް އަޅަން ނިންމީ ސަރުކާރުގެ މާލީ ހާލަތު ގޯހުން ގޯހަށްދާ މި ދަނޑިވަޅުގައި، ހަރަދު ކުޑަކުރުމަށް ސަރުކާރުން ވެސް މަސައްކަތްތަކެއް ފަށާފައިވާ ކަމަށް ބުނެފައި ވަނިކޮށެވެ.
ނަމަވެސް ހަމަ އެ ދުވަހު އާރުޑީސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ނަބީހު ވަނީ މުވައްޒަފުންނަށް އިތުރު މެމޯއެއް ފޮނުވާފަ އެވެ.
ކުންފުނީގެ ހިއުމަން ރިސޯސަސް މަސައްކަތްތަކާއި ރިޕެއާ އެންޑް މެއިންޓަނަންސްގެ މަސައްކަތްތައް ތަރުތީބުކުރުމަށް އަލަށް ނަގާފައިވާ ދެ ކޮންސަލްޓެންޓުންގެ މަސައްކަތަށް އެއްބާރުލުން ދިނުމަށް ވަނީ އެ މެމޯގައި އެދިފައިވެ އެވެ. ރިޕެއާ އެންޑް މެއިންޓަނަންސް ކޮންސަލްޓަންޓަކަށް ނަގާފައިވަނީ މޭޖާ ރިޓަޔާޑް އަލީ ނަޖީބް އެވެ. އެޗްއާރު ކޮންސަލްޓަންޓަކަށް ނަގާފައިވަނީ ޣުފްރާން އަބްދުލްޣަނީ އެވެ.
މިކަމާ ގުޅިގެން "އަދަދު" އިން ސުވާލުކުރުމުން ޑީއެމްޑީ ނަބީހު ވިދާޅުވީ، އެޗްއާރު ކޮންސަލްޓަންޓު ނެގީ މިހާރު ހުރި ޕޮލިސީތައް މުރާޖައާކޮށް ކުންފުނިން ހަދާފައިވާ ސްޓްރެޓެޖިކް ޕްލޭނާ އެއްގޮތަށް ކުންފުނި ބަށްޓަން ކުރުމުގެ މަސައްކަތަށް ކޮންސަލްޓެންސީ ދިނުމުގެ ގޮތުން ކަމަށެވެ.
އަދި، ރިޕެއާ އެންޑް މެއިންޓަނަންސް ކޮންސަލްޓެންޓެއް ނެގީ ވެހިކަލް މެއިންޓަނަންސް ފަދަ މަސައްކަތްތައް ފުޅާކުރުމަށް ކުރެވޭ މަސައްކަތުގެ ދަށުން ކަމަށްވެސް ވިދާޅުވެ އެވެ. އެ ދެ ކޮންސަލްޓެންޓުން ނަގަން މިދިޔަ ޖެނުއަރީ މަހު އޮތީ ނިންމާފައި ކަމަށް ވެސް އޭނާ ވިދާޅުވި އެވެ.
"ކޮންސަލްޓަންޓަކަށް [މުސާރައިގެ ގޮތުގައި] އުޅޭނީ ގާތްގަނޑަކަށް 35،000ރ. ވަރު" މުސާރައާ ގުޅޭގޮތުން ސުވާލުކުރުމުން ނަބީހު ވިދާޅުވި އެވެ. އެ މީހުން ނަގާފައިވަނީ މަދުވެގެން އަހަރެއްހާ ދުވަހުގެ މުއްދަތަކަށެވެ. އެހެންކަމުން ދެ ކޮންސަލްޓުންގެ މުސާރައިގެ ގޮތުގައި ކުރިއަށް އޮތް އަހަރު އާރުޑީސީއިން 840،000ރ. ހަރަދުކުރާނެ އެވެ.
އާރުޑީސީއިން ބޮޑު މުސާރާގައި ދެ ކޮންސަލްޓަންޓުން ނަގާފައި މިވަނީ އެ ކުންފުނީގެ ބައެއް މުވައްޒަފުން 'ހަރަދު ކުޑަކުރުމުގެ' ގޮތުން ވަޒީފާއިން ވަކިކުރަމުންދާ ކަމުގެ އަޑުތައްވެސް ފެތުރިފައި ވަނިކޮށެވެ.
ނަމަވެސް ޑީއެމްޑީ ވިދާޅުވީ މި ފަހުން މުވައްޒަފުން ވަކިކޮށްފައިވަނީ ކުންފުނީގެ އެޗްއާރު ޕޮލިސީތަކާ އެއްގޮތަށް ކަމަށާއި އޭގެ ތެރޭގައި ހިމެނޭނީ 60 ދުވަހަށްވުރެ ގިނަ ދުވަހު ވަޒީފާއަށް ނުނިކުންނަށް މުވައްޒަފުން ކަމަށެވެ.
