ދަރިމައިވުމާ ގުޅޭ ފަރުވާއެއް ކަމަށްވާ އައީވީއެފްގެ ފަރުވާ އާސަންދައިގެ ދަށުން ލިބޭ 37 މީހުން ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ކަނޑައަޅައިފި އެވެ.
އައިވީއެފްގެ ފަރުވާ ކުރުމަށް ދަތިވާ ފަރާތްތަކުން ދައުލަތުގެ އެހީއަށް އެދި ހުށަހަޅަން ފުރުސަތު ހުޅުވާލުމުން މިދިޔަ މެއި 15، ގެ ނިޔަލަށް 153 މީހުން ފޯމް ހުށަހެޅި އެވެ.
އެންސްޕާއިން ކުރި އިއުލާނެއްގައި ބުނީ މި އަހަރު އައިވީއެފް ފަރުވާގެ އެހީ 100 ދެމެފިރިންނަށް ދިނުމަށް ހަމަޖެހިފައިވާއިރު، ފުރަތަމަ ބުރުގައި އެހީ ދޭނީ ޝަރުތު ހަމަވެފައިވާ 37 މީހުންނަށެވެ.
އެހީ ހަމަޖެހިފައިވާ މީހުންނަށް ޖުލައި 30، ގެ ކުރިން ފަރުވާ ކުރިއަށް ގެންދާނެ ގޮތުގެ ޕްލޭނެއް ހިއްސާ ކުރުމާ ގުޅޭ ގޮތުން އެންސްޕާއިން މައުލޫމާތު ދޭނެ ކަމަށް އެ އެޖެންސީން ބުންޏެވެ.
މީގެއިތުރުން ލިސްޓުގައި ޝަރުތު ހަމަނުވާ ކަމަށް ކަނޑައަޅާފައިވާ މީހުންގެ ތެރެއިން ހާލަތު ބަދަލުވެފައިވާ ފަރާތްތަކާއި، އައިވީއެފްގެ އެހީއަށް އެދި އަލުން ހުށަހަޅަން ބޭނުންވާ މީހުންނަށް ޖުލައި، 31 ގެ ނިޔަލަށް ފުރުސަތު ވަނީ ހުޅުވާލާފަ އެވެ.
މި ލިސްޓާ ގުޅިގެން ޝަކުވާ ހުށަހެޅުމަށް ބޭނުންވާ ފަރާތްތަކުން ޖުލައި، 10 ގެ 14:00 ގެ ކުރިން Complaints@.gov.mv އަށް އީމެއިލް މެދުވެރިކޮށް ޝަކުވާ ހުށަހަޅަން ވަނީ ފުރުސަތު ހުޅުވާލާފަ އެވެ.
މި ލިސްޓަށް ހުށަހަޅާ ޝަކުވާތަކަށް ބެލުމަށްފަހު، މުރާޖާ ކުރެވިފައިވާ ލިސްޓު ޖުލައި، 15 ގައި ނެރުމަށް ވަނީ ހަމަޖެހިފަ އެވެ.
