ރިޔާސީ އިންތިހާބުގެ ކެމްޕެއިނުގައި ރައީސް ޑރ. މުހައްމަދު އިގްތިސާދާ ބެހޭ ގޮތުން ވާހަކަ ދެއްކެވީ އަދި ބައެއް ވައުދުތައް ވެވަޑައިގެންނެވީ ކަން އޮތް ގޮތް އެނގިވަޑައިނުގަންނަވަނީސް ކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް މިއަދު ވިދާޅުވެއްޖެ އެވެ.
ދައުލަތުގެ ދަރަންޏާ ބެހޭ ބިލަށް ވާހަކަ ދައްކަވަމުން، "އިގްތިސާދީ ހާލަތާމެދު ކަންބޮޑުވުމެއް ނެތް" ކަމަށް ވިދާޅުވެ ރައީސް ވިދާޅުވެފައި އޮތް ވާހަކައެއް އެމްޑީޕީގެ މެންބަރަކު ނަކަލު ކޮށްލުމުން އައްބާސް ވިދާޅުވީ އެފަދަ ވާހަކަތައް ރައީސް މުއިއްޒު ދެއްކެވީ ބައެއް އެގްރިމެންޓުތައް ލޮލަށް ނުފެންނާތީ "ވިދާޅުވެވުނު" ވާހަކަތަކެއް ކަމަށެވެ.
"އިއްޒަތްތެރި މެންބަރު އެ ދައްކަވާ ވާހަކަތަކަށް ރިއާޔަތްކޮށް އެއްޗެއް ދަންނަވާ ނަމަ ދަންނަވާލެވޭނީ އެއިރުގެ ރިޔާސީ ކެންޑިޑޭޓު މިހާރުގެ އިއްޒަތްތެރި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެއިރު ރައްޔިތުންނާ މުހާތަބުކޮށް ވެވަޑައިގެންނެވި ވައުދުތަކަކީ އެއިރުގެ ސަރުކާރުން ސިއްރުކޮށްފައި ހުރި ހުރިހާ އެގްރިމެންޓުތަކެއް ލޮލަށް ނުފެންނާތީ، އެ އެއްޗެހިތައް ނުފެންނާތީ ވިދާޅުވެވުނު ވިދާޅުވުންތަކެއްކަމުގައި ދަންނަވަން،" އައްބާސް ވިދާޅުވި އެވެ.
ދައުލަތުގެ ދަރަންޏާ ބެހޭ ބިލު ހުށަހަޅަމުން ސަރުކާރު ހިންގާ ޕީއެންސީގެ މެންބަރުން ވަނީ ކުރީގެ ސަރުކާރަށް ވަރަށް ބޮޑަށް ފާޑުކިޔައިފަ އެވެ. އޭގެ ރައްދުގައި ގަލޮޅު ދެކުނު ދާއިރާގެ މެންބަރު މީކާއިލް ނަސީމް ނަކަލުކޮށްލީ ރައީސް މުއިއްޒު "އިގްތިސާދީ ހާލަތާމެދު ކަންބޮޑުވުމެއް ނެތް" ކަމަށް ރައީސް މުއިއްޒު ކުރިން ވިދާޅުވެފައި އޮތް ވާހަކަ އެވެ.
"[ރައީސް މުއިއްޒު ވިދާޅުވީ] ކަންކަން ކުރެވޭ ގޮތަށް ކޮންމެ ވަދޭ ފައިސާ. އަދި ދައްކަން ހުރި ލޯނުތަކަށް ފައިސާ ހޯދޭނެ ގޮތްތައް އަޅުގަނޑުމެންނަށް އެބަހުރި ފަހިވެފަ. މިހާރު ވެސް އަޅުގަނޑުމެންނާ ގާތް ރައްޓެހި ދިމަދިމާލުން އެބަހުރި ގްރީން ސިގްނަލް ލިބިފަ ދައްކަން ހުރި ބައެއް ބޮޑެތި ލޯނުތައް ރީފައިނޭންސް ކުރެވޭނެ ގޮތްތައް ހުރީ ހަމަޖެހިފައި. އެހެންވީމާ އެއްވެސް ކަންބޮޑުވުމެއް ނެތް. އެއްވެސް ކަންބޮޑުވުމެއް ނެތް އަޅުގަނޑުމެންނަށް ގައުމުގެ އިގްތިސާދީ ހާލަތާމެދު،" ރައީސްގެ ވާހަކަ ކޯޓު ކުރަމުން މީކާއިލް ވިދާޅުވި އެވެ.
ދައުލަތުގެ ދަރަންޏާ ބެހޭ ބިލާ ގުޅޭ ގޮތުން ވާހަކަ ދައްކަވަމުން މީކާއިލް އިތުރަށް ވިދާޅުވީ މި ސަރުކާރުން އިގްތިސާދީ ހާލަތަށް ނުބަލައި ވަރަށް ބައިވަރު، ބޭކާރު ހަރަދުތައް ކުރި ކަމަށެވެ. އެގޮތުން ރައްޔިތުންގެ މަޖިލީހުގެ ކެމްޕެއިނާ ގުޅިގެން ވޯޓު ހޯދަން ވަރަށް ގިނަ މުވައްޒަފުން ސަރުކާރަށް އިތުރު ކުރި ކަމަށް ވެސް މީކާއީލް ވިދާޅުވި އެވެ.
މިއަދު ހުށަހެޅި ދައުލަތުގެ ދަރަންޏާ ބެހޭ ބިލުގައި ދައުލަތުގެ ދަރަނި ނެގުމާ ބެހޭ އުސޫލުތަކާއި ދަރަނި މެނޭޖް ކުރުމާ ބެހޭ އުސޫލުތަކާއި ލޯކަލް ކައުންސިލްތަކާއި ދައުލަތުގެ ކުންފުނިތަކުން ނަގާ ދަރަންޏަށް ދައުލަތުގެ ސޮވިރިން ގެރެންޓި ދިނުމާ ބެހޭ އުސޫލުތަކާއި ދައުލަތުގެ ދަރަންޏާ ބެހޭ މައުލޫމާތު ހާމަކުރުމާއި ރިޕޯޓް ކުރުމާ ގުޅޭ އުސޫލުތައް ހިމެނޭނެ އެވެ.
މަޖިލީހުގެ ތަޅުމުގައި މިއަދު ވާހަކަ ދެއްކެވި ސަރުކާރު ހިންގާ ޕީއެންސީގެ އެހެން މެންބަރުން ވެސް ވަނީ ކުރީގެ ސަރުކާރަށް ވަރަށް ބޮޑެތި ފާޑުކިޔުންތައް އަމާޒުކޮށްފަ އެވެ. އެގޮތުން ކާށިދޫ ދާއިރާގެ މެންބަރު މުމްތަސިމް އިބްރާހިމް އާއި ހިތަދޫ މެދު ދާއިރާގެ މެންބަރު އަހުމަދު އަޒާން ވެސް ވަނީ އެމްޑީޕީގެ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ.
ދައުލަތުގެ ދަރަނި ބޮޑުވެ، އިގްތިސާދީ ހާލަތު ގޯސްވެފައި ވަނީ އެމްޑީޕީގެ ސަރުކާރުގެ ސަބަބުން ކަމަށް މި ސަރުކާރުން ބުނި ނަމަވެސް އިދިކޮޅު އެމްޑީޕީން ބުނަނީ ދަރަނި ބޮޑުވެ، އިގްސާދީ ހާލަތު ގޯސްވީ މި ސަރުކާރަށް މެނޭޖްކުރަން ނޭނގިގެން ކަމަށެވެ.
"އިންތިހާބުން ބަލިވުމުން ސަޕްލިމެންޓަރީ ބަޖެޓަށް ފައިސާ ހޯދަން އަޅުގަނޑުމެންނަށް ދަތިވި. އޭރު ވާހަކަ ދެއްކިން ޓްރާންސިޝަން ޕީރިއަޑްގައި. އެ ބޭފުޅުން ހަމަ ވަރަށް ޔަގީންކަން ދިން 200 މިލިއަން ޑޮލަރު ލިބޭނެ ކަމަށް. ހަމަ ނޮވެމްބަރު 17 ގައި ހުވާ ކުރާ ހިސާބުގައި 200 މިލިއަން ޑޮލަރު ލިބޭނެ ގޮތަށް ވާހަކަ ދެކެވުނީ," އިއްޔެ ބޭއްވި ނޫސްވެރިންގެ ބައްދަލުވުމެއްގައި ކުރީގެ ފައިނޭންސް މިނިސްޓަރު އިބްރާހިމް އަމީރު ވިދާޅުވި އެވެ.
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެން ވަރަށް ބޮޑެތި ހަރަދުތައް ކުރައްވަމުން ގޮސް ދައުލަތުގެ ހަރަދުތައް މަދު ކުރުމަށް ނިންމާފައިވާކަން މިދިޔަ ބުރާސްފަތި ދުވަހު އެމަނިކުފާނު ވަނީ އިއުލާނު ކުރައްވައިފަ އެވެ.
"ދައުލަތުގެ ހަރަދުތައް ކުޑަކުރުމަށްޓަކައި ގިނަ ފިޔަވަޅުތަކެއް އެޅުމަށްވަނީ ނިންމާފައި. އެގޮތުން، ސަރުކާރުގެ ރިކަރަންޓް ހަރަދު ކުޑަކުރުމަށް އެކި ފިޔަވަޅުތައް އެޅުން ހިމެނޭ. މީގެ ތެރޭގައި، ސިޔާސީ މަގާމުތަކުގެ އަދަދު މަދުކުރުމާއި، އެކި މުނާސަބަތުތަކުގައި ބާއްވާ ހަފުލާތަކަށް ކުރާ ހަރަދުތައް ކުޑަކުރުން ނުވަތަ ނުބޭއްވުން ހިމެނޭ،" ރައީސް މުއިއްޒު ވިދާޅުވި އެވެ.
