ރާއްޖެއަށް ކުރިމަތިވެފައިވާ މާލީ ދަތިތަކުން އަރައިގަތުމަށް ސަރުކާރުން އަޅަން ނިންމާފައިވާ ފިޔަވަޅުތަކުގެ ތެރެއިން ދައުލަތުގެ މާލިއްޔާއަށް ނުތަކާ ވަރަށް އައްޔަނުކޮށްފައިވާ ސިޔާސީ މުވައްޒަފުންގެ ތެރެއިން 400 މީހުން ވަކިކުރަން ސަރުކާރުން ނިންމާފައިވާކަން "އަދަދު" ނޫހަށް އެނގިއްޖެ އެވެ.
މި ސަރުކާރުގެ ސިޔާސީ މަގާމުތަކުގެ އަދަދު މިއަދާ ހަމައަށް ވެސް ހާމަކޮށްފައެއް ނުވެ އެވެ. މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" ނޫހަށް މިހައިތަނަށް ލިބިފައިވަނީ 12 މިނިސްޓްރީއެއްގައި ތިބި މުވައްޒަފުންގެ މައުލޫމާތެވެ. ބާކީ 10 މިނިސްޓްރީގައި ތިބީ ކިހާ އަދަދެއްގެ ސިޔާސީ މުވައްޒަފުން ކަމެއް ނޭނގެ އެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީއާ އެ މައުލޫމާތު ހިއްސާކުރުމަށް ފިނޭންސް މިނިސްޓަރުގެ އަރިހުން ކޮމިޓީގެ މެންބަރުން އެދިވަޑައިގަތުމުން ވެސް އެ މައުލޫމާތު ހާމަކޮށްފައި ނުވެ އެވެ.
"އަދަދު" ނޫހަށް މައުލޫމާތު ލިބިފައިވާ ގޮތުގައި ކޮންމެ މިނިސްޓްރީއަކުން ވެސް 25 ސިޔާސީ މުވައްޒަފުންގެ ލިސްޓެއް އެކުލަވައިލުމަށް ފަހު ރައީސް އޮފީހަށް ވަނީ ފޮނުވާފަ އެވެ. އެ ލިސްޓުގައި ނުހިމެނޭ މީހުން ވަޒީފާއިން ވަކިކުރާއިރު ފުރަތަމަ ރާޅުގައި 400 މުވައްޒަފުން ވަކިކުރާނެ ކަމަށް އެ ކަމުގެ މައުލޫމާތު ހިއްސާކުރެއްވި ސަރުކާރުގެ އިސް އޮފިޝަލަކު ވިދާޅުވި އެވެ.
މި ސަރުކާރުން ވެރިކަމަށް އައީ ސިޔާސީ މުވައްޒަފުންގެ އަދަދު 700 އަށްވުރެ ގިނަ ނުކުރާނެ ކަމުގެ ވައުދާ އެކުގަ އެވެ. ނަމަވެސް, "އަދަދު" ނޫހުން އެކި މަސްދަރުތަކުން ހޯދި ހޯދުންތަކުން އަންދާޒާ ކުރެވެނީ މި ސަރުކާރުގެ ސިޔާސީ މުވައްޒަފުންގެ އަދަދު 2,000 އާ ގާތްކުރާ ކަމަށެވެ.
