އައްޑޫ މީދޫގައި ހުންނަ މިފްކޯގެ އައްޑޫ ފިޝަރީޒް ކޮމްޕްލެކްސްގައި މަސްވެރިން ކުރަމުންދާ މުޒާހަރާގައި ރާއްޖޭގެ އެކި ކަންކޮޅުން މަސްވެރިން ބައިވެރިވުމަށް އައްޑޫގެ މަސްވެރިން ގޮވާލައިފި އެވެ.
މުޒާހަރާގައި އިސްކޮށް ހަރަކާތްތެރިވަމުން އަންނަ މަރަދޫ ރަހާ ދޯނީގެ އެން ކެޔޮޅު މުހައްމަދު ޝަމީޒް "އަދަދު" އާ ވާހަކަ ދައްކަމުން ބުނީ މި މުޒާހަރާއަކީ ހުރިހާ މަސްވެރިންގެ ހައްގުގައި ކުރަމުންދާ މުޒާހަރާއެއް ކަމަށާއި މުޒާހަރާގައި ރާއްޖޭގެ އެކި ކަންކޮޅުތަކުން މަސްވެރިން ބައިވެރިވުމަކީ ވަރަށް ބޮޑު އެދުމެއް ކަމަށެވެ.
މަސްވެރިންނަށް މި ސަރުކާރުން ވެފައިވާ ވައުދުތައް ނުފުއްދައި، މަސްވެރިންނަށް ދޭން ޖެހޭ ފައިސާ ނުދޭތީ އައްޑޫގައި މަސްވެރިން މުޒާހަރާ ކުރަމުން އަންނަތާ ހަފްތާއެއް ވެފައިވާއިރު، ބައެއް ރަށްރަށުގައި ވެސް މަސްވެރިންނަށް ފައިސާ ނުދޭތީ މުޒާހަރާ ކޮށްފައިވެ އެވެ.
"މުޒާހަރާ މި ކުރަނީ ހުރިހާ މަސްވެރިންގެ ހައްގުގައި. މިކަމުގައި ހުރިހާ މަސްވެރިން ބައިވެރިވުމަކީ އަޅުގަނޑުމެންގެ ވަރަށް ބޮޑު އެދުމެއް. މަސްވެރިންގެ ވެސް ހައްގުތަކެއް އޮންނަން އެބަ ޖެހޭ. އެ ހައްގުތައް ކަށަވަރު ކުރަން ސަރުކާރު ޖަވާބުދާރީ ކުރުވޭނީ ހުރިހާ މަސްވެރިން ގުޅިގެން،" ޝަމީޒް ބުންޏެވެ.
އައްޑޫގައި މަސްވެރިން ކުރަމުންދާ މުޒާހަރާއާ އެ މަސްވެރިންގެ އާއިލާތަކުން ގުޅިފައިވާއިރު، އެ މަސްވެރިން ބުނަމުންދަނީ ފައިސާ ނުލިބޭތީ އެ މަސްވެރިންގެ އާއިލާތައް ނިކަމެތިވެފައިވާ ކަމަށެވެ.
އައްޑޫގައި މުޒާހަރާ ކުރަމުންދާ މަސްވެރިންނަށް ސަރުކާރުން ޖަވާބެއް ނުދޭ ނަމަ މަސް ދޯނިތަކާއެކު މާލެއަށް މިސްރާބު ޖަހާނެ ކަމަށާއި މިއަދު ކޫއްޑޫއަށް ދާނެ ކަމަށް މުޒާހަރާ ކުރާ މަސްވެރިން ވަނީ ބުނެފަ އެވެ.
މަސްވެރިންނަށް ފައިސާ ނުދީގެން އަދި ލޭނު އެޅުމާ ދެކޮޅަށް މި މަހުގެ ތެރޭގައި ބޮޑު ކަންނެލި މަސްވެރިން ވެސް ކަނޑުމަތީގައި އިހުތިޖާޖުކޮށްފައިވެ އެވެ. އެ އިހުތިޖާޖުގައި 25 އެއްހާ ދޯނި ބައިވެރިވީއިރު، މުޒާހަރާ ހުއްޓާލީ ބައެއް ޑިމާންޑުތައް ސަރުކާރުން ގަބޫލުކުރުމުންނެވެ.
