ޔުއާން އަދި ރުފިޔާއިން ރާއްޖެ އާއި ޗައިނާއާ ދެމެދު ވިޔަފާރި ކުރެވޭ ގޮތަށް ކަރަންސީ ސެޓްލްމަންޓު އެއްބަސްވުމެއް ގާއިމުކުރުމަށް ދެ ގައުމުގެ މެދުގައި މަޝްވަރާކޮށްފި އެވެ.
އިކޮނޮމިކް މިނިސްޓަރު މުހައްމަދު ސައީދު މިވަގުތު ހުންނެވީ ޗައިނާގަ އެވެ. އޭނާ ވަނީ އިއްޔެ ޗައިނާގެ ކޮމާސް މިނިސްޓަރު ވަންގް ވެންޓާއޯއާ ބައްދަލުކުރައްވާފަ އެވެ. މި ބައްދަލުކުރެއްވުން އޮތީ ބެއިޖިންގައި މިހާރު ކުރިއަށްދާ ވޯލްޑް އިކޮނޮމިކް ފޯރަމްގެ ހަވާސާގަ އެވެ.
"މި ބައްދަލުވުމުގައި ޗައިނާ އާއި ރާއްޖެއާ ދެމެދު ސޮއިކުރެވިފައިވާ މިނިވަން ވިޔަފާރީގެ އެއްބަސްވުން ތަންފީޒުކުރަން ފެށުމަށްޓަކައި ކުރަންޖެހޭ ކަންކަން ވީ އެންމެ އަވަހަކަށް ފުރިހަމަ ކުރުމަށާއި, ރާއްޖެ އާއި ޗައިނާއާ ދެމެދު ފަސޭހައިން ވިޔަފާރި ކުރެވޭނެ ގޮތަށް, ކަރަންސީ ސެޓްލްމަންޓު ނިޒާމެއް ގާއިމުކުރުމުގެ މަޝްވަރާ ކުރެވިފައި," އިކޮނޮމިކް މިނިސްޓްރީން ނެރުނު ބަޔާނެއްގައި ބުނެފައިވެ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި ސަރުކާރުގެ އިސް ވަފުދެއް ޖެނުއަރީގައި ޗައިނާއަށް ކުރެއްވި ރަސްމީ ދަތުރުގައި، އެ ގައުމާ އެކު 20 އެއްބަސްވުމެއްގައި ސޮއިކުރި އެވެ. އޭގެ ތެރޭގައި ވިޔަފާރީގެ ގުޅުން ހަރުދަނާ ކުރުމުގެ އެއްބަސްވުންތައް ހިމެނެ އެވެ.
އިކޮނޮމިކް މިނިސްޓްރީން ޗައިނާއާއެކު ސޮއިކުރީ ހަތަރު އެއްބަސްވުމެއްގަ އެވެ. މި އެއްބަސްވުންތަކުގައި ރާއްޖޭގެ ފަރާތުން ސޮއިކުރެއްވީ މިނިސްޓަރު ސައީދު އެވެ. ނަމަވެސް, އެ އެއްބަސްވުންތައް ވަނީ ސިއްރުކޮށްފަ އެވެ.
