ރާއްޖޭގެ ވިޔަފާރި ބަނދަރު ބޭރުގެ ކުންފުންޏަކަށް ކުއްޔަށް ދިނުން ވެލާނާ އިންޓަނޭޝަނަލް އެއާޕޯޓު އިންޑިއާގެ ޖީއެމްއާރު ކުންފުންޏަށް ދިނުމާ އެއްފަދަ ކަމަށް ކުރީގެ ރައީސް އަބްދުﷲ ޔާމީން ވެސް ރޭ ވިދާޅުވެއްޖެ އެވެ.
ރައީސް ޔާމީނު މިނިވަންވެވަޑައިގަތުމަށްފަހު ޕޯޑިއަމެއްގެ ކުރިމައްޗަށް ހުއްޓިވަޑައިގެން ދެއްކެވި ފުރަތަމަ ވާހަކަފުޅުގައި އެމަނިކުފާނު ވިދާޅުވީ ސަރުކާރުން ކުރާ ރަނގަޅު ކަންތައްތައް ބަލައިގަންނާނެ ކަމަށެވެ. ނަމަވެސް ގޯސްކޮށް ހިނގާ ކަންކަން ބަލައި ނުގަންނަވާނެ ކަމަށް އެމަނިކުފާނު ވިދާޅުވި އެވެ.
"ކީއްވެގެންތޯ އަޅުގަނޑުމެން މިއަދު ގަބޫލު ކުރަންވީ އަޅުގަނޑުމެންގެ މާލޭގެ ޕޯޓު ވިއްކާލަން އުޅޭ މައްސަލަ، ކީއްވެގެންތޯ އަޅުގަނޑުމެން ގަބޫލު ކުރަންވީ އެއީ ރަނގަޅު ކަމެއް ކަމަށް؟ ސަރުކާރު ހިންގާ ޕާޓީގެ ބޮޑު އަގުލަބިއްޔަތު ރައްޔިތުންގެ މަޖިލީހުގައި އޮތަސް ރައްޔިތުންގެ މަޖިލީހުގެ ކޮންމެ މެންބަރަކު މިކަމުގެ ޒިންމާ އުފުއްލަވަން ޖެހޭނެ،" ޔާމީން ވިދާޅުވި އެވެ.
އެމަނިކުފާނު ވިދާޅުވީ ކުރީގެ ރައީސް ނަޝީދުގެ ވެރިކަމުގައި އިންޑިއާގެ ޖީއެމްއާރު ކުންފުންޏަށް ވެލާނާ އިންޓަނޭޝަނަލް އެއާޕޯޓު ކުއްޔަށް ދޫކުރުމުން އެކަމާ ވެސް އެންމެ ބޮޑަށް ދެކޮޅު ހެދީ ޕީޕީއެމުން ކަމަށާއި އެކަމަށް ހައްލެއް ހޯދީ އެތައް ރެޔަކު ނުކުމެ މަސައްކަތް ކޮށްގެން ކަމަށެވެ.
"އޭރު އަޅުގަނޑުމެން ދެއްކި ވާހަކަ މިއަދަކު ހަނދާނެއް ނެތް، މިއަދު އަޅުގަނޑުމެން މިއުޅެނީ އަޅުގަނޑުމެން ޕީޕީއެމް ވެރިކަމެއް އޮވެފައި އަދި ޕީއެންސީއޭ ކީ ނަމަވެސް ޕީޕީއެމްގެ ވެރިކަމެއްގައި މިއުޅެނީ މި ހަޑި މުޑުދާރު ކަންތައް ކުރަން، އަޅުގަނޑުމެން މިއުޅެނީ އަޅުގަނޑުމެންގެ ދެން އޮތް ޕޯޓު، އެކައްޗަކީ ވައިގެ ޕޯޓު އަނެކައްޗަކީ ކަނޑުމަގުގައި އޮތް ޕޯޓު، އޭތި ވިއްކާލަން މިއުޅެނީ،" ޔާމީން ވިދާޅުވި އެވެ.
އެމަނިކުފާނު ވިދާޅުވީ އަތުގައި އަގުހުރި މުދަލެއް އޮވެއްޖެ ނަމަ އޭތި ވިއްކައިލަން އުޅޭނީ ވިޔަފާރި ކުރަން އެންމެ ނޭނގޭ މީހާ ކަމަށާއި ދެން އެއަށްވުރެ ރަނގަޅަށް ވިޔަފާރި އެނގޭ މީހަކުވެއްޖެއްޔާ އުޅޭނީ އެ މުދާ ކުއްޔަށް ދޫކޮށްގެން މަންފާ ހޯދަން ކަމަށެވެ. ނަމަވެސް ވިޔަފާރީގެ ހިޔާލު ހުރެ ވިޔަފާރި ކުރަން އަސްލު އެނގޭ މީހަކު ނަމަ އެ މުދަލުން އަމިއްލައަށް ފައިދާ ހޯދޭނެ ގޮތެއް ހޯދާނެ ކަމަށް ޔާމީން ވިދާޅުވި އެވެ.
"އަޅުގަނޑުމެންގެ ޕޯޓު ވިއްކާލައިފައި އަޅުގަނޑުމެންގެ އެއާޕޯޓު ވިއްކާލައިފައި ދަރުމަވަންތަ ހޮސްޕިޓަލު ވިއްކާލައިފައި ދެން ބާކީ އޮންނާނީ ރައީސް އޮފީހާއި ބޮޑު ދިދައާ، އެހެންވީމާ ދެން ވެރިކަން ކުރަން އަންނަ ބަޔަކަށް، ކޯއްޗެއްތޯ އޮތީ،" ޔާމީން ވިދާޅުވި އެވެ.
އެމަނިކުފާނު ވިދާޅުވީ ޖީއެމްއާރަށް އެއާޕޯޓު ދޭން އުޅުނީމާ އެކަން ހުއްޓުވުމަށް މާލިއްޔަތު ގާނޫނަށް ޖުމްހޫރީ ޕާޓީގެ ލީޑަރު، ގާސިމް އިބްރާހިމް އޭރު އިސްލާހެއް ހުށަހެޅި ކަމަށެވެ. އެ އިސްލާހުގެ މަތިން މިއަދު ގާސިމް ހަނދާން ހުރިތޯ ވެސް ޔާމީން ސުވާލު ކުރެއްވި އެވެ.
އެއަށްފަހު ޔާމީން ވަނީ މަޖިލީހުގައި ތިއްބެވި ޕީއެންސީގެ މެންބަރުންނަށް ވެސް އިލްތިމާސްއެއް ކުރައްވައިފަ އެވެ.
އެގޮތުން އެމަނިކުފާނު ވިދާޅުވީ އެއް ޕާޓީއަކަށް ކިތަންމެ ބޮޑު އަގުލަބިއްޔަތެއް އޮތް ނަމަވެސް އެންމެ ފުރަތަމަ އިސް ކުރަންޖެހޭނީ ގައުމީ މަސްލަހަތު ކަމަށެވެ. އެހެންކަމުން ރާއްޖޭގެ ވިޔަފާރި ބަނދަރު ބޭރުގެ ކުންފުންޏަކަށް ކުއްޔަށް ދިނުމާ މަޖިލީހުގެ މެންބަރުން ވެސް ދެކޮޅު ހައްދަވަން ޖެހޭނެ ކަމަށް ޔާމީން ވިދާޅުވި އެވެ.
"މިއަދު މިދައްކަނީ ޕޯޓު ވިއްކާ ވާހަކަ، ރައްޔިތުންގެ މަޖިލީހުގައި ތިބި އަޅުގަނޑުމެންގެ ފިކުރުގެ މެންބަރުންނަށް އަޅުގަނޑު ދަންނަވާލާނަން، ވެރިކަން ކުރާ ޕާޓީގައި ތިއްބެވިޔަސް މިއަށް ސަމާލުވާށޭ، މިއީ ރައްޔިތުން އެއްގޮތަކަށް ވެސް ރުހޭނެ ކަމެއް ނޫން،" ޔާމީން ވިދާޅުވި އެވެ.
އެމަނިކުފާނުގެ ވާހަކަފުޅުގައި ވަނީ މި ސަރުކާރުން ފަށައި ކުރިއަށް ނުގެންދެވުނު ރަސްމާލެ ޕްރޮޖެކްޓަށާއި އިންޑިއާ ސިފައިންނާ ގުޅިގެން ރައީސް މުއިއްޒު ކަން ކުރެއްވި ގޮތަށް ވެސް ފާޑު ވިދާޅުފަ އެވެ.
ޔާމީން ވިދާޅުވީ މި ސަރުކާރު ވެސް އަދި އިދިކޮޅު އެމްޑީޕީ ވެސް ޒިންމާދާރު ކުރުވާނީ އެމަނިކުފާނުގެ ޕީއެންއެފުން ކަމަށެވެ.
