އައްޑޫ މަސްވެރިން ނިކުމެ, އެ އަތޮޅު ހުޅުދޫ-މީދޫގައި ހުންނަ މަސް ފެކްޓަރީ ކައިރީގައި ކުރަމުންދާ އިހުތިޖާޖާ އެ މަސްވެރިންގެ އާއިލާތަކުން ގުޅިއްޖެ އެވެ.
މަސްވެރިން ބާނާ، މިފްކޯއަށް ކިރާފައިވާ މަހަށް ލާރި ނުލިބޭ މައްސަލާގައި އައްޑޫގެ މަސްވެރިން މުޒާހަރާ ކުރަން ފެށީ މިދިޔަ ހަފުތާ ބަންދުގެ ތެރޭގަ އެވެ.
މުޒާހަރާގެ ތެރެއިން މަސްވެރިން ވަނީ މަސް ފެކްޓަރީން ކަރަންޓު ކަނޑާލާ އޮޕަރޭޝަންތައް ހުއްޓުމަކަށް ގެނެސްފަ އެވެ. މިފްކޯއިން ފެކްޓަރީއަށް މިއަދު އަލުން ކަރަންޓު ދިނީ ފުލުހުން މެދުވެރިކޮށްގެނެވެ.
މި މުޒާހަރާގައި ބައިވެރިވާ އައްޑޫ މަސްވެރިންގެ އާއިލާތަކުން ގުޅިފައިވަނީ މިއަދު ހަވީރެވެ.
އެގޮތުން މަސްވެރިންގެ އަނބިން ވަނީ އާއިލާއަށް ލިބެން ޖެހޭ ފައިސާ ނުލިބުމުގެ ސަބަބުން އުޅެން ޖެހޭ ހާލު ކިޔައިދީ، އެ މީހުންގެ އާއިލާތައް ދަރަނިވެރިވެފައިވާ ކަމަށް ބުނެފަ އެވެ.
"ކަރަންޓު ބިލު، ފެން ބިލު، ފޯނު ބިލު ނުދެއްކޭ، ފިހާރަތަކުންވެސް އެއްޗެހި ނަގަން ޖެހެނީ ދަރަންޏަށް،" ވާހަކަ ދެއްކި އަންހެނަކު ބުންޏެވެ.
މީގެއިތުރުން، މަސްވެރިންގެ މުޒާހަރާ ގަބޫލުނުކުރައްވާ ކަމަށާއި މަސްވެރިންގެ މައްސަލަތައް ސިޔާސީ ކޮށްފައިވާ ކަމަށް އައްޑޫ ހުޅުދޫ ދާއިރާގެ މެންބަރު މުހައްމަދު ޝާހިދު ވިދާޅުވި ވިދާޅުވުމަށް ވެސް މަސްވެރިންގެ އާއިލާތަކުން ވަނީ ރައްދުދީފަ އެވެ.
"ޝާހިދުއަށް ދަންނަވާލަން ބޭނުންވަނީ، މުޒާހަރާގެ ފަހަތުގައި ތިބީ މަސްވެރިންގެ އަނބި ދަރިންނޭ، މައިން ބަފައިންނޭ، އާއިލާތަކޭ،" މަސްވެރިއެއްގެ އަންބަކު ބުންޏެވެ.
މި މުޒާހަރާ ހުއްޓާލާނީ މަސްވެރިންނަށް ދޭން ޖެހޭ ފައިސާ ދިނުމުން ކަމަށާއި މުޒާހަރާ ކިތަންމެ ދުވަހެއް ވިޔަސް ހުއްޓާނުލާނެ ކަމަށް މުޒާހަރާގެ ބައިވެރިން ވަނީ ބުނެފަ އެވެ. އަދި ކުރިއަށް އޮތް ތަނުގައި ކިރާ މަހަށް ލާރި ދޭނެ މުއްދަތަކާމެދު ސަރުކާރުން އެއްބަސްވުމަށް ވެސް މަސްވެރިން ދަނީ ޑިމާންޑުކުރަމުންނެވެ.
މަސްވެރިންނަށް ފައިސާ ނުދީގެން އަދި ލޭނު އެޅުމާ ދެކޮޅަށް މާލޭގައި ޖޫން 12، ގައި ވެސް ވަނީ މުޒާހަރާއެއް ކޮށްފަ އެވެ. އެ މުޒާހަރާގައި 25 އެއްހާ ދޯނި މާލޭގައި މުޒާހަރާކުރިއިރު، މުޒާހަރާ ހުއްޓާލީ ބައެއް ޑިމާންޑުތައް ސަރުކާރުން ގަބޫލުކުރުމުންނެވެ.
