ސިއްހީ ހިދުމަތް ދިނުމުގެ ގާނޫނަށް ބަދަލުތަކެއް ގެންނަން ސަރުކާރުގެ ފަރާތުން ހެންވޭރު ދެކުނު ދާއިރާގެ ޕީއެންސީ މެންބަރު ހުސައިން އިމްރާން ލަތީފު ހުށަހެޅުއްވި ބިލަށް ރައްޔިތުންގެ މަޖިލީހުގެ މިއަދުގެ ޖަލްސާގައި ކުރި ބަހުސްގައި، ދާއިރާތަކުގެ ސިއްހީ ނިޒާމާ މެދު ރައްޔިތުން ކުރާ ޝަކުވާތައް މެންބަރުން އޮއްސަވައިލައްވައިފި އެވެ.
އެ ބިލުގެ ބަހުސްގައި އިނގުރައިދޫ ދާއިރާގެ ޕީއެންސީ މެންބަރު އަދި ޕީއެންސީގެ ޕާލަމެންޓްރީ ގްރޫޕްގެ ލީޑަރު ތުހުމަތުކުރެއްވީ ކުރީގެ ސަރުކާރުން "ރާއްޖޭގެ ސިއްހީ ނިޒާމު ފުނޑުފުނޑުކޮށްލާފައިވާ" ކަމަށެެވެ. އޭނާ ވިދާޅުވީ ރާއްޖޭގެ ހޮސްޕިޓަލްތަކާއި ސިއްހީ މަރުކަރުތަކުގެ އިމާރާތްތައް ހުރީ ނިކަމެތި ހާލަތެއްގައި ކަަމަށާއި އެ ތަންތަނުގެ މުވައްޒަފުން ވެސް ތިބީ ނިކަމެތި ހާލެއްގައި ކަަމަށެވެ.
ތުޅާދޫ ދާއިރާގެ އަމިއްލަ މެންބަރު އަބްދުލް ހަންނާނު އަބޫބަކުރު ވިދާޅުވީ އޭނާގެ ދާއިރާގެ ހަތަރު ރަށް ކަމަށްވާ ތުޅާދޫ، ގޮއިދޫ، ފުޅަދޫ އަދި ފެހެންދޫގައި ވެސް ސިއްހީ ހިދުމަތް އެކަށީގެންވާ ފެންވަރެއްގައި ލިބެމުން ނުދާ ކަމަށެވެ.
"އެގޮތުން ތުޅާދޫގައި އެކްސްރޭ ނެގޭ މިންވަރު ވެސް ނެތް، ސްކޭނެއް ކުރެވޭ ފަދައެއް ނެތް. މިރަށުގައި ސިއްހީ ހިދުމަތްތަކުގެ ތެރެއިން ހަަމަ އެކަނި ލިބެން ހުރީ އާއްމު ޑޮކްޓަރެއް [ގެ ހިދުމަތް]. ދެ ޑޮކްޓަރުން އެތާނގައި ތިއްބަވާ، އޭގެ އިތުރުން ލޭޓެސްޓް ކުރުުމުގެ ހިދުމަތް މިތަނުން މި ލިބެނީ،" އަބްދުލްހަންނާނު ވިދާޅުވި އެވެ.
ފޭދޫ ދާއިރާގެ ޕީއެންސީ މެންބަރު އިބްރާހީމް ދީދީ ވިދާޅުވީ ރާއްޖޭގެ ރައްޔިތުންނަށް އެމީހުންގެ ދާއިރާތަކުގައި ތިބެގެން ކޮލެޓްސްޓްރޯލް ޓެސްޓާއި ބްރެސްޓް ކެންސަރު ފަދަ ބަލިތަކުގެ ޓެސްޓްތައް ނުހެދޭ ކަމަށެވެ. ލޭ މައްޗަށް ދިއުމުގެ ބަލީގައި އުޅޭ މީހުންނަށް އެބަލީގެ ބޭސް ވެސް ނުލިބޭ ކަަމަށް އޭނާ ވިދާޅުވި އެވެ.
"ހަގީގަތަކީ މިއީ އެމީހަކު އުޅޭ ސަރަހައްދަކުން ރަށަކުން [ހިދުމަތެއް] ނުއެއް ލިބޭ. ރާއްޖޭގެ ރައްޔިތުންގެ ތެރެއިން ކިތައް ރައްޔިތުންތޯ އެތަން މިތަނަށް ބޭސްފަރުވާއަށް ދަނީ، ގޮސްފައި ހާލުގައި ޖެހިފައި ތިބީ؟" އޭނާ ވިދާޅުވި އެވެ.
ރައީސް ޑރ. މުހައްމަދު މުއިއްޒުގެ ސަރުކާރުން މި ބިލު ހުށަހެޅީ އެހެންވެ ކަަމަށާއި އިހުލާސްތެރިކަމާ އެކު މަސައްކަތް ކޮށްގެން ބިލުގެ މަސައްކަތް ނިންމަން ޖެހޭ ކަަމަށެވެ.
"ހުސް ވާހަކަ ދައްކާފައި ކޮންމެ ފަހަރަކު ބިލެއް ހުށަހަޅާފައި ބިލަށް އިސްލާހު ގެނެސްފައި، ކޮންމެެވެސް ތަނަކަށް މީހުން ގެނެސްފައި ނިންމައިލީމާ މިކަމެއް ހަމައެއް ނުޖެހޭ،" އޭނާ ވިދާޅުވި އެެވެ.
ސިއްހީ ހިދުމަތުގެ ފެންވަރު ރަނގަޅުކުރަން ކުރީގެ ސަރުކާރުން ވީ ވައުދު ނުފުއްދާ ކަމަށް ވިދާޅުވެ، ވެލިދޫ ދާއިރާގެ އެމްޑީއޭ މެންބަރު މުހައްމަދު އައްބާސް ސިފަކުރެއްވި ގޮތުގައި އޭނާގެ ދާއިރާގެ ތިން ރަށުން ވެސް އެކަށީގެންވާ ހިދުމަތެއް ނުލިބޭ ކަމަށެވެ.
"އެހެންވީމާ އަޅުގަނޑު އެބަ ގޮވައިލަން ރައީސް ޑރ. މުހައްމަދު މުއިއްޒުގެ ސަރުކާރަށް ވަރަށް އިހުލާސްތެރިކަމާ އިހުތިރާމާ އެކު ވެލިދޫ، ޅޮހި، ފޮއްދޫ މި ތިންރަށުގެ ސިއްހީ ހިދުމަތް މިހާރު އޮތް ހާލަތަށް ވުރެ ރަނގަޅު ހާލަތަކަށް ނުގެންގޮސްފި ނަމަ، އެ ދާއިރާގެ ރައްޔިތުންނަށް އިތުރު ބަލިމަޑުކަމެއް ކުރިމަތިވުމަކީ ހަމަ ވަރަށް ގާތުގައި އޮތް ކަމެއް،" އައްބާސް ވިދާޅުވި އެވެ.
އޭނާ ވިދާޅުވީ ސަރުކާރުން ސިއްހީ ހިދުމަތަށް ކުރަން ޖެހޭ ހަރަދު ބޮޑުވެގެން އުޅެނީ ޕްރައިވެޓް ތަންތަނުން މީހުން ހިދުމަތް ހޯދަން ޖެހޭލެއް ގިނަކަމުން ކަމަށެވެ. އެކަން ހައްލުވާނީ ސަރުކާރުން އިތުރު ހޮސްޕިޓަލްތައް އަަޅައިގެން ކަމަށް ވެސް ވިދާޅުވި އެވެ.
ކޮލަމާފުށި ދާއިރާގެ ޕީއެންސީ މެންބަރު އިބްރާހީމް ދީދީ ވިދާޅުވީ ވެރިކަމަށް ވަޑައިގަންނަވާ ބޭފުޅުންގެ ފަރާތުންނާއި މަޖިލިސް ތެރެއިން ވެސް އިވެނީ ސިއްހީ ހިދުމަތް ރަނގަޅުކުރާ ވާހަކަ ކަމަށާއި އެހެން ނަމަވެސް ހިދުމަތް ރަނގަޅުވާތަން ނުފެންނަ ކަމަށެވެ.
