މިދިޔަ އަހަރު ބޭއްވި ރިޔާސީ އިންތިހާބުގައި މިހާރުގެ ރައީސް ޑރ.މުހައްމަދު މުއިއްޒަށް ރިޔާސީ ޓިކެޓް ދޭން، ރޭއްވެވީ "ރައީސް ޔާމީނު އެނގޭތީ" ކަަމަށް ވިދާޅުވެ ރައްޔިތުންގެ މަޖިލީހުގެ ރައީސް އަބްދުއް ރަހީމް އަބްދުﷲ ކުރީގެ ރައީސް އަބްދުﷲ ޔާމީނަށް މިރޭ ރައްދުދެއްވައިފި އެވެ.
އެމްޑީޕީން ހަރުގެ ހިންގި ހ.ވެޔޮވިލާ ގައި ޕީއެންސީގެ ހަރުގެ ހުޅުވަން މިރޭ ބޭއްވި ޖަލްސާގައި އަބްދުއް ރަހީމް ވިދާޅުވީ ރިޔާސީ އިންތިހާބުގައި ވާދަކުރައްވަން ޔާމީނަށް ފުރުސަތު ލިބިވަޑައިނުގަންނަވާ ހިސާބުން އެހެން ބޭފުޅަކަށް ފުުރުސަތު ނުދެއްވާނެ ކަން އޭރު ވެސް އެނގިވަޑައިގަންނަވާ ކަމަށެވެ. އެ މޭރުމުން ވާހަކަ ކުރިއަށް ގެންދަވައި، ޔާމީނަށް އެމަނިކުފާނު ވަރަށް ބޮޑަށް ފާޑުވިދާޅުވެ، ބަހުގެ ހަަމަލާތައް ދެއްވި އެވެ.
"ދެން މިބުނަނީ އަޅުގަނޑު ރާވައިގެން، މާކުރިން މުއިއްޒަށް ބައިއަތު ހިފައިގެން މުއިއްޒަށް ޓިކެޓް ދިނިއްޔޭ. މާކުރިން ރޭވީމޭ، ކީއްވެ ރޭވީ؟ އަޅުގަނޑަށް ރައީސް ޔާމީނު އެނގޭތީ ރޭވީ. އަޅުގަނޑަށް އެނގެޔޭ އެމަނިކުފާނަށް ކުރިމަތިނުލެވެންޏާ އަޅުގަނޑުމެން ޕާޓީން ވެރިކަމަށް ކުރިމަތިލާން ފުރުސަތު ނުދެއްވާނެކަން،" އަބްދުއް ރަހީމް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ޕާޓީ މަގުމަތިވިޔަ ނުދޭން ވިސްނާވަޑައިގަންނަވަމުން ގެންދެވީ 30 އަހަރުގެ (ސިޔާސީ) ތަޖުރިބާއާ އެކީގަ އެވެ. އެއީ ރައްޔިތުން ބިކަވިޔަނުދޭން އަދި ގައުމުގެ މިނިވަންކަން ގެއްލުނަ ނުދޭން ކުރެއްވި މަސައްކަތެއް ކަމަށް ވެސް އަބްދުއްރަހީމް ސިފަކުރެއްވި އެވެ.
"އެހެންވެގެން ރާވަމުން ގެންދިޔައީ، އަޅުގަނޑުގެ ހިތުގައި އޮތް ޔަގީންކަމާ އެކީގައި ޕީޕީއެމްޕީއެންސީ ރިޔާސީ އިންތިހާބުގައި ވާދަކުރާނެޔޭ، އަޅުގަނޑަށް އެނގޭ ޕްލޭން އޭ ހަދާފައި ބީ ހަދާފައި ސީ ހަދާފައި އުޅުނު އިރު ވެސް އެމަނިކުފާނުގެ [ޔާމީނުގެ] އެއްބަސްވުމުގައި، އެމަނިކުފާނުގެ ރުހުމުގައި އަޅުގަނޑުމެންނަށް ރިޔާސީ އިންތިހާބުގައި ވާދަނުކުރެވޭނެކަން،" އަބްދުއް ރަހީމް ވިދާޅުވި އެވެ.
ވަކި ބޭފުޅެއްގެ ނަން ވިދާޅުނުވެ، އެމަނިކުފާނު ތުހުމަތުކުރެއްވި ގޮތުގައި ޔާމީނަށް ފުރުސަތު ގެއްލިވަޑައިގެންނެވި ހިސާބުން އެހެން ބައެއް ބޭފުޅުން ނެރުއްވަން ޔާމީނު މަސައްކަތް ކުރެއްވި އެވެ. އެހެން ނަމަވެސް އެ ދުވަހު ހެނދުނު ނުވައެއް ޖެހި އިރު ވަޑައިގެން މުއިއްޒުގެ ނަމުގައި ފޯމު ވެއްދީ އެހެންވެ ކަމަށް ވެސް ވިދާޅުވި އެވެ.
މިދިޔަ އަހަރު ބޭއްވި ރިޔާސީ އިންތިހާބު ބޯމަތިވި އިރު އޭރުގެ އިދިކޮޅު މައި ޕާޓީ، ޕީޕީއެމްގެ ރިޔާސީ ޓިކެޓް ދީފައި އޮތީ އޭރު ޖަލުހުކުމެއްގައި ހުންނެވި ޔާމީނަށެވެ. ހުކުމް އޮތަސް ރިޔާސީ އިންތިހާބުގައި ވާދަކުރެއްވޭނެ ފުރުސަތު ހޯއްދަވަން ޔާމީނުގެ ފަރާތުން ސުޕްރީމްކޯޓަށް ހުށަހެޅި މައްސަލަ ނިމުނީ އެމަނިކުފާނާ ދެކޮޅަށެވެ. ރިޔާސީ އިންތިހާބަށް ކެންޑިޑޭޓަކު ނެރޭނީ ޕީއެންސީގެ ފަރާތުން ކަމަށް ނިންމައި ޕީއެންސީގެ ސެނެޓްގައި ކުއްލި ވޯޓެއް އެހިސާބުން ނެގި އެވެ. މިހާރުގެ ކައުންސިލް މިނިސްޓަރު އާދަމް ޝަރީފާ ވާދަކުރައްވައި އެ ވޯޓް ކާމިޔާބުކުރެއްވީ ރައީސް މުއިއްޒެވެ.
އެހެން ނަމަވެސް މުއިއްޒު ރިޔާސީ އިންތިހާބު ކާމިޔާބުކުރެއްވުމާ އެކު އެމަނިކުފާނާ ޔާމީނާ ދެމެދު މައްސަލަތައް އުފެދި، ޕީޕީއެމް ދޫކުރައްވައި ނުކުމެވަޑައިގެން ޔާމީން އަމިއްލަފުޅު ޕާޓީއެއް އުފެއްދެވި އެވެ. ޔާމީން ބައިވެރިވެވަޑައިގަންނަވާ ގޮތަށް އެޕާޓީން މާދަމާރޭ ޖަލްސާއެއް ބާއްވަން އޮތީ ނިންމައިފަ އެެވެ.
އެ ޖަލްސާއަށް އިޝާރާތް ކުރައްވައި އަބްދުއްރަހީމް ވިދާޅުވީ "ސިޔާސީ ގޮތުން ބައިކިލޯ ހަމަނުވާ މީހުން ގޮވައިގެން ނުކުމެ، ރައްޔިތުންގެ އެތައް އިންސައްތައެއްގެ ތާއީދު އޮތް ސަރުކާރަކާ ދިމާކުރާ އިރު ލަދެއް ހަޔާތެއް ނެތް" ކަމަށެވެ.
"ވެރިކަން ގެއްލުނީ ހިޔާނާތަށް އާނއެކޭ ބުނީމާ"
ޔާމީނަށާއި އެމަނިކުފާނުގެ އާއިލާއަށް، އެމަނިކުފާނުގެ ވެރިކަމުގައި އޭރުގެ އިދިކޮޅު ފަރާތްތަކުން ކުރި ބައެއް ތުހުމަތުތައް މިރޭ އަބްދުއްރަހީމް ވެސް ކުރެއްވި އެވެ. ޔާމީނުގެ އަނބިކަނބަލުން ފާތިމަތު އިބްރާހީމް "ސޮދަގާތު ފައުންޑޭޝަން"ގެ ވާހަކަ އެގޮތުން ގެންނެވި އެވެ.
"ދިވެހި ސަރުކާރަށް ލިބޭ ހައްޖު ކޯޓާއިން ސަތޭކަ ފަންސާސް، ދުއިސައްތަ ކޯޓާ ނަގައިގެން ކުރި ކަންތައް ކީއްވެތޯ މިއަދު ނުކުރަނީ؟ ކޮބައިތޯ މިއަދު ސޮދަގާތު ފައުންޑޭޝަން؟ ކޮންތާކުތޯ ވީ؟ ކީއްވެތޯ ހިތާނީ މޫސުން ނުގެންނަނީ؟" އަޑަށް ބާރުލައްވާފައި އަބްދުއް ރަހީމް ސުވާލުކުރެއްވި އެވެ.
އެއާ އެކުގައި އެމަނިކުފާނު ތައުރީފު އޮއްސަވައިލެއްވީ ރައީސް ޑރ.މުހައްމަދު މުއިއްޒަށެވެ. ސަރުކާރުގެ އިސް ބޭފުޅުންނަށް ކޮރަޕްޝަންގެ ތުހުމަތު ކުރާ އިރު، އޭސީސީއަށް އެ މައްސަލަ ހުށަހަޅަން ވިދާޅުވާ ކަމަށާއި ކޮރަޕްޝަނުގެ އެއްވެސް ކަމެއް ނުދެއްކޭނެ ކަމަށް އެމަނިކުފާނު ވިދާޅުވި އެވެ.
"އަނެއް ކޮޅުން ރައީސް [ޑރ.މުހައްމަދު މުއިއްޒު] އެ ވިދާޅުވަނީ ކޮރަޕްޝަން ސާބިތުވެއްޖެއްޔާ އެމީހަކާ ދެކޮޅަށް ފިޔަވަޅު އަޅުއްވާނަމޭ، ކޮރަޕްޝަނަށް ފިޔަވަޅު ނޭޅިގެނޭ ވެރިކަން ގެއްލުނީ، އަޅުގަނޑުމެންގެ ވެރިކަން ގެއްލުނީ، 2013 އިން 2018 އަށް ކުރި ވެރިކަން ގެއްލުނީ ކޮރަޕްޝަނަށް އާނއެކޭ ބުނީމާ،" އަބްދުއްރަހީމް ވިދާޅުވި އެވެ.
އަބްދުއްރަހީމް މިރޭ މިމޭރުމުން ވާހަކަ ދެއްކެވި އިރު، އެމްޑީޕީގެ ދެވަނަ ވެރިކަން 2018 ވަނަ އަހަރު އުފެދުނީ ވޯޓު އޮޅުވާލައިގެން ކަމަށް ޔާމީނު ކުރައްވަމުން ގެންދެވި ތުހުމަތުގައި އަބްދުއްރަހީމް ވެސް އޭރު ބައިވެރިވެވަޑައިގެންނެވި އެވެ.
