އައްޑޫ މަސްވެރިން ނިކުމެ, އެ އަތޮޅު ހުޅުދޫ-މީދޫގައި ހުންނަ މަސް ފެކްޓަރީ ކައިރީގައި ކުރާ އިހުތިޖާޖު ގަބޫލު ނުކުރައްވާ ކަމަށް އައްޑޫ ހުޅުދޫ ދާއިރާގެ މެންބަރު މުހައްމަދު ޝާހިދު ވިދާޅުވެއްޖެ އެވެ.
ވެރިކަން ކުރާ ޕާޓީ, ޕީއެންސީގެ ހަރުގެ ހުޅުވުމުގެ ރަސްމިއްޔާތުގައި ވާހަކަދައްކަވަމުން ޝާހިދު ތުހުމަތުކުރެއްވީ ބުރާސްފަތި ދުވަހުން ފެށިގެން އައްޑޫގައި ކުރަމުންދާ އިހުތިޖާޖަކީ ހިޔާލުފާޅު ކުރުމުގެ މިނިވަންކަން މަސްވެރިންނަށް ލިބިފައި އޮތަތީ, ބަޔަކު އަޑީގައި ތިބެގެން ރާވައިގެން ކުރާ ކަމެއް ކަަމަށެވެ.
"މިހާރު އައްޑޫގެ މަސްވެރިން ހުޅުދޫ މީދޫގައި ހެދިފައިވާ މަސް ފެކްޓަރީގައި ކުރަމުންދާ އިހުތިޖާޖަކީ އަޅުގަނޑު އެއްގޮތަކަށް ވެސް ގަބޫލުކުރާ, ގަބޫލުކުރުމެއް ނޫން," ޝާހިދު ވިދާޅުވި އެވެ.
މަސްވެރިންގެ އިހުތިޖާޖު ގަބޫލުނުކުރައްވާ ސަބަބެއްގެ ގޮތުގައި ޝާހިދު ވިދާޅުވީ އީދު ބަންދުވުމުގެ ކުރީގައި, އައްޑުއާއި މުޅި ރާއްޖޭގެ މަސްވެރިންނަށް މިފްކޯއިން ފައިސާ ދޫކޮށްފައި ވުމެވެ. އަދި ނުދެވި ބާކީ ހުރީ ވަރަށް ކުޑަ އަދަދެއް ކަމަށް އޭނާ ވިދާޅުވި އެވެ.
"ހިތާމައަކީ މަސްވެރިންނަށް ލިބިދޭ ހައްގުތަކުގެ ބޭނުންކޮށްގެން ގާނޫނުއަސާސީން ކޮންމެ ދިވެހި ރައްޔިތަކަށް ހިޔާލުފާޅު ކުރުމާއި, އެ ބޭފުޅުންގެ ޝުއޫރުފާޅު ކުރުމުގެ މިނިވަންކަން އޮތަތީވެ އެދިޔަ ގޮތަށް ގޮސް މަސް ފެކްޓަރީގެ ކަރަންޓު ކަނޑާލީ," އޭނާ ވިދާޅުވި އެވެ.
ޝާހިދު ވިދާޅުވީ, މަސް ފެކްޓަރީގައި, މަސް ރައްކާ ކޮށްފައި ހުރި 300 ޓަނުގެ ކޮންޓެއިނާ އާއި އެތަނުގައި ތިބި 40 ހަކަށް ރަށުން ބޭރުގެ މުވައްޒަފުން ނިދާ ކާބޮއެ ހަދާތަނުން ކަރަންޓު ކަނޑާލުމަކީ އިހުތިޖާޖު ކުރުން ނޫން ކަމަށެވެ. އެއީ "ބަޔަކު އަޑީގައި ތިބެގެން ރާވައިގެން ހިންގާ ނުބައި އަޑި ނޭނގޭ ކަމެއް"ގެ ގޮތުގައި އޭނާ ސިފަ ކުރެއްވި އެވެ.
ޝާހިދު ވިދާޅުވި ގޮތުގައި މަސްވެރިނަށް ޖެހިފައިވާ ތަކުލީފާއި ބިކަ ނިކަމެތި ކަމަކީ މިއަދު ދިމާވެގެން އުޅޭ ކަމެއް ނޫން ކަމަށާއި, އޭނާއަކީ މަސްވެރިންގެ ވިންދާއި އިހުސާސް އެންމެ ރަނގަޅަށް އެނގޭ އެކަކު ކަމަށެވެ.
އެ މޭރުމުން ވާހަަކަ ކުރިއަށް ގެންދަވަމުން އޭނާ ވިދާޅުވީ, މަސްވެރިންނަށް ތަކުލީފާއި ނިކަމެތިކަން ގެނައީ ކުރީ ސަރުކާރުން ކަމަށެވެ. ކުރީ ސަރުކާރާއި, މިވަގުތު އިދިކޮޅުގައި އޮތް އެމްޑީޕީއަށް އޭނާ ވަރަށް ބޮޑަށް ފާޑުވިދާޅުވި އެވެ.
"ގަބޫލުކުރަންޖެހޭ ހަގީގަތަކީ ނިމިދިޔަ ސަރުކާރުން ރިޔާސީ އިންތިހާބުގެ ދެވަނަ ބުރުގައި އެންމެ ފަހު ވަގުތު 25 ރުފިޔާއަށް މަސްކިލޯ އުފުއްލަވާފައި މިއަދުގެ މި ސަރުކާރު އެ ހުރިހާ ބުރައެއް އުފުލަންޖެހޭ ގޮތަށް އެންމެ ލާރިއެއް ވެސް ދޫނުކޮށް އެމީހުން އެ ދިޔައީ," އޭނާ ވިދާޅުވި އެވެ.
މަސްވެރިންގެ އިހުތިޖާޖުގެ ތެރެއިން މަސް ފެކްޓަރީގެ އޮޕަރޭޝަނަށް ހުރަސް އަޅާ, މުވައްޒަފުންގެ އަސާސީ ހައްގުތަކަށް އަރަމުންދާ ކަމަށް ބުނެ, މިފްކޯއިން ވަނީ އެފަދައިން އަމަލުކުރާ ދޯނިތަކުން މަސް ގަތުން ތިން މަސް ދުވަހަށް ސަސްޕެންޑު ކުރާނެ ކަމުގެ އިންޒާރު ދީފަ އެވެ.
