މި އަހަރު ހައްޖުގެ އަޅުކަން އަދާކުރަން ދިޔަ ދިވެހި ހައްޖުވެރިންގެ ކަންކަން ބެލެހެއްޓުމުގައި ކޮރަޕްޝަން އެކުލެވޭ ކަމުގެ ތުހުމަތުކޮށް, މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅަން ހައްޖާޖީއަކު ނިންމައިފި ކަމަށް އިއްޔެ ރިޕޯޓުކުރި އެވެ.
ހައްޖުގެ އަޅުކަން ފުރިހަމަ ކުރުމަށްފަހު, އަންނަ އަހަރަށް ރަނގަޅުކޮށްލަން ޖެހޭ ބައެއް ކަންކަން ކަމަށް ބުނެ މިއަހަރު ހައްޖަށް ދިޔަ މުހައްމަދު ނިޒާމް ވަނީ އޭނާގެ ތަޖުރިބާ ފޭސްބުކްގައި ހިއްސާކޮށްފަ އެވެ. އަދި ހިދުމަތް ދިނުމުގައި ހައްޖު ކޯޕަރޭޝަނުން ކޮރަޕްޝަން ހިންގިކަމުގެ ތުހުމަތުކޮށް މައްސަލަ އޭސީސީއަށް ހުށަހަޅަން ގަސްތު ކުރާ ކަމަށް އޭނާ ބުނެފައިވެ އެވެ.
އޭނާ ބުނީ, ހައްޖަށް ގެންދިއުމަށް ނަގާ އަގާ އެއްވަރު ފެންވަރުގެ ހިދުމަތް ނުލިބޭ ކަމަށާއި, ހައްޖާޖީންނާ މެދު އަމަލުކޮށްފައި ވަނީ ލާއިންސާނީ ގޮތަކަށް ކަމަށެވެ. އެގޮތުން, 300 މީހުންގެ ޖާގައިގެ ޓެންޓެއްގައި 500 މީހުން ބައިތިއްބާފައިވުމާއެކު, ހޫނު ގަދަވެގެން ބައެއް ދިވެހިން ނިދަން ކައިރި މިސްކިތަކަށް ދާން ޖެހުނު ކަމަށް އޭނާ ބުންޏެވެ.
ހައްޖުގެ އަޅުކަމަށް ގިނަ އަދަދެއްގެ ފައިސާ ހަރަދުކޮށްފައި ގޮސް, އެއަށް ވުރެ މަދު އެއްޗެއް ހަރަދުކުރި ލަންކާ މީހުންނާ އެއް ޓެންޓެއްގައި އެއް މުތޮއްވިފު ނުވަތަ އެޖެންޓު ހިއްސާ ކުރަންޖެހުނު ކަން ވެސް ނިޒާމް ފާހަގަކުރި އެވެ.
