އެމްޑީޕީ އާއި ޕީއެންސީއަށް ފައިސާ ދޫކޮށް، ދައުލަތުގެ ބަޖެޓުން ފައިސާ ދިނުމަށް ޝަރުތު ހަމަވާ ހުރިހާ ޕާޓީއަކަށް އިލެކްޝަންސް ކޮމިޝަނުން ފައިސާ ދޫކޮށް ނިންމައިފި އެވެ.
އިލެކްޝަންސް ކޮމިޝަންގެ މެންބަރު އަދި ތަރުޖަމާން ހަސަން ޒަކަރިއްޔާ "އަދަދު" އާ ވާހަކަ ދައްކަވަމުން ވިދާޅުވީ ސިޔާސީ ޕާޓީތަކުގެ ތެރެއިން ފައިސާ ދިނުމަށް ޝަރުތު ހަމަވާ ޕާޓީތަކުގެ ތެރެއިން ފައިސާ ދޫނުކުރެވި އޮތް އެމްޑީޕީ އަދި ޕީއެންސީއަށް މިދިޔަ މަހު ފައިސާ ދޫކޮށްފައިވާ ކަމަށެވެ.
އީސީން އެމްޑީޕީއަށް ފައިސާ ދޫކުރުން ލަސްވީ އެ ޕާޓީގެ މާލީ ބަޔާންތައް ލިބުން ލަސްވެގެން ކަމަށާއި ޕީއެންސީއަށް ފައިސާ ދޫކުރުން ލަސްވީ އެ ޕާޓީގެ އެކައުންޓެއް ހުޅުވައި ތަފުސީލް ނުލިބިގެން ކަމަށް ޒަކަރިއްޔާ ވިދާޅުވި އެވެ.
"މެއި މަސް ތެރޭގައި އެމްޑީޕީއާއި ޕީއެންސީއަށް ފައިސާ ދޫކުރަން ފޮނުވާފައި ވާނީ. މިހާރު ދެ ޕާޓީއަށް ވެސް ފައިސާ ލިބިފައި ވާނީ. މިއާއެކު ހުރިހާ ޕާޓީތަކަށް ފައިސާ ދޫކޮށް މިވަނީ ނިމިފައި،" ޒަކަރިއްޔާ ވިދާޅުވި އެވެ.
ޒަކަރިއްޔާ ވިދާޅުވީ އެމްޑީޕީއާއި ޕީއެންސީ ފިޔަވައި ޝަރުތު ހަމަވާ އެހެން ޕާޓީތަކަށް އޭޕްރިލް މަސް ތެރޭގައި ފައިސާ ދޫކޮށް ނިންމި ކަމަށެވެ. އަދި ޖުމްލަ ހަ ޕާޓީއަށް ފައިސާ ދޫކޮށްފައިވާ ކަމަށް އޭނާ ވަނީ ވިދާޅުވެފަ އެވެ.
ފައިސާ ދޫކުރި ޕާޓީތަކާއި ޖުމްލަ ދޫކުރި ފައިސާގެ އަދަދު:
- މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) - 15.1 މިލިއަން ރުފިޔާ
- ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) - 10.4 މިލިއަން ރުފިޔާ
- ޕީޕަލްސް ނޭޝަނަލް ކޮންގްރެސް (ޕީއެންސީ) - 8 މިލިއަން ރުފިޔާ
- ޖުމްހޫރީ ޕާޓީ (ޖޭޕީ) - 5.3 މިލިއަން ރުފިޔާ
- އަދާލަތު ޕާޓީ (އޭޕީ) - 2.5 މިލިއަން ރުފިޔާ
- މޯލްޑިވްސް ޑިވެލޮޕްމެންޓް އެލައަންސް (އެމްޑީއޭ) - 2.4 މިލިއަން ރުފިޔާ
ރާއްޖޭގައި ސިޔާސީ ޕާޓީތަކަށް ފައިސާ ދޫކުރަނީ އެ ޕާޓީއެއްގައި ތިބޭ މެމްބަރުންގެ އަދަދަށް ބަލައިފަ އެވެ. ފައިސާ ދޫކުރަމުން އަންނަނީ 10،000 އަށް ވުރެ ގިނަ މެންބަރުން ތިބޭ ޕާޓީތަކަށް އެ ޕާޓީއެއްގައި މެންބަރުން ތިބޭ އަދަދަށެވެ.
ރާއްޖޭގައި ސިޔާސީ ޕާޓީތަކުގެ ދަފްތަރުގައި 10 ޕާޓީއެއް ރަޖިސްޓްރީކޮށްގެން ހިންގާއިރު، ސިޔާސީ ޕާޓީތަކުގެ ގާނޫނު ބުނާ ގޮތުން ފައިސާ ދޫކުރާނީ ރައްޔިތުންގެ މަޖިލީހުން ބަޖެޓް ފާސްކުރާ ދުވަހާ ހަމައަށް 10،000 މެންބަރުން ހަމަވާ ޕާޓީތަކަށެވެ.
