މޫސުން ގޯސްވެ، ބޮޑު ޖަމާއަތުގައި ނަމާދު ނުކުރެވޭ ފަދަ ހާލަތެއް މެދުވެރި ނުވާނަމަ، މާލޭގައި އީދު ނަމާދު ކުރާނީ 24 މިސްކިތެއްގައި ކަމަށް އިސްލާމިކް މިނިސްޓަރީން ބުނެފި އެވެ.
އެ މިނިސްޓަރީން އިއްޔެ ކުރި އިއުލާނެއްގައި ބުނީ އީދު ދުވަހު ބޮޑު ޖަމާއަތުގައި އީދު ނަމާދު ކުރަން މޫސުން ތަންނުދީފިނަމަ މާލޭގައި ހުކުރު ކުރާ ހުރިހާ މިސްކިތްތަކެއްގައި ވެސް އީދު ނަމާދު ކުރާނެ ކަމަށެވެ.
ނަމަވެސް އަދި ހަމަޖެހިފައި އޮތީ 24 މިސްކިތެއްގައި އީދު ނަމާދު ކުރާ ގޮތަށް ކަމަށް އެ އިއުލާނުގައި ބުނެފައިވެ އެވެ.
އެގޮތުން މާލޭ ސަރަހައްދުގައި އީދު ނަމާދު ކުރުމަށް ނިންމާފައި ވަނީ ހުޅުމާލޭ ދެވަނަ ފިޔަވަހީގެ ތިން މިސްކިތަކާއި ހުޅުމާލޭ އެއްވަނަ ފިޔަވަހީގެ ހަތަރު މިސްކިތެއްގެ އިތުރުން މާލޭގެ 16 މިސްކިތަކާއި ވިލިމާލޭގެ މަސްޖިދުލް ސަލާމްގަ އެވެ.
އޭގެއިތުރުން ދެން އީދު ނަމާދު ކުރުމަށް އިސްލާމިކް މިނިސްޓަރީން ނިންމާފައި ވަނީ މާލޭގެ ހަތަރު ސަރަހައްދެއްގައި ބޮޑު ޖަމާއަތުގަ އެވެ. އެއީ:
- މާލޭގައި މާފަންނު ބޯޅަ ދަނޑުގައި
- ހުޅުމާލޭ ދެވަނަ ފިޔަވަހީގައި ކްރިކެޓު ސްޓޭޑިއަމް ސަރަހައްދުގައި
- ހުޅުމާލޭ އެއްވަނަ ފިޔަވަހީގައި ސިންތެޓިކް ޓްރެކް ސަރަހައްދުގައި
- ވިލިމާލޭގައި ވިލިނގިލީ ބޯޅަ ދަނޑުގައި
އީދު ނަމާދު ފަށާ ގަޑިއަށް މި އަހަރު ގެނައި ބަދަލާއެކު ބޮޑު އީދު ނަމާދު ވެސް ފަށާނީ ހެނދުނު 7:00 ގަ އެވެ.
އިސްލާމިކް މިނިސްޓަރީން ބުނީ އީދު ނަމާދު ކުރަން ހަމަޖެއްސި ހުރިހާ މިސްކިތަކާއި މައިދާންތަކުގައި ވެސް އަންހެނުންނަށް ނަމާދު ކުރެވޭ ގޮތަށް އިންތިޒާމުތައް ހަމަޖައްސާފައި ވާނެ ކަމަށެވެ.
