ސަރުކާރުގެ ލެޖިސްލޭޓިވް އެޖެންޑާގައި ހިމެނެނީ 15 މައުޟޫއަކާ ބެހޭ 213 ބިލު ކަމަށާއި، އޭގެ ތެރޭގައި މުޅިން އާ 78 ބިލު ހިމެނޭ ކަމަށް އެޓާނީ ޖެނެރަލް އޮފީހުން މިއަދު ބުނެފި އެވެ.
އޭޖީން ބޭއްވި ނޫސްވެރިންގެ ބައްދަލުވުމުގައި އޭޖީ އަހުމަދު އުޝާމް ވިދާޅުވީ 2028 ގެ ނިޔަލަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާ 213 ބިލު އެކުލަވާލާފައި ވަނީ ކަމާ ބެހޭ ހުރިހާ ފަރާތްތަކާ މަޝްވަރާކޮށްގެން ކަމަށެވެ.
ސަރުކާރުން ހުށަހަޅާ ބިލުތަކުގެ ތެރޭގައި މިހާރު އަމަލުކުރަމުންދާ ގާނޫނުތަކުގެ ތެރެއިން އިސްލާހު ގެންނަންޖެހޭ ނުވަތަ އުވާލަންޖެހޭ ގަނޫނުތަކަށް އިސްލާހު ގެނައުމަށްޓަކައި 135 ބިލެއް ހިމެނޭ ކަމަށް ވެސް އޭޖީން ބުނެ އެވެ.
"ލެޖިސްލޭޓިވް އެޖެންޑާގައި ހިމެނޭ ބިލުތައް ސަރުކާރުން ރައްޔިތުންގެ މަޖިލީހަށް ހުށަހަޅަމުން ގެންދާނީ ކޮންމެ އަހަރެއްގެ ރައްޔިތުންގެ މަޖިލީހުގެ ތިން ދައުރަށް ބިނާކޮށް. އެފަދައިން ހުށަހަޅާއިރު ހާލަތަށާއި ބޭނުމަށް ރިއާތަތްކުރަން ޖެހޭނެތީ، މަދުވެގެން އަހަރަކު އެއްފަހަރު ލެޖިސްލޭޓިވް އެޖެންޑާ މުރާޖާ ކުރާނެ،" އޭޖީން ބުންޏެވެ.
ސަރުކާރުގެ ލެޖިސްލޭޓިވް އެޖެންޑާ:
- ދުސްތޫރީ އަދި ގާނޫނީ ކަންކަން - 15 ބިލު
- ދައުލަތް ހިންގުން - 9 ބިލު
- ހައްގުތަކާއި މިނިވަންކަން - 8 ބިލު
- އިސްލާމްދީނާއި ގައުމިއްޔަތު - 8 ބިލު
- ގައުމީ ސަލާމަތާއި ހާރިޖިއްޔާ - 15 ބިލު
- ސިއްހަތާއި ދުޅަހެޔޮކަން - 11 ބިލު
- ބިމާއި މުދަލާއި އުމްރާނީ ތަރައްގީ - 11 ބިލު
- ތިމާވެށި - 9 ބިލު
- އާއިލާއާއި މުޖުތަމައު - 20 ބިލު
- ކޮރަޕްޝަނާއި ކުށްކުރުން ހުއްޓުވުން - 22 ބިލު
- ފައިސާއާއި މާލީ ކަންކަން - 22 ބިލު
- ދަތުރުފަތުރާއި މުވާސަލާތު - 8 ބިލު
- ތައުލީމާއި މަސައްކަތްތެރިން - 7 ބިލު
- ވިޔަފާރިއާއި އިގްތިސާދު - 22 ބިލު
- ޒަމާނާ ނުގުޅޭތީ އުވާލަންޖެހޭ ނުވަތަ އިސްލާހުކުރަން ޖެހޭ ގާނޫނުތައް - 26 ބިލު
ސަރުކާރުގެ ލެޖިސްލޭޓިވް އެޖެންޑާ އެކުލަވާލުމުގައި އިސްކަންދީފައިވާ ބިލުތައް:
- ސަރުކާރުގެ މެނިފެސްޓޯގައި ހިމެނޭ ވައުދުތަކާ ގުޅިގެން އެކުލަވާލަންޖެހޭ ބިލުތައް
- ގާނޫނުއަސާސީގެ ދަށުން އެކުލަވާލަންޖެހޭ ބިލުތަކާއި ގާނޫނުއަސާސީއާ ތައާރަޒުވުމުގެ ސަބަބުން އިސްލާހު ގެންނަންޖެހޭ ނުވަތަ އެކުލަވާލަންޖެހޭ ގާނޫނުތަކާ ގުޅޭ ބިލުތައް
- ދައުލަތުގެ އިދާރާތަކުގެ މަސައްކަތްތައް ހިންގުމުގައި ގާނޫނެއް ހެދިފައި ނެތް، އެހެންނަމަވެސް ގާނޫނަކުން ކޮންމެހެން ބާރު ލިބިދޭންޖެހޭ ކަންކަމާ ގުޅޭ ބިލުތައް
- މިހާރު އަމަލުކުރަމުންދާ ގާނޫނުތަކުގެ ތެރެއިން، ގާނޫނު ތަންފީޒުކުރުމުގައި ދިމާވާ ދަތިތައް ހައްލުކުރުމަށްޓަކައި އިސްލާހު ގެންނަންޖެހޭ ގާނޫނުތަކާ ގުޅޭ ބިލުތައް
- ޒަމާނާ ނުގުޅޭތީ އިސްލާހު ގެންނަންޖެހޭ ނުވަތަ އުވާލަންޖެހޭ ގާނޫނުތަކާ ގުޅޭގޮތުން އެކުލަވާލަން ޖެހޭ ބިލުތައް
- ދިވެހިރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާތަކަށް ދިވެހިރާއްޖޭގައި އަމަލުކުރުމަށްޓަކައި އެކުލަވާލަންޖެހޭ ގާނޫނުތަކާ ގުޅޭ ބިލުތައް
