ނިމިގެންދިޔަ އެމްޑީޕީގެ ސަރުކާރުން ލޭނު މަސްވެރިކަން ކުރުމަށް ލައިސެންސް ދޫކުރުން ހުއްޓާލައި އެކަން ހުއްޓުވީ ލޭނު މަސްވެރިކަމުގެ ނަމުގައި ބޭރު ފަރާތްތަކަށް ރާއްޖޭގެ ކަނޑުތައް ވިއްކާލާފައި އޮތުމުން މަސްވެރިންގެ ކަންބޮޑުވުން އެކަމުގައި އޮތުމުން ކަމަށް އެ ޕާޓީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.
ލޭނު މަސްވެރިކަން ކުރަން ހުއްދަ ދިނުމާ ދެކޮޅަށް ބޮޑު ކަންނެލި މަސްވެރިންގެ ޔޫނިއަނުން ދަނީ މިއަދު މުޒާހަރާ ކުރަމުންނެވެ. ގާތްގަނޑަކަށް 35 ދޯންޏާ އެކު ހުޅުމާލެ ކަންނެލި ޖެޓީން ފެށި މުޒާހަރާގެ ބައިވެރިން މިވަގުތު ތިބީ މާލެ ފަޅުގަ އެވެ.
މަސްވެރިން ކުރަމުންދާ މުޒާހަރާއާ ގުޅޭގޮތުން "އަދަދު" ނޫހާ ވާހަކަ ދައްކަވަމުން ފައްޔާޒު ވިދާޅުވީ އެމްޑީޕީގެ ސަރުކާރުގައި ލޭނު މަސްވެރިކަން ހުއްޓުވާލީ އެކަމުގައި މަސްވެރިންގެ ކަންބޮޑުވުން އޮތުމުން ކަމަށެވެ.
"ކަނޑުތައް ވިއްކާލާފައި ކަމަށް ބުނެ އެކި އެކި ތުހުމަތުތައް ކުރަމުންދާއިރު އެމްޑީޕީ ސަރުކާރުން އެކަން ހުއްޓުވީ އެ ނަމުގައި ބޭރު މީހުންނަށް ރާއްޖޭގެ ކަނޑުތައް ވިއްކާލާފައި ވަނިކޮށް. ލޭނު މަސްވެރިކަމަށް ނުކުންނަ އުޅަނދުތަކުން ގާނޫނުތަކާއި ގަވާއިދުތަކާ ހިލާފު އެތައް އަމަލުތައް ހިންގާ ކަމުގެ ކަންބޮޑުވުން މަސްވެރިންގެ އޮތް," ޖުލައި 2019, ގައި ލޭނު މަސްވެރިކަމަށް ލައިސެންސް ދޫކުރުން ހުއްޓާލި ސަބަބާ ގުޅޭގޮތުން ފައްޔާޒު ވިދާޅުވި އެވެ.
މަސްވެރިންނަށް ވެފައިވާ ވައުދުތައް ނުފުއްދުމުން އެކަމުގައި މަސްވެރިން މުޒާހަރާ ކުރާނެ ކަމަށާއި އެ ހައްގު މަަސްވެރިންނަށް ވެސް ފުރިހަމައަށް އޮންނަން ވާނެ ކަމަށް ވެސް އޭނާ ވިދާޅުވި އެވެ.
"މާލޭ ފަޅުތެރޭގައި ވެސް މުޒާހަރާ ކުރެވެން ވާނެ. ސަރުކާރުން ހުރަސް އަޅައިގެން ނުވާނެ, އެކަމަށް ޖާގަ އޮންނަން ވާނެ. ރާއްޖޭގެ މަސްވެރިކަމުގެ ސިނާއަތުގެ ބޮޑެތި ނިންމުންތައް ނިންމާއިރު މަސްވެރިންގެ ޝުއޫރުތަކަށް ބަލަން ޖެހޭނެ," މިދިޔަ ސަރުކާރުގެ އިކޮނޮމިކް މިނިސްޓަރުކަން ވެސް ކުރެއްވި ފައްޔާޒު ވިދާޅުވި އެވެ.
މަސްވެރިންނަށް ދޭން ޖެހޭ ފައިސާ ރޯދަ މަސް ނިމިގެން ހަ ރޯދަ ހަފްތާއަށް ފަހު ޖަމާނުވާތީ، ބައެއް މަސްވެރިން އަންނަނީ މުޒާހަރާ ކުރަމުންނެވެ. އެކަމަށް އިޝާރާތް ކުރައްވައި އޭނާ ވިދާޅުވީ ފެންނަމުންދަނީ މަސްވެރިންނަށް ސަރުކާރުން ވެފައިވާ ވައުދުތައް ނުފުއްދޭ މަންޒަރު ކަމަށެވެ.
"މިއީ 48 ގަޑިއިރުން ފައިސާ ދެވޭނޭ ކިޔައިގެން ނުވާނެ ކަންކަމުގެ ވާހަކަ ދައްކައިގެން އޮޅުވާލައިގެން ވެރިކަމަށް އައިމަ ވާގޮތް. ހައެއްކަ މަސްވެގެންދާއިރު މަސްވެރިން އެތަކެއް ފަހަރަކު މުޒާހަރާ ކުރަން ޖެހިއްޖެ ފައިސާކޮޅު ހޯދަން. މިއީ މަސްވެރިންނަށް ދެވޭ ބޮޑު އަނިޔާއެއް. ބޮޑުއީދު މިއޮތީ ކުރިމަތީގައި," އޭނާގެ ކަންބޮޑުވުން ހިއްސާކުރައްވަމުން ވިދާޅުވި އެވެ.
"މިކަމަށް އޮތް ހައްލަކީ އެމްޑީޕީގެ ސަރުކާރުން ފެށި މަޝްރޫއުތައް ކުރިއަށްގެންދިޔުން. މަޝްރޫއުތަކަށް ބޭނުންވާ ފައިސާ ހުންނާނީ ހޯދާފައި. އެކަންކަން ނުކުރެވެންވީ ސަބަބެއް ނެތް."
ރާއްޖޭގެ ކަނޑުގެ ސަރަހައްދުގައި ބޮޑުކަންނެލީގެ ލޭނު މަސްވެރިކަން ކުރުމުގެ ފުރުސަތު އެންމެ ފުރަތަމަ ހުޅުވާލަން ނިންމީ ކުރީގެ ރައީސް މުހައްމަދު ނަޝީދުގެ ވެރިކަމުގައި މާޗު 2010, ގަ އެވެ. އެ ހުއްދަ ދޭން އެކަމަކު ފެށީ 2012 ގަ އެވެ.
ލޭނު އަޅައިގެން ރާއްޖޭގެ އީއީޒެޑުން 100 މޭލާއި 200 މޭލާ ދެމެދު ކަންނެލީގެ މަސްވެރިކަން ކުރުމުގެ ގަވާއިދަށް އަމަލުކުރަން ފެށީ ނޮވެމްބަރު 2014, ގަ އެވެ. އެ ގަވާއިދުގެ ދަށުން ލައިސެންސް ދޫކުރީ ދިވެހި ކުންފުނިތަކަށެވެ.
ނަމަވެސް, އެފަދަ އުޅަނދުފަހަރުގައި ހަރަކާތްތެރިވާ ފަޅުވެރިންގެ 90 ޕަސެންޓަކީ ބިދޭސީ ފަޅުވެރިންނަށް ވުމުގެ ފުރުސަތު ގަވާއިދުން އޮތީ ފަހިކޮށްދީފަ އެވެ. އޭގެ ސަބަބުން, ގިނަ ދޯނިފަހަރުގައި ހަރަކާތްތެރިވީ އެންމެ ދިވެއްސެކެވެ.
އެހެންވެ, ގަވާއިދާއި ގާނޫނުތަކާ ހިލާފު އެތައް ކަމެއް ރާއްޖޭގެ ކަނޑުގެ ސަރަހައްދުގައި ހިނގި ކަމަށް އެކި ބައްދަލުވުންތަކުގައި މަސްވެރިކަމުގެ ދާއިރާ ބަލަހައްޓަވަން ތިއްބެވި ބޭފުޅުން ވިދާޅުވެފައިވެ އެވެ. މިފަދަ ކަންބޮޑުވުންތަކާ އެކު ލޭނު މަސްވެރިކަމަށް ލައިސެންސް ދޫކުރުން ހުއްޓާލީ އެމްޑީޕީގެ ވެރިކަމުގައި ޖުލައި 2019, ގަ އެވެ.
