ދައުލަތުގެ ޓެކްސް އިދާރާ މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އަށް މިދިޔަ މެއިމަހު ލިބުނު އާމްދަނީ މިދިޔަ އަހަރުގެ މޭމަހަށް ވުރެ 4.8 ޕަސެންޓް ދަށް ވެއްޖެ އެވެ.
މީރާއިން މިއަދު އާއްމުކުރި ހިސާބުތަކުގައިވާ ގޮތުން މިދިޔަ މެއިމަހު ލިބުނީ 1.66 ބިލިޔަން ރުފިޔާ ރުފިޔާ އެެވެ. މިދިޔަ އަހަރުގެ މެއިމަހު މީރާއަށް 1.74 ބިލިޔަން ރުފިޔާ ލިބުނެވެ.
މީރާއިން އާއްމުކުރި މައުލޫމާތުގައިވާ ގޮތުން މިދިޔަ މޭމަހު ލިބުނު އާމްދަނީ ދަށްވި ސަބަބަކީ ކޯޕަރޭޓް އިންކަމް ޓެކުސް، ޖީއެސްޓީ އަދި އެއާޕޯޓް ޓެކުހުގެ ގޮތުގައި ދެއްކި ފައިސާގެ އަދަދު މަދުވުމުންނެވެ. މިއަހަރާ އަަޅައި ބަލާއިރު މިދިޔަ އަހަރު ލިބުނު އާމްދަނީ އިތުރުވި ސަބަބެއް ކަމަށް މީރާއިން ބުނީ މޭމަހަކީ އިންކަޕް ޓެކުސް ދެެއްކުމުގެ ސުންގަޑި ހަމަވާ މަހަކަށް ނުވާ އިރު ސުންގަޑީގެ ކުރިން މިދިޔަ އަހަރު ބައެއް ތަންތަނުން ޓެކުސް ދައްކާފައި ވުމެވެ.
މިދިޔަ މެއިމަހު ލިބުނު އާމްދަނީ ދަށްވި އަނެއް ސަބަބަކީ މީރާއިން ބުނި ގޮތުގައި ޖީއެސްޓީ ދެއްކުމުގެ ސުންގަޑި މޭމަހު ހަމަވި ބައެއް ފަރާތްތަކުން ޖީއެސްޓީ ދައްކާފައި ނުވުމެވެ. މިދިޔަ އަހަރުގެ އޭޕްރިލްމަހު ދަތުރުވެރިން ފުރި އަދަދަށް ވުރެ މިއަހަރުގެ އޭޕްރިލްމަހު ދަތުރުވެރިން ފުރި އަދަދު މަދުވުމަކީ ވެސް އާމްދަނީ މަދުވި ސަބަބެކެވެ.
މިދިޔަ މެއިމަހު ލިބުނު އާމްދަނީ މިދިޔަ އަހަރާ އަޅައި ބަލާއިރު 4.8 ޕަސެންޓުން ދަށްވި ނަމަވެސް މީރާއިން ބުނި ގޮތުގައި މިދިޔަ މެއިމަހު އާމްދަނީ ލިބުނީ ލަފާކުރި ވަރަށް ވުރެ 0.8 ޕަސެންޓް އިތުރަށެެވެ.
