ރައީސް ޑރ. މުހައްމަދު މުއިއްޒު އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރު އާ ބައްދަލުކުރައްވައިފި އެވެ.
އިންޑިއާގެ ބޮޑުވަޒީރު ނަރެންދުރަ މޯދީ ތިން ވަނަ ދައުރަކަށް ހުވާ ކުރެއްވުމަށް ރޭ ބޭއްވި ރަސްމިއްޔާތަށް އެ ގައުމަށް ކުރައްވާ ދަތުރުގެ ތެރެއިން މި ބައްދަލުވުން ބާއްވާފައިވަނީ މިއަދު ހެދުނެވެ.
ރައީސް އޮފީހުން ބުނި ގޮތުގައި މި ބައްދަލުވުމުގައި ރައީސް މުއިއްޒު ވަނީ އިންޑިއާގެ ވަޒީރުންގެ މަޖިލީހަށް އަނެއްކާވެސް ޖައިޝަންކަރު އައްޔަން ކުރުމުން މަރުހަބާ ދަންނަވާފަ އެވެ.
ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރުމަށް އިންޑިއާގެ ހާރިޖީ ވަޒީރާއެކު އެމަނިކުފާނު މަޝްވަރާކުރެއްވި ކަމަށް ވެސް ރައީސް އޮފީހުން އެކްސްގައި ކުރި ޕޯސްޓުގައި ބުނެފައިވެ އެވެ. ނަމަވެސް މި ބައްދަލުވުމުގެ އިތުރު ތަފުސީލެއް މިހާތަނަށް ރައީސް އޮފީހުން އާންމުކޮށްފައެއް ނުވެ އެވެ.
ޖައިޝަންކަރަކީ މޯދީގެ ނިމިދިޔަ ސަރުކާރުގެވެސް ހާރިޖީ ވަޒީރެވެ. އެ މަގާމުގައި ހުންނަވައިގެން އޭނާ ވަނީ ދެ ފަހަރެއްގެ މަތިން ރާއްޖެއަށް ރަސްމީ ދަތުރު ކުރައްވާފަ އެވެ.
ރައީސް މުއިއްޒު ވެރިކަމަށް ވަޑައިގެންނެވިފަހުން އިންޑިއާ އާއި ރާއްޖެއާ ދެމެދު އޮތް ގުޅުން ގޯސްވި އެވެ. ރައީސް ވެރިކަމަށް ވަޑައިގެންނެވީ ވެސް ދެ ހެލިކޮޕްޓަރާއި ޑޯނިއާ މަތިންދާބޯޓު ދުއްވަން ރާއްޖޭގައި ތިބޭ އިންޑިއާ ސިފައިން ގައުމުން ބާލާނެ ކަމުގެ ވައުދާއެކު އެވެ.
އިންޑިއާގެ ބަދަލުގައި ރައީސް މުއިއްޒު ދަނީ ޗައިނާއާއެކު ގާތް ގުޅުމެއް ބާއްވަމުންނެވެ. އެމަނިކުފާނުގެ ފުރަތަމަ ރަސްމީ ދަތުރު ވެސް ކުރެއްވީ ޗައިނާއަށެވެ. އެ ދަތުރަށްފަހު ރައީސް ވަނީ އިންޑިއާއަށް ވަރުގަދަ ބަހުގެ ހަމަލާތަކެއް ވެސް ދީފަ އެވެ.
ނަމަވެސް, ރައީސް އިންޑިއާއަށް ވަޑައިގަތުމާ އެކު ދެ ގައުމުގެ މެދުގައި އޮތް ނުތަނަވަސްކަން ފިލައި ގުޅުން ބަދަހި ކުރުމަށް މިހާރު ވަނީ ފުރުސަތުތަކެއް ފަހިވެފަ އެވެ. ވެރިކަމަށް ވަޑައިގަތުމަށް އިންޑިއާއާ ދެކޮޅު ކެމްޕޭނެއް ކުރެއްވުމަށް ފަހު މިހާރު ސަރުކާރުގެ ރާގު ވަނީ އެއްކޮށް ބަދަލުވެފަ އެވެ.
