ރާއްޖެ އާއި ރާއްޖޭން ބޭރުން މަތީ ތައުލީމު ހޯދަން ބޭނުންވާ ދަރިވަރުންނަށް ސަރުކާރުން ދޫކުރާ ސްޓޫޑަންޓް ލޯނަށް ހުޅުވާލި ފުރުސަތުގައި ފޯމު ހުށަހެޅި މީހުންގެ ތެރެއިން ޝަރުތު ހަމަވި މީހުންގެ ލިސްޓު މާދަމާ އިއުލާނު ކުރާނެ ކަމަށް ހަޔާ އެޑިއުކޭޝަން މިނިސްޓްރީން ބުނެފި އެވެ.
މި އަހަރު ސްޓޫޑަންޓު ލޯނުގެ ފުރުސަތު ހުޅުވާލީ 500 ޖާގައަށެވެ.
މި އަހަރު ހުޅުވާލި ސްޓޫޑަންޓް ލޯނުގެ ފުރުސަތުގައި ލޯނަށް އެދި ހުށަހެޅީ 1،709 މީހުންނެވެ.
ނަމަވެސް، މިނިސްޓްރީން މީޑިއާތަކަށް ފޮނުވި މެސެޖެއްގައި ބުނީ މި އަހަރުވެސް ޝަރުތު ހަމަވާ ހުރިހާ ދަރިވަރުންނަށް ލޯނު ދޭން ސަރުކާރުން ނިންމާފައިވާތީ ލޯނު ލިބޭ ދަރިވަރުންގެ އަދަދު މިނިސްޓްރީން ހުޅުވައިލި އަދަދަށްވުރެ އިތުރުވާނެ ކަމަށެވެ.
"ޝަރުތު ފުރިހަމަވާ ފަރާތްތަކުގެ ލިސްޓް އިއުލާނުކުރާއިރު، ލޯނަށް އެދި ހުށަހަޅާ 'މައިއެޑިޔު' ޕޯޓަލްއިން އެކަން ދަރިވަރުންނަށް އެންގޭނެ، ހަމައެއާއެކު އެޕްލިކޭޝަން ސްޓޭޓަސްއަށް އައި ބަދަލު އީމެއިލް މެދުވެރިކޮށްވެސް އެންގޭނެ، ސްޓޭޓަސް ބަދަލުވާއިރު ޑިސްކޮލިފައި ވެފައިވާނަމަ ޑިސްކޮލިފައިވި ސަބަބުވެސް އެނގޭނެ،" މިނިސްޓްރީގެ މެސެޖްގައި ބުންޏެވެ.
ޑިސްކޮލިފައިވާ ދަރިވަރުންނަށް އެކަމާ ގުޅިގެން ޝަކުވާ ހުށަހެޅުމުގެ ފުރުސަތު ޖޫން 27، ގެ ނިޔަލަށް ލިބޭނެ ކަމަށްވެސް މިނިސްޓްރީން ބުނެފައިވެ އެވެ.
މި ލޯން ސްކީމްގެ ދަށުން ރާއްޖޭގައި ޑިޕްލޮމާއިން ފެށިގެން މާސްޓާސް ޑިގްރީ ލެވަލްއަށް ކިޔެވުމަށް އެދި ހުށަހެޅެ އެވެ. އަދި ރާއްޖޭން ބޭރުން ޑިޕްލޮމާ ފެންވަރުން ފެށިގެން ޕީއެޗްޑީ ފެންވަރަށް ކިޔެވުމަށް އެދި ލޯނަށް ހުށަހެޅޭނެ އެވެ.
މަތީ ތައުލީމާއި ތަމްރީނަށް ދޭ ލޯނު އެހީގެ ދަށުން ކަނޑައެޅިފައިވާ ޕްރޮގްރާމުގެ މުއްދަތުގައި ދަރިވަރުގެ އިހުތިޔާރުން ބޭރުން ދިމާވާ ސަބަބަކާ ހުރެ ޕްރޮގްރާމް ފުރިހަމަ ނުކުރެވިގެންދާ މުއްދަތަށް ޓޮޕްއަޕް ލޯނު ދިނުމަށް ވެސް ސަރުކާރުން މި ފަހަރު ފުރުސަތު ހުޅުވާލި އެވެ.
